Kavagavagane 30 - Ngudradreadrekadhane Ka Sisiu 魯凱語聖經

Lakavagavagane ki Aguru

¹ Kai lebenga lakavagavagane ki Aguru ka lalake ki Yaki, kikai vaga amani ku kawriva ki lasu papia ki Itiare si Ucare ka vaga.

² Miaku ki nilapulapwane ka waudriwdripi, kai ngiamia ki umawmase; kadrwa kudra thingalane ki umawmase.

³ Kainaku kiacawcakwaneana ki thingalane; ki ngwakai ki Sanianiangenga ka Twaumase kadrwa ku thingaleli.

⁴ Aneanenga ku wamwanga subelebelenge la mulebe mukawmasane? Aneanenga ku ara alrima pwalra ki valrigi? Aneanenga ku arakai ku makalrilau cabu ki acilai? Aneanenga ku wacegecege ku la pagisane ki kadaengane kai kawmasane? Kwi lasu aneane? Wathingalesu? Ku lalakeini sia aneane?

⁵ “Ku Twaumase pangiamia sanaka pukawnungaini. Kwi lasu mia ki alathare, palakebe makanaelre kudra satalu iniane ku umawmase.

⁶ Alaiyasi kivalasu drimasu ku takawrivaneini, kwi lasu lri kaelaela muswane, si putaluvaivai muswane ka matavuvulrucusu ka umawmase.”

Drumane ka kavagavagane

⁷ Twaumase, yakai kwi taidrusane, tara pangimia lu kainaku pacaiyana:

⁸ Nau kai tavuvulrucu; nau kai matikuru nau kai kaesai, sana babaaisu ku amakakelrekelretaneli ku akaneane.

⁹ Alaiyasi ikai ku tedraneli, kainaku lri thingale muswane, “Aneane ku Tamatama?” Alau lri iyaku. Alaiyasi kawramaku, alau lri kupaku, si pakiarubwane ku nagane ki Twaumaseli.

¹⁰ Madha papiapia ki tawki kawriariva tulilisi ki sasiakawluini, amani lu kipususu, si kipathavungu.

¹¹ Yakaai ku laumawmase ku wapusu kaelaela ki tama lini, kai wathingale kiaseasene ki tina lini.

¹² Yakaai kai laumawmase kai ngiatatu mabula, ai ku patengatengane makudrulru palraelre ku kinawmasane.

¹³ Yakaai kai laumawmase kai ngiatatu kiatulrepenge, ku maca la ngikaabebelengane.

¹⁴ Yakaai kai laumawmase ka ngiakarakacane si pangulraveekane ki matiakukuru ka umawmase, la lreede ki kadrwa ku paralubu, arakai ku tavuvulrucane panianiake.

¹⁵ Ku limateke tadrusa ku lalake ka ababai, ku nagane lini tara sia “Baadhaili”. Kudra kai makakelrekelrete taitulrwane, paelre ki kadruana ku taiyane ku “Makakelretenga” amia, taisupatane, amani kai:

¹⁶ Swadriadringi; kadrwa ku lalalake ka ababai; meameale ka kadrwa ku udale ka kadaengane; arwa swadradrau kai kaedredrepe ka apwi.

¹⁷ Ku mwalralrakai ki tama, kudra latwadreadrekase ki pasuludrunga ka tina, lri kikane ki segese, ku maca lai lri kigaririu ki yaubulane ka talralreba.

¹⁸ Ku kaika maka thingaleli ka matiasamali taisupatane, ka kaika maka pulringalringauli:

¹⁹ Ku tangipapaladhane ikai belenge ki takanga; tangivelevelane ikai belenge ki alrisapesape ki sulrau; kadalranane ki varukuru ikai ki laveke; lu maupapapalange kai sawvalai si ababai.

²⁰ Ku kai mwalecege ku taelrelre ka ababai matialrwalrumale ku kakwakudhane: Kwi alisu pasalriu ki sawvalai, la ubanau, si iya kai, “Kadrwa ku piali ku nipasalrivane!”

²¹ Ku lri palingilingi ki kadaengane taitulrwane, ku kaika amaka siamecane ki kadaengane taisupatane:

²² Atalialalai ku duri; mabucubucuku ku makulrungu ka umawmase;

²³ marudrange ku matiavalracevace ka ababai; ku duri ka ababai mwabalrithi ku taetalane ki tina ka tawki.

²⁴ Kai kawmasane yakai ku taisupatane ku waudriwdripi, tikiyane ku kinawmasane ai saawlrwane turamuru:

²⁵ Kai ababungu tikiyane la turamuru, ai wathingale ikai ki kaladralrangedrangane sarubu padulru ku akaneane.

²⁶ Kai sehuange kai sapukwane, ai yakaai ki la lilibi ki alrisapesape tu taikaikaiyane.

²⁷ Kai apapawku kadrwa ku talialalai, ai wadulru katilibi katwase ngivelevele.

²⁸ Kai pepeke wadulru madu arakai ku alrima pwalra, ai yakaikai ki daane ki talialalai.

²⁹ Ku matiasalru ku tapudrapalane taitulruane, ku matiasalru ku tadadavacane taisupatane:

³⁰ Sapupukuanenga ikai ki waudriwdripi, ka kadrwa ku mukuludrane ka raiyungu;

³¹ balase ka kiu; matiasalru ka sawvalai ka kuka; tapangale katilibi ku kwapingi ka talialalai.

³² Alaiyasi kakulrungusu pakela ki ngiakalrilrigu, ku piakaisu ki kidremedreme ku tavuvulrucane, ngiakakidremedreme madu!

³³ Lu cibukane ki mireke lri dulru malra ku lawlau ki lwange, lu lrumadhane ki ngungwane ki palrapalra, twaeraerai ku ngungwane. Ku wariciu ki akalisiane lri tara paceebe ku rivwane.