Kavagavagane 31 - Ngudradreadrekadhane Ka Sisiu 魯凱語聖經

Papia ki talialalai pasapukwane

¹ Kai lebenga tapasapukwanane ki talialalai ki tina ki talialalai ka Limuile ka vaga:

² “Lalakeli, ka kathalraili, ka kitubili ala malra. Lri tumanaiyaku muswane?

³ Madha ikaikai ki urikaiyane ki kinawmasane pasawlra kwi pukusu, pikai ki kinawmasane ki ababai pasawlra kwi paisusu; kikai miyaiya kai nawamudunga ki latalialalai.

⁴ Kilalra, Limuile, ku talialalai kai lri maka ungulu ku bava, kai lri maka karau ku yakupwane.

⁵ Kwi lalasu sana ungulu ku bava lri karimuru ku lakakudhane ki kuni, si sidreadrekase ku kindri ki lamatiakukuru ka umawmase.

⁶ Ku sapukwane ka bava paungula ki la lri pacainga si kwalrialri ku kidremedreme ka umawmase.

⁷ Kwi lalasu lu ungulunga marimuru ku sakwalrialri si matikurwane lini.

⁸ “Atalingikaiyana kawriva ki kai wadulru ngipapasikai kawriva, la palakebe ku kindri ki vaevaeva kwalrialri ka kadrwa ku paralubu.

⁹ Pusakaiya liniane kawriva, singikai ki dringelresane turingaringau liniane.”

Ngiathingale ulecege ka taelrelre ka ababai

¹⁰ Lri mwinu madu silape ku ngiathingale ulecege ku taelrelre ka ababai? Ku kucingalrane ki alisu walribate ki kasilwane turaamuru!

¹¹ Ku taelrelreini ka sawvalai swadralru iniane, kai lri matikuru lutumane.

¹² Ku tapanianianiakane ki alisu pakaesai ki taelrelre, kadrwa ku tapaulisiane iniane.

¹³ Kwi alisu kiasamula arakai ku ubale ki kiu si lrekelreke tinunu tulaimai.

¹⁴ Kwi alisu mia ki tarasiwbawbai ka lavarukuru, patwalai adaili salri ku taleke ku akaneane ki wacekecekeleini.

¹⁵ Kwi alisu lu kaiyana kaliare ngiadrakaleenga, si padulru ku kwalre ki wacekecekeleini, la apavavalaanga ku awngane ki lasasiakawlu ka ababai.

¹⁶ Kwi alisu mwarikai ku asakadaengananane, la katwase langai, si arakai ku kipaisuini tubabudubudu.

¹⁷ Ngiacaeme ku takaumawmasane laka gugusulu ki awngane, kai tapangelrangelrace lu kakalra ku awngane.

¹⁸ Kwi alisu wathingale ku takapiane ku piapiaini patuelre ku la akilangadhane, wataleare ku tinakini kai kaedredrepe.

¹⁹ Kwi alisu ngiapapasikai tuvalrai, ngiapapasikai tinunu.

²⁰ Kwi alisu kiaragai pakubulu ki matiakukuru si kawrame ka umawmase.

²¹ Kwi alisu kai mathekethekelre lu pasabwabu, asi lwiyane kwi wacekecekeleini makanaelre yakaainga ku sapakaculwane ku laimai.

²² Kwi alisu twasapa ki tapeapecane, la ngipapasikai tulaimai ku kaimadhane si thilalatadhane ka makalrilau.

²³ Ku taelrelre ki alisu kiamatikaikai ku nagane, amani ku tarasangililuku ki lacekele, kwi taelrelreini taelre ki lamarudrange ki cekele nene ikai ki lrawlrawdru ki cekele.

²⁴ Kwi alisu wacaisi ku lakaimadhane si lalakete si kilangai ki tarathathathakai.

²⁵ Kwi alisu makecenge, kiausakene ki umawmase, maadrau ku sakiararagai si sasiadradrama papia ki tali cubunguini.

²⁶ Kwi alisu lu avavaga athingalane ku lrigilane; lu bulru la athingalane ku kilibakane.

²⁷ Kwi alisu kiasamula marasikai ki tacekecekelane, si kakalithi ku la urikai ki wacekecekeleini makanaelre.

²⁸ Ku lalalakeini mwasakene kadalame iniane; ku taelrelreini la drengedrengere iniane.

²⁹ Ku taelrelreini amia kai, “Ku ngiathingale ulecege ka ababai tapangale, ai walribatesu liniane turaamuru!”

³⁰ Ku tharirane yai kaika asudralrwalrwane, ku mathariri ku tacebeane yai kai lrika tangimiane, kathane kudra mwasakene mukuludru ki Tamatama ku ababai ka lri kidrengedrengere.

³¹ Kai alisu ani kipangibilri kisupilri ku madru ki takaunganeini; kai alisu lani kidrengedrengere ki mapapangale.