Kavagavagane 29 - Ngudradreadrekadhane Ka Sisiu 魯凱語聖經

¹ Lu aru kikaelaela si kipathavungu la aru kakawlukulu ka umawmase lri pangitutuluku pacai, si kai maka adulrwanenga palribulu.

² Lu arutakalra ku madringelrese ka umawmase, ku mapapangale kiararagai; ku manganga ka umawmase lu rathudu, lri daange ku mapapangale.

³ Ku madalame akuli ki thingalane, pakiararagai ki tama; ku ngwadadethe kisudawdalru ki pairairange, lri pakaelre ku tacekecekelane.

⁴ Ku talialalai lu arakai ku dringelresane ngivelevele, ku kuni lri tara ngiradhekane; ku mararau ngilisiane, ku kuni lri tara kamudu.

⁵ Ku watalralravai ki pasiagiagisi, amani kudra wapaipai ku lravathe si ngikakerenge ku drapaleini.

⁶ Ku manganga ka umawmase mwacilri ikai ki lrubange ki lapasalrivane; ai ku mwalecege ka umawmase yakai ki kiarararagai ku tapanianiakane.

⁷ Ku madringelrese ka umawmase twakucingalre ku kindri ki matiakukuru ka umawmase; ku manganga ka umawmase kadrwa ku la miyaiya kai ku kurwane ku kidremedreme.

⁸ Ku ngiakalrilrigu ka umawmase pangiaracuku ki cekele pakalrithavulu; ku ngiathingale ka umawmase payasaselebane ki cekele.

⁹ Ku ngiathingale ka umawmase lu kukusu ki makulrungu ka umawmase kadrwa ku paluludane; ku makulrungu ka umawmase kathane ku amulralrakadhane si tusinalremeane akaelaelane ku thingale.

¹⁰ Ku apia papacai ki umawmase, magirimucu ki mwalecege ka umawmase; ai ku madringelrese ka umawmase palakebe ki niakeini.

¹¹ Ku makulrungu ka umawmase lu kalisi pakaelre paathingalane; ku ngiathingale ka umawmase la ngidradrepete ku lisiane.

¹² Ku talialalai lu kadalame kilalra ku nidraedrangelrane ku vaga, ku lasasiakawluini lrika lamatavuvulrucu.

¹³ Ku matiakukuru ka umawmase si ngiakarakacane ka umawmase yakai ku vaeva ku tamararamavane, kwi lalasu thadalrane ka kiabaai ku maca ki Tamatama.

¹⁴ Ku talialalai lu palakebe ku kindri ki matiakukuru ka umawmase, lri kaulai rathudu si kasulivaliivate.

¹⁵ Lu bulru si lrumai lri dulru padrima ku thingalane; ku kiapangilralraingi ku vavalake pakiarubwane ki tinaini.

¹⁶ Luka amani ku wagemegeme ku puku ku manganga ka umawmase, arwa drima ku pasalrivane; ai ku madringelrese ka umawmase lri drele liniane lu kamudu.

¹⁷ Bulrwa ki lalake, kwi lasu lri pakasulivate pakiraragai ku tapanianianiakanesu.

¹⁸ Lu kakadrwa ku taarakane ki Twaumase, ku laumawmase lri ngilralraingi kanganga ka kadrwa ku waruthuku; ku paluludu ku hulrice ki Twaumase ka umawmase lri kaesai turamuru!

¹⁹ Lu bulrwane ki sasiakawlu kaika ara vagaane sikakathane, kwi lasu adravane ka kialalra si pulringau kai lri paluludu.

²⁰ Ku madraedrangelre lu kawriva ka umawmase, adravane ka makukulrungunga ka umawmase silrialribateana iniane.

²¹ Ku pangiasasingikaai ki sasiakawlu, si pasingika vavalake pia ku nau pia iyaini, lri ikai ku vai kwi lasu lri ribici ku tacekecekelanesu patueelre.

²² Ku malilisi ka umawmase wadawlu ki amakaririvwane, ku maupupungu kalilisi ka umawmase makaakalra ku apasalrivane.

²³ Kai ngikalrilrigwane pasipai ki umawmase; ku ngiatatwalebe pakiausakene ki umawmase.

²⁴ Ku marededele ki sadre amani kudra ngiakakitubadha; kwi lasu lu ikai tasaibaibangane kiketekete kai lri lreme kawriva ku patengatengane ku vaga.

²⁵ Ku makiwcu kikawriariva ki palrapalra, lri mutukulrane; ku satalu ki Tamatama, lri tara kasulivate.

²⁶ Sanaka umawmase apia kikadaalame ki talialalai, ai ku patengatengane kathane ku Tamatama ku lri putaluvaivai ku dringelresane.

²⁷ Ku madringelrese ka laumawmase malrase ki kai madringelrese ka laumawmase; ku manganga ka laumawmase malisi ki mwalecege ka laumawmase.