Kavagavagane 26 - Ngudradreadrekadhane Ka Sisiu 魯凱語聖經

¹ Ku wadrengedrengere ki makulrungu ka umawmase, kadrwa ku tamakakaelane lu pasabu ki kaladralrangedrangane, lu kitaletaleke si udale, ka kai mamamwa lutumane.

² Ku wacapange pusu mia ki rulungu si alralrakici ka ngiapapapalai, kai lri maka dulru tulisi ki umawmase.

³ Arakai ku salrumalrumai lrumai ki rigi, la arakai ku satametamengane ruthuku ki ngudwi ki ruba, papia ki makulrungu ka umawmase mialri ka arakaiyane ku ukudru.

⁴ Ku twabalre ki ngiakulrungu ka mendai, mararaamau kudra ki kiavaga kakulrungu.

⁵ Arakai madu ku makulrungu ka vaga tubalre ki makulrungu ka umawmase; luka miyaiya kai, kudra kiavaga ku umawmase lri thingale, kwi lasu ala ka kaika ngimiyaiya ki takidremedremaneini ka saawlrwane.

⁶ Lu sudralrwane ku mathariri ku vaga ki makulrungu ka umawmase, kadrwa ku tamakakaelane ki wangetele ku drapaleini, ka ngiapapakwalri sikakathane.

⁷ Ku makulrungu ka umawmase lu arakai ku kavagavagane, mararaamau ki pilapilai lu arakai ku drapaleini.

⁸ Lu drengedrengerane ki makulrungu ka umawmase, mararaamau ki wamalra ku madrau ku lrenege si erece pikai ki pacinku.

⁹ Ku makulrungu ka umawmase lu arakai ku vaga ki ngiathingale, mararaamau ki mabusuku lu malra ku cecenekane ka angatu si lrumalrumai cacapange.

¹⁰ Ku tawki lu capange dawlu si arakai ki makulrungu ka umawmase si walribalribate ka laumawmase, kudra mamwamwa ku takicapilane ku umawmase lri kisacepe makanaelre kitulisi.

¹¹ Ku makulrungu ka umawmase kai watelrai pia ku ngiakulrungu ku awngane, mararaamau ki tawpungu lu siwlriwlri kane ku putaini.

¹² Wadrelesu kudra ngiathingalaku amiamia ka umawmase? Ku makulrungu ka umawmase madradrau ku sasiadradrama iniane.

¹³ Ku masasalrai ka umawmase yatavanane si iyaiya kai, “Yakai kadalranane ku garagarange ka raiyungu, yalatadre ku yacengecenge ka raiyungu.”

¹⁴ Ku masasalrai ka umawmase yakai ki tapeapecane si ngibaebaebalre, mia ki saelelebane ka ngiavelevelevele.

¹⁵ Ku masasalrai ka umawmase wataale ku alrima malra ku akaneane, ai adravane ka apungududhaneini masaalrai.

¹⁶ Ku masasalrai ka umawmase lu ngikakidremedreme mathiathingale kudra ki tapitu ka la talrilrigili matubaebalre.

¹⁷ Ku kadrwa ku capilaneini la makakalisi ki umawmase, amani kudra matwase mukadalranane ki cekele si tacalringa bilibili ki kaika nilapulapwane ka tawpungu.

^18-19 Ku watavuvulrucu ki pasiagiagisi, parwarwaruthalaku la iya, kadrwa ku tamakakaelane ki amamama lu kivavavange ku sapapacai ka apwi si adreme.

²⁰ Luka kadrwa ku angatu, ku apwi maedrepe; luka kadrwa ku kawariariva capange, yadrengere ku rivwane.

²¹ Ku maririvu ka umawmase lu putata ku amakalilisiane, miyaiya lu drimane ku angatu pikai ki apwi.

²² Kai nikawriarivane capange ka vaga mia ki tinukucingaalrane ka akaneane, sana pungududhane makakaai lrelre.

²³ Lu kawrivane ku kaika kidremedreme madu, mararaamau ki riringici ka dilrungu la pwane pasabelenge drisisi ku lrawlrapungu ka gingi.

²⁴ Ku ngiakathaithariri ka umawmase arakai ku talralravadhane ku lavaga subusubu ki lisiane ka kidremedreme.

²⁵ Adravane kasulrapele ku vaga, madha kasalrusalru iniane, asi lwiyane kwi kidremedremeini swaete kwi lisiane.

²⁶ Kwi lasu alau lri dulru sekete kwi lisiane, ai ku laumawmase takamacamacaane drele makanaelre ku nganganeini.

²⁷ Ku walruku ku lrubange, amanilringa ku lri mulrubangane; ku watatwi ku lrenege, lri ngivalrutaatwilringa ku lrenege mwa iniane.

²⁸ Ku ngiakathaithariri ku lridame papia ki kalraseini ka umawmase; ku matalravai ku ngudwi lri pakadula.