Kavagavagane 7 - Ngudradreadrekadhane Ka Sisiu 魯凱語聖經

¹ Lalakeli, pulringalringaava kai vagali, madha karimurimuru ku baaili muswane ku sabulrwane.

² Lu paluludusu ku sabulrwaneli, lri ngiesadhane kwi niakesu. Dradrela si tupapalra ki sabulrwaneli, mia lu ngipapalakebane ki maca.

³ Katapangimiana kai sabulrwaneli, si pikai ki kidremedremesu.

⁴ Malra sibetakane ka labaibai kwini ki thingalane, malra sikatalrailragianengasu kwini ki lrigilane.

⁵ Kwi lalisu lri pakidaili muswane ki taelrelre ki palrapalra, si mubere ki malimeme ka vaga ki manganganga ki sawvalai ka ababai.

Manganganga ki sawvalai ka ababai

⁶ Yakai saka nikingivaalane, la twaladhaku daane ki lribange pulatadre masiasirare,

⁷ lu drelaku kudra la takaalra ku kadrwa ku thingale ka layacengecenge; kiararaaketaku kudra ki tangeea ka kadrwa ku thingale.

⁸ Kwi lasu matwase tara kadalranane ki cekele papia kudra ki taikaikaiyane ki manganganga ki sawvalai ka ababai,

⁹ Sakamaungu si kadradrimitinga la katwase ngukakalatadrane ki lrawlrawdru ki daaneini;

¹⁰ kwini ababai la mulatadre kidredresenge iniane, ku tangiragelanane mia ki pairairange ka ababai, si kidremedremedreme ku ngialisiane.

¹¹ Kwi alisu ngusawvavalai ka kadrwa ku inwane, ka taikaikaiyane kadalranane ki cekele dadadavace siasiasilape,

¹² masasawlriwlriwlri diadiadingace, yakaai lu ikai kadalranane ki cekele, yakaai lu ikai ki tatapangalane ki umawmase takatakalre.

¹³ Kwi alisu wakebere kwidra ki yacengecenge, si maumauma, ka kadrwa ku inwane iya kai,

¹⁴ “Kaikameane patarwamaraku ku Sulivatane ka lrisi, ku sapatarumarane ku beate yakai tavanane,

¹⁵ lakamani ku kainganaili silape muswane, akuliaku ku akidrelane muswane, ala ka yakaaisu kai!

¹⁶ Wasapanga naku arakai kudra papacasane ka sasapasapane ki tapeapecane ka twalai Izipiti,

¹⁷ niarakaiyane ku sasulravane, ku aluise, si bakuru ki karangekange ka angatu patuebebelre ki tapeapecane.

¹⁸ Bwala, lata taleare kirararagai, si makakebere ngulwalwaadhane.

¹⁹ Ku taelrelreli kai yakai tavanane, kawvai matwasenga mwadaili mubabadhane.

²⁰ Kwi lasu la ngipapikai ngukaalra ku paisu, kai ki nimaka mangealane si ikaai ka vai, kai lri mutavanane.”

²¹ Kwini ababai arakai ku tangitatuthariraneini bilibili iniane, la arakai ku talralravadhane pangucawane iniane.

²² Kwini yacengecenge la makakai katwase tupapalra iniane, mia ki lwange ka kiabilibili mu taculuculwane si la mia ki salawngane ka mwalrubangane,

²³ Kai lraili palregese ki tuku; mia ki adhadhame ka ngiapalai mwa ki lravathe, kai ngithathingathingale kwini niakeini ala ka yakai ki sapapacai.

²⁴ Lalalakeli, kaiasasane kilalra kai kawrivarivali; si kicacaligiri kai vagali.

²⁵ Kikai miyaiya kaika ababai madha pangucawcawane ki kidremedreme numi; madha kangalradangadaangade katwase tupapalra iniane.

²⁶ Kai alisu ku kabebetethengaini ku umawmase takalranga, lu tapianga ku wapacai ku umawmase.

²⁷ Lu mwasu papia ki daaneini, papiapiangasu swadriadringi, katwatwase papia ki ngudedethe ki kadalranane ka sapapia ki apacadhane!