Kavagavagane 6 - Ngudradreadrekadhane Ka Sisiu 魯凱語聖經

Peaela pakipapawlringau

¹ Lalakeli, twabalresu ku asiwmiane ki pasiagiagisisu? Atalingikaiyanesu mukiame ki kaika thingalesu ka umawmase?

² Yakainga ku taavavaganengasu si mupakai mukilrikilri? Si kikerenge ki tangikaketeketanesu?

³ Alaiyasi ikai ku ngimiyaiya kai, lri kitaeesaingasu kwini ki umawmase. La tumane madu si dulru kalrabuthu? Kirarimwa katwase kikawriva kwini ki umawmase, la kitubi iniane ku amwalrane kwini waruthuku muswane.

⁴ Madha ngipapakasipelrepelrenge, la madha isadrasadra.

⁵ Ngipapalribula, mia ki adhadhame kalrabuthu ki lravathe, mia ki salawngane mubere ki alrima ki taraalwalupu.

⁶ Masasalrai ka umawmase, katwasa drele ki ababungu lu tumane lu cekecekele, si twalralrau liniane.

⁷ Kai ababungu kadrwa ku tarasangililuku, kadrwa ku tabebelenge, kadrwa ku warathudu,

⁸ ai kai ababungu luka kaladralrangedrangane wasarubu ku taleke, ikai ki takitaletalekane padulru ku sangilribatane ki kalakecelrane.

⁹ Masasalrai ka umawmase, lri pakelasu lwigane apece? Lwiganenga lri ngidrakalesu?

¹⁰ Amiasu kai, “Nau ngikatatutudrwana padaalru, nau apeceana, ngikakebere isadrana padaalru.”

¹¹ Ai, lu erekengasu, ku matikurwane lri mia ki sadre kainganai lrumai muswane, ku uramane lri mia ki wailuku ku adreme ka sadre kainganai kikaruburu muswane.

¹² Ku gurucuki ka mangangangace ka umawmase wamwa kidruanga tavuvuvulrucu.

¹³ Kwi lasu apapiyaiya ku macaini, ku alrima si drapaleini, paakai ku atavuvulrucane muswane.

¹⁴ Kwini ngialisianenga ka kidremedreme wasiasiasilape ku apasalrivane, si mwa kidruanga pacebe ku rivwane.

¹⁵ Ngwalai kikai, ku amatikurwane lri pangitutuluku mwa iniane; kwi lasu lri kipadradresenge ku pakialringau ku akipakwalriane.

^16-19 Yakai ku taipitwane ku kavalracevace ki Tamatama, ka kaika amaka tarumaraneini, amani kai: Diracane ki maca, tavuvulrucane ki lridame, alrima ka papacai ki kadrwa ku pasalrivane ka laumawmase, madrekadrekase kibubuli ku ngialisiane ka kidremedreme, walailai ngukakai ki ngialisiane ki kadalranane ka drapale, twabeabekace ku kaika patengane tupasalrivane, yakai ki latalrailragi apakalilisi.

Sapakipapawlringavane ki mapaswadringadringai

²⁰ Lalakeli, pangiamia madu ku tabulrwane ki tamasu, madha karimurimuru ku tabulrwane ki tinasu.

²¹ Kwi lavaga lini pikaiya ki kidremedremesu, la ulrungu pikai ki lresu.

²² Kwi sabulrwane lini lri ililuku ki tadadavacanesu; lukamaungu lri palakebe muswane, lukavaiyane lri tapalra muswane.

²³ Ku lasabulrwane lini yai ledra; ku takaelaelane lini sabulrwane muswane ku apangimianesu panianiake,

²⁴ ka lrika sapakidailane muswane ku malimeme ku vaga ki mangangaanga ka ababai si lataelrelre ki palrapalra ka ababai.

²⁵ Madha kilrilrilrigili ki tharirane lini; madha kikaikaili ki maca lini.

²⁶ Lri dulrusu arakai ku vaeva ku pange tusalangadhane si dawlu ki pairairange, ai lu pasudringaisu ki sataelrelreanenga lri pakaelresu patueelre sanaka maneemanenga.

²⁷ Ku umawmase lri dulruta kebere ku apwi si kai ngipapakulama ku laimai?

²⁸ Ku umawmase lri dulru ngubabelenge dadavace ki apwi ka lrangele si kai kuculu ku drapale?

²⁹ Lu tadrusane apece ki taelrelre ki palrapalra thadaalrane ka matiamukuludru; sanaka wamua taelre iniane, lri tara kipathavungu.

³⁰ Ku sadre lu kasilrau si kupa ku akaneane lri dulru madu pacepe,

³¹ ai alaiyasi kipwalra, lri paka taipitwane ku sathavungane, ku pakaikaini patueelre lri akaelrenga tusathavungane.

³² Ku paswadringai ku umawmase makukulrungunga ka kadrwa ku apakileketane, taingeane ka ngiapapakamwamudu.

³³ Kwi lasu lri tara kitudreadreekase, kilrumai, si kikabungu ku kaika amaka ngwalrananenga ku pwalane.

³⁴ Ku tangea ku taelrelre ka sawvalai lu kelrabe ku girimucane ki lavarane, lu bilringa kadruanga ku mukakeke tukalithane.

³⁵ Kwi lasu kai lri tarumara ku sacugane; adravane ka thaininu ku saceacebe kai lri maka edrepe ki girimucaneini.