Kavagavagane 3 - Ngudradreadrekadhane Ka Sisiu 魯凱語聖經

Pakiapapawlringau ki yacengecenge ka umawmase

¹ Lalakeli, madha karimurimuru ku sabulrwaneli, katapulringavaana ku tapelaelaneli muswane.

² Ku sabulrwaneli lri pakasuliivate ki vaisu, lri pakalragi pakasulivate ki niakesu.

³ Madha cilricilri ku kapatengatenganane, waerece madu si ulrungu pikai ki lresu, la pacase pikai ki kidremedremesu.

⁴ Lu piasu kikai, ku Twaumase si umawmase lri kadalame muswane.

⁵ Savaeva ku kidremedreme kasalru satalu ki Tamatama, madha ngisasatalutalu ku lrigilanesu.

⁶ Adravane lu tumanane, singikaiya ku takidremedremane ki Tamatama, lri pelaela muswane ngukakai ki mwalecege ka kadalranane.

⁷ Madha ngikalrilrilrigili, musakena mukuludru ki Tamatama sikakathane, la kidaili ki akangangane.

⁸ Lu piane kikai, maru wamaalranga madu ku mathariri ku sasulravane, la dulru pawdringai ki la takadulanesu, si paidrengere ki la kiangeangeangesu.

⁹ Arakaiya ku twalai ki umawmasu ku mathaithaariringa ku taleke si patarumara baai ki Tamatama, ka sapelaelane ka mwasakenesu iniane.

¹⁰ Lu piasu kikai, ku drawsulusu lri suete ku taleke, lai lrapesai ku bavane ka bava, si kai maka aseketanenga.

¹¹ Lalakeli, madha tudrekadrekase ku sabulrwane ki Tamatama, madha tuliapapai ku sapakipapawlringavananeini.

¹² Ku Tamatama wabulru ku kathaalraini ka umawmase, mia ki tama lu bulru ki kadalameini ka lalake.

¹³ Ku kiapasilape ki thingalane ku umawmase yakai ku akaesadhane; ku kiadringai ku apulringalringavane ku umawmase yakai ku akaesadhane.

¹⁴ Kai thingalane makadrwadrwa ki gingi ku amuesadhane madu, si ka makadrwadrwa ki kakingiane ku kucingalrane.

¹⁵ Kai thingalane silrialribate paraamuru ki kasilwane; ku akulikulisu patuelre kadrwa ku sapakiramavane kwini ki alisu.

¹⁶ Kai thingalane lri patarumara pakalragi ku niakesu, la lri patarumara pangiradhekane muswane.

¹⁷ Kai thingalane lri pakirararagai ki tapanianiakanesu, si ililuku muswane papia ki masulivate ka kadalranane.

¹⁸ Ku saawlrwane ku umawmase yakai ku akaesadhane, ku thingalane lri baai iniane ku niake.

¹⁹ Ku Tamatama arakai ku thingalane bekace kawmasane; arakai ku lrigilane apakelrekelrete kai subelebelenge.

²⁰ Ku lrigilaneini paberai ki kadravane; la papwalebe ki ememe ku saparigarigane ka udale.

²¹ Lalakeli, gemegema kwi thingalane si tadrelanesu, madha sakalrabulrabuthu.

²² Lumia kikai, lri kamani kwidra mathariri ka silu ikai ki lresu, si pakiraragai ku tapanianianiakanesu.

²³ Lri dadavacesu ikai ki masadrarate ka kadalranane, si kai mwadreke.

²⁴ Lri suteelraisu apece, si kasaamusu pakela ki maliare, ka kadrwa ku amukuludrane.

²⁵ Kaisu lri kathekelre lu pangitutuluku kela ku amatikurwane, mia ki umuku lu kela mwa ki manganga ka umawmase,

²⁶ asi lwiyane, ku Tamatama lri palakebe muswane kasuliivate; kai lri pamucilri muswane mwa ki lravathe.

²⁷ Pakaelreea ku pukusu, papia ki mwarikaikai ku akiparalubane muswane ka umawmase pia ku mathariri ka awngane.

²⁸ Kaiasasane lu ikai ku pukusu paralubu ki pasiagiagisi, madha pamukalava iniane pakela lukakaiyane.

²⁹ Madha tulisilisi ki pasiagiagisi, masalru muswane ala kamani ku ikai deethe muswane.

³⁰ Ku palrapalra lu kai tulisi muswane, madha cacapange rivu iniane.

³¹ Madha pusamalramalra ki ngiakamiane ngikarakacane ka umawmase, la madha ngimiamia ki kakudhaneini;

³² asi lwiyane ku Tamatama mavalracevace ki mangangaanga ka umawmase, wadeethe ki mwalecege ka umawmase.

³³ Ku Tamatama wapusu ki ladaane ki tangangangace ka umawmase, la patarumara ku akaesadhane ki la daane ki mwalecege ka umawmase.

³⁴ Kwi lasu twadrekase ki ngiakalrilrigu ka umawmase, si tuthariri ki ngiatatwalebe ka umawmase.

³⁵ Ku ngiathingale ku umawmase lri malra ku lrigu; ku makukulrungu ku umawmase lai lri daawlulringa ku makaakalra ku akiarubwanane.