Kavagavagane 5 - Ngudradreadrekadhane Ka Sisiu 魯凱語聖經

Mubera ki mapaswadringadringai

¹ Lalakeli, tukucingalra kai thingalaneli, si kilalalra kai ngiathingale ka vagali.

² Luka ngimiyaiya kikai, lri thingalesu ku apangimiane dradrele twatumane, kwi vagasu la lri mutaluvaivai ku lrigilane.

³ Ku bibiane ki kai mwalecege ka ababai alau ngiamia ki valu ku limemane, lu uma mia ki lawlau ka ulrive ku sulrapelane;

⁴ ai lu maka kiraragainga ku suruini muswane, kathane ku atubiane, akwalriane.

⁵ Kwi alisu lri ililuku muswane mwa ki apacadhane; ku ngukaikaini ku kadalranane papia swadriadringi;

⁶ kwi alisu kai ngwakakaikai ki kadalranane ki niake; ku tapudrapalananeini la kai ngithathingale ala ka papia ki ngialisiane.

⁷ Lalalakeli, kiraraketa kilalra kai vagali, madha karimurimuru.

⁸ Mubera kidaili ku miyaiya kai ku ababai! Adravane ka lrawlrawdru ki daaneini madha ngudadedethe!

⁹ Amani lu baaisu ki palrapalra kwi lrigusu, si avuthanesu pacai ikai ki alrima ki ngiakarakacane ka umawmase luka langukathathabaraneanasu.

¹⁰ Unu, ku kaika thingalesu ka umawmase lri ribici malra ku tacekecekelanesu, ku kwalrisu si ala malra la lri apakalavuthaane apalrapalrane.

¹¹ Lu kelanga ku apacadhanesu la lri dadangengasu, ku kinawmasanesu la lri kawtunga ki sakwalrialri.

¹² Lri daangesu iya kai, “Anau ngithaanga kai kilalra ku sabulrwane? Anau ngithaanga kai maka patupela ki palrapalra ku tapamamaneli?

¹³ Kainaku kialalra ku vaga ki latarabulrubulru, si tukucingalre ku sabulrwane lini.

¹⁴ La kipakasamaimaalilringa naku ikai ki rarubwane kitudreadrekase.”

¹⁵ Kapatengatengaana ki taelrelresu, savaeva ku kidremedreme kilibake iniane.

¹⁶ Ku tulalakesu ki drumane ka ababai kadrwa ku apakaesadhane muswane.

¹⁷ Ku lri paralubu muswane yai lalalakesu; kaika lri paralubu ki kaika thingathingale lini ka umawmase.

¹⁸ Lakamani, ngulwadhana ki taelrelresu, taelrea kudra ki mwasu karudrange ka ababai taelre iniane kisupilri ku akiragadhane.

¹⁹ Kwi taelrelresu mathariri matidadalame, mia ki thadi; ku ngiesadhananeini pakiaragai muswane, ku dalamaneini pangwalwadhane muswane;

²⁰ Lalakeli, asu ngucawane kadalame ki drumane ka ababai? Kwi kidremedremesu ani papia ki taelrelre ki palrapalra?

²¹ Ku Tamatama wadrele patueelre ki kakwakudhanesu, si kirarakete ku tangukakaiyanesu ku kadalranane.

²² Ku la pasalrivane ki mangangace ka umawmase mia ki lravathe; kwi pasalrivaneini la pulravathane iniane.

²³ Kwi lasu ngwalai ku kaika tamaka ngiraruthukaneini la pacai; ngwalai ki paramurane ku kulrunganeini si la ngipapakamudu.