Kavagavagane 25 - Ngudradreadrekadhane Ka Sisiu 魯凱語聖經

Kavagavagane ki Sulumungu (pacungulu)

¹ Kai lebenga kai nipacasane ka vaga mialri ka kavagavagane ki Sulumungu, ku amani ka wapacase yai yakai ki daane ki talialalai ki Yuda ka Hezekia.

² Ku lrigu ki Twaumase niseketane ka matiasamali ka makucingalre thingale; ku lrigu ki latalialalai yakai ki wathingale drele ku pacengecenge si kai pacengecenge.

³ Ku kidremedreme ki talialalai kaidu maka wathingale; ku takidremedremaneini mia ki subelebelenge ku abelengane, mia ki laveke ku mwadringane, kaidu maka lekete.

⁴ Lu paswalane mwalra ku kiaibu ki gingi ku lakudrulru, ku taradarepe ki gingi lri dulru tulawbubulu ku mathariri.

⁵ Paswalana mwalra ku manganga ka taradrekase ikai ki talialalai, ku sarathudanane ka puku ki talialalai lri dulru cegecege ikai belenge ki dringelresane.

⁶ Kusu madha ikaikai cucubungu ki talialalai paramuru ngitatwadrau, kidremedreme ku akidrelane ki talialalai.

⁷ Maesaesai mukalava ki umawmase ku adawlane muswane pucucubungu, malilisi lu kipulrilrikudrusu ki umawmase, pakai ku apaneneane ki sanianiange muswane ka umawmase.

⁸ Maadha ngikagagarangane mutasaibaibangane siwmi; alaiyasi ku drumane ku wasiwmi la putaluvaivai ku tapamamanesu pakiarubwane muswane, lai lri tumanengasu?

⁹ Lu ikai ku tamakakarivurivuane numi ki pasiagisi, ngiakakamani madu makakathariri. Madha putaluvaivaivai ku lanikibububuliane ki palrapalra;

¹⁰ amani lu kipasudaalepengasu ka amani kudra tarapasasasarau ku himice ka umawmase, la kai maka dulrunga kidaili kikai miyaiya kaika akiarubwanane.

¹¹ Ku niaku vavalane la kathariri ku taiyane, lri mia ki kingi ka pinku ka piakai ki gingi ka usara.

¹² Ku ngiathingale ka umawmase ku tapakipapawlringavaneini, papia kudra ki mwabangalre tarumara ku umawmase, makuciacingalre kudra ki lridingi ka kingi si kakingiane ka lasangiragelanane.

¹³ Ku matiasudralru ka nisikawlane pakiaragai kudra ki siakawlu iniane, mararaamau ki yakai tailebe ki cengelrau kitaletaleke la ikai ku mangangerece ku acilai.

¹⁴ Ku vaga sikathane ku tatubalreane ka lri baai ku lasaceacebe, mararamau ki yakai ku valrigi yakai ku ememe laka kadrwa ku udale.

¹⁵ Ku maka kiadili pasapukwane bulru wadulru buruku ki makeecenge ku takiecebane, la dulru pakamamelre ki amani ku la warathudu ka umawmase.

¹⁶ Madha paramuramuru kane ku valu, lu pingikalrasu kane lri putasu.

¹⁷ Madha katangulatatataadrane mwa ki pasiagiagisi, amani lu kawpungu muswane, si kavalracevace muswane.

¹⁸ Ku kaika patengane ku tasiwmiane twalisi ki pasiagiagisi, mararaamau ki marangisi ka dramu, maadrau ka pangulru, si lraili ka wadulru papacai ki umawmase.

¹⁹ Lu matikurukuru si la satalu ki kaika asudralrwalrwane ka umawmase, mararaamau ki arakai ku malisi ka valisi taetalre, si arakai ku pilapilai ku drapale dadavace.

²⁰ Lu papiane ki kwalrialri ku kidremedreme senai, mararaamau lu kakecelre la mulaimai iniane, si pwa ku timu ki dulaini.

²¹ Lu kasilrau ku badhasu, baadha pakane iniane, lu kakadhame, baadha paungulu iniane.

²² Lu piasu kai, kwi lasu lri kadireele ku lringau, si kainu turamuru, ku Tamatama lri pangibilri muswane.

²³ Ku twalilisi wailuku ku lisiane, mia ki twalai tali dradha ka valrigi ka mailuku ku maadrau ku umuku.

²⁴ Nai ikaiyaku ki kapipivane ki daane kamani, si kai taelre ikai ki swaadrau ka daane ki mavitaviti ka taelrelre ka ababai.

²⁵ Lu kilalrane ku singi adaili ku mathariri ku lavaga, mararaamau lu kakadhamane si ungulu pingi akuvaeva ki kupu ku mangangerece ka acilai.

²⁶ Ku madringelrese ka umawmase lu icucubungu ki manganga ka umawmase tikelepane, mararaamau ki nithalrimwane ka berai ka acilai ku kiakudrulru ka dralremedreme ka acilai.

²⁷ Lu paramurane kane ku valu kai mathariri; ku kiasanu kiparamuru kilrigu thadaalrane ka matiavalracevace.

²⁸ Ku maupupungu kalilisi ku takaumawmasane mararaamau ki vaeva ka kadrwa ku kepale ka cekele, maduai kikabebetethe.