Kavagavagane 27 - Ngudradreadrekadhane Ka Sisiu 魯凱語聖經

¹ Madha pasikaikai lwiya ngikalrilrigu, asi lwiyane kaisu wathingale ku lrika angimiane ki vaivaivai.

² Ani ka palrapalra ku walrigu muswane, ka amani kudra kaika thingalesu ku umawmase ka walrigu muswane; madha ngikakamanimani ka ngialralrigu.

³ Kai lrenege, enai dae adravane katelrege, ai ku taputaluvaivadhane ku amatikurwane ki makulrungu ka umawmase silrialribate ku telregane.

⁴ Kai lisiane matiangeange si kaadrau ku tatulisiane, ai ku pathalrane silrialribate ku matiwkuludrane.

⁵ Ku pwataluvaivai kaelaela silrialribate ki niseketane ka dalamane.

⁶ Ku tapakadulane ki talragi ngwalai ki akatharirane; ku takeberane ki badha, tara wadradrele madu.

⁷ Ku ngwalwadhane kabucuku ka umawmase adravane ka du ki valu malrase; ku mwabaisi kasilrau ka umawmase adravane ka makedepalre ka akaneane pakalimeeme.

⁸ Ku matwase ki cekele si ibabadhane ka umawmase mararaamau ki adhadhame ka matwase ki lisisuku ngipalai mwadaidaidaaili.

⁹ Kai sapasangulrelremane si lalawlau pakiaragai ki umawmase, ku nitukapatengatenganane pasapukwane ki talragi.

¹⁰ Madha karimurimuru ki talragilragi si talragi ki tamasu. Lu matikurukurwane madha silasilape ki retesanesu ku akiparalubane, asi lwiyane ku ngwadadethe ka talragi walribate ki yadaili ka retesane.

¹¹ Lalakeli, ngithingala, la nau kiragai, lani ikai ku vagali tubalre ki mwalralralrakai nakwane ka laumawmase.

¹² Ku wathingale si dradrele ka umawmase, lu kipadradresenge ki amatikurwane makakaai mwabere kidaili; ku kadrwa ku thingale ka umawmase arwa mucucubungu si sulisi.

¹³ Ku pasiakai ki kaika thingaleini ka umawmase siwmi, kwi lasu lri arakai ku laimaini tusadrepetane.

¹⁴ Lu aceacane luka mialrealre ki talragi, si akwadrau subulrubulru iniane, maru wapusunga iniane.

¹⁵ Ku mavitaviti ka taelrelre ka ababai mia ki watilatilatili ka udale;

¹⁶ lu paidrengerane iniane mararaamau lu ruthukane ki valrigi, lu arakaiyane ku alrima dakucu ki abera.

¹⁷ Lu makalrumalrumalrumale ku matatalragi, maru adremenga ka magagilragilragilri si tara karangisi.

¹⁸ Ku wadrangalrungalru ki icizike ka angatu, lri kane ku madru ki icizike; ku marasikaikai ki tawki lri tara kitukuciingalre.

¹⁹ Ku twalai ki acilai ka alalingu yai lringauini; ku taputaluvaivadhane ki kidremedreme yai laka amanisu.

²⁰ Kai swadriadringi si kai apacadhane kai lri maka pasute, ku murikai ki kidremedreme ki umawmase makucingalre pangulwadhane.

²¹ Ku tatwapwapudhane wathalethale ki kingi gingi, ku tadrengedrengerane kialrialringau ki takaumawmasane.

²² Lu apaelreane ki makulrungu ka umawmase si becenge pua ki lungu silribu, kudra kulrunganeini sakamiya kai kidaili iniane.

²³ Dradrela sirapale ki lakiusu, si marasikai ki lapulapusu,

²⁴ asi lwiyane kai tacekecekelane kai lri dulru kasakwaikai, kai civare ki talialalai kai lri dulru ikai palralrawthu.

²⁵ Lu ralabane ki rudame ka laubulu, lri rigarigi pela kai laubulu, kai lalacenge lregelrege lri mialri kikilacenge.

²⁶ Lri dulrusu kaciane ku ubale ki kiu si tulaimai, la arakai ku nikilangadhane ku lakiu ku paisu si langai ku kadaengane.

²⁷ Ku tedrane ku lakiu yakai ku mireke ku lri lapu muswane si wacekecekelesu, lai lri dulru pacekecekele ki lasasiakawlusu ka ababai.