Kavagavagane 4 - Ngudradreadrekadhane Ka Sisiu 魯凱語聖經

Apakaesadhane ki thingalane

¹ Lalalakeli, kilalra ku sabulrwane ki tama numi; kiraraketa kwi kidremedreme numi si tarumara, lanu pulringalringau.

² Ku baaili muswane ku sabulrwane mathaariri patuelre, lakamani tara pulringalringaava patuelre.

³ Saka vavalakeana naku, amaniaku ku kinilibakane ki marudrawdrange ka beraberathane ka lalake,

⁴ ku ama la bulru nakwane iya kai, “Pulringaava kai vagali, madha karimurimuru. Paluluda kai sabulrwaneli, lani ngiesadhane kwi niakesu.

⁵ Kisilapa ki thingalane si lrigilane; madha karimurimuru madha kidaidaili kai vagali.

⁶ Madha cilricilri ki thingalane, kwi alisu lri kamani ku palakebe muswane; lu kadalamesu iniane, lri kamaani ku palakebe muswane.

⁷ Ku makuciacingalrenga yai akisilapane ki thingalane, lri arakaisu ku pakaikaisu patueelre balrithi ki lrigilane.

⁸ Ku madalame ki thingalane, lri kipasiiku ki thingalane; ku wakebere ki thingalane, lri kibaai ku lrigu ki thingalane.

⁹ Ku thingalane lrika pagamucu ka lrigu ki awlrusu.”

¹⁰ Lalakeli, kilalra kai iyaiyali, alaiyasi paluludusu kai vagali, lri kalragi ku cailisu si kawlai ku tapanianiakanesu.

¹¹ Wabulrunga naaku muswane ku kadalranane ki thingalane, si ililuku muswane ngukakai ki pacengecenge ka kadalranane ikai ki tapanianianiakanesu.

¹² Alaiyasi kalrigilisu paluludu, lu dadavacesu kadrwa ku lri telenge ki tapudrapalanesu; lu lrabwalesu kaisu lri mwadreke.

¹³ Pulringaava ku kicawcakwanengasu; ku takibulrwanesu maru niakengasu.

¹⁴ Ku kadalranane ki mangangace ka umawmase, madha ngukakaikai; ku kakwakudhane ki tangangangace ka umawmase, madha twalralralrau.

¹⁵ Kibaladha ki mangangace, madha tupapapalra; katwatwasa ku kadalrananesu sikakathane, madha karedededele.

¹⁶ Ku mangangace ka umawmase lu kai pia ku langialisiane kai lri maka apece; lu kai kabebetethe ki umawmase kai lri maka ereke.

¹⁷ Kai ngilisianane yai amani ku taleke lini, ku ngikararakacane kabebetethe yai amani ku bava lini.

¹⁸ Ku kadalranane ki madringelrese ka umawmase mia ki ledra ki malialiare, arwa ledraleedra, pakeela ku takavaiyanane.

¹⁹ Ku kadalranane ki mangangace ka umawmase mia ki maungu kadradriimiti; kwi lalasu lu tubakebake, kai maka wathingale luka manemane ku patwabakebake liniane.

²⁰ Lalakeli, kirarakeeta kai vagali, la kilalra pasalaladha kai la sabulrwaneli.

²¹ Madha pamubebere liniane, pulringaava liniane, si pikai ki kidremedreme.

²² Asi lwiyane ku wamalra kikai sabulrwane, amani ku wamalra ku niake, wamalra ku mathariri ku kinawmasane.

²³ Ikai ki takidremedremanesu wadradrele madu; ku tangimiamiane ki tapanianianiakanesu twalai ki takidremedremanesu ngidarepe.

²⁴ Ku kaika patengatengane ku vaga adravane ka niaku vavalane madha kawrivariva; ku nitavuvulrucane ku vaga adravane ka niaku vavalane madha kawrivariva.

²⁵ Arakaiya ku kapatengatenganane ku kidremedreme tukucingalre drele ki cucubungu, madha lukwane si katadadangane.

²⁶ Kudra kidremedremedremesu kipapawlringava, ku tapianesu lani kai pamama.

²⁷ Kidaila ki ngialisiane, si leecege katwase, madha kidaidaili ki pacengecenge ka kadalranane.