Kavagavagane 28 - Ngudradreadrekadhane Ka Sisiu 魯凱語聖經

¹ Kai manganga ka umawmase adravane ka kadrwa ku wakurikurisi ku umawmase walailailai mubebere; ku mwalecege ka umawmase lai lri mia ki raiyungu ku garangane.

² Ku kuni lu ikai ku tapasalrivane, ku amani ku maerece kai watelrai pabalrithi; ku kuni lu ikai ku malrigili ku latarasangililuku, lri tara kawlai kasulivalivate.

³ Ku malilisi ka talialalai twasinalreme dredrepete ki matiakukuru ka umawmase, mia ki umuku ka mabebetethe ki taleke.

⁴ Ku wabaebalre ki hulrice ka umawmase palraingi ki manganga ka umawmase; ku palululudu ki hulrice ka umawmase kai palraingi ki manganga ka umawmase.

⁵ Kai manganga ka umawmase kai wathingale ki madringelrese luka manemane; ku wasilasilape ki Tamatama ka umawmase wathingale ku madringelrese ka kakwakudhane.

⁶ Ku matiakukuru la muleecege, silrialribate kudra ki maesaesaesai la katavuvuulrucu.

⁷ Ku paluludu ki hulrice amani kudra ngiathingale ka lalake; ku sia talragi ki apiakaekane kasasalrai ka umawmase, lri tara pakiarubwane ki tamaini.

⁸ Ku arakai ku tatukalrane ku lalake ki paisu si kaesai, kwi tacekecekelane ki lasu luka bibilrilinga lri mwa ki alrima kudra ki makaikalithi ki matiakukuru.

⁹ Kwidra kai paluludu ki hulrice ka umawmase, ku Twaumase lri tara kavalracevace ki inulrini.

¹⁰ Ku walrilrigili ki mwalecege ka umawmase pakanganga lri mwadringi tuverevere ki salrigilaneini; ku mabula ka umawmase lri malra ku pakalreva.

¹¹ Ku sapaiswane ka umawmase ngiathingalaku amiya; ai ku saawlrwane ka matiakukuru ka umawmase wadrele patuelre ku tangimiamianeini.

¹² Ku madringelrese ka umawmase lu kamani ku warathudu, kiararagai sanaka umawmase; luka manganga ka umawmase ku wagemegeme ku puku, mwabere kilepenge sanaka umawmase.

¹³ Ku ngiasasubusubu ku lapasalrivane, kai lri kasulivalivate; ku ngiathathingale ku tapasalrivane si ngitatupela, ku Twaumase lri kakalithi iniane.

¹⁴ Ku mwasakene mukuludru ki Tamatama, kadrwa ku alikaiyane ku angiesadhanane; ku makelraelrathe, ngiapapakamwamudu.

¹⁵ Ku ngiakarakacane ka talialalai lu rathudu ki matiakukuru ka umawmase, mia ki wagirigiringi ka raiyungu, si wasilasilape ku akaneane ka cumai.

¹⁶ Ku amani ka warathudu lu kai thingale ku kakudhane, lri tara kamani kudra ngiakarakacane ka talialalai; ku mavalracevace ki kai madringelrese ka tacekecekelane, lri kawlai kasulivalivate ku tarathudane.

¹⁷ Ku papacai ki umawmase pasalrivane, lri tara mubebeberenga pakela ki tapacadhane, anatumane la kakadrwa ku palribulu iniane.

¹⁸ Ku mwalecege ku kakwakudhane, lri kipakasulivalivate; ku matavuvulrucu ku kakwakudhane, lri makakai tubakebake.

¹⁹ Ku kiasamwamula ka tarakawaungu kai lri kaurame ku akaneane; ku pasawlrawlra ku vai ka umawmase lri matikuru.

²⁰ Ku twakapatengatengane ka umawmase lri ngiesadhane; ku kiasanu satacekecekelane ngukai ki kai madringelrese, makucingalre mubere ki akipathavungane.

²¹ Ku kiadremedreme ku ngipapakaesadhane kai pacengecenge; ai yakaai kai laumawmase ku ngwalai ki tikiyane ka pange si kai pangimia saibange.

²² Ku mararau ka umawmase maracange ku angukaiyane ki kai madringelrese satacekecekelane, kai wathingathingale ala ka lri kelanga ku amatikurwane.

²³ Ku wabulru pakipapawlringau ki palrapalra, makikadadalame kudra ki tara ngikathaithaitharirane kawriva.

²⁴ Pasalrivane ku kai amia lu kupa ki marudrawdrange, kadrwa ku tamakakaelane ki tarakupawpa.

²⁵ Kai la ngipapakaesadhane wadaedarepe ku rivwane; ku satalu ki Tamatama kadrwa ku apalikaiyane ku akaesadhane.

²⁶ Ku makulrungu ka umawmase tangisasudralrwane; ku pasalaladha ki ngiathingale twatumane, lri tara kasulivate.

²⁷ Ku pakubulu ki matiakukuru, kai maurawrame; ku wadrele ki matiakukuru si kai palribulu, lri tara kipusu.

²⁸ Luka manganga ku magagemegeme ku puku, mwabere kilepenge sanaka umawmase; ai kwi lalasu lu kamudu, lri acegecege ku madringelrese ka umawmase.