Kavagavagane 24 - Ngudradreadrekadhane Ka Sisiu 魯凱語聖經

(19)

¹ Madha pusamalramalra ki manganganga ka umawmase, la madha mangulatataatadre liniane.

² Kwi lalasu kiadredredreme ku apiane ku ngialisiane sikakathane; kwi lalasu sana avavaga wadula ki umawmase.

(20)

³ Kai tacekecekelane niarakaiyane ku thingalane pacegecege, ngwalai ki kalithane kapapedrenge.

⁴ Ku yakai ku lrigilane ku wacekecekele, ikai ki daane lri tara suete ku makaelaeela ku tathaithariri takuciacingalre ku lalawbubulu.

(21)

⁵ Ku ngiathingale ka umawmase madrau ku puku; ku saawlrwane ka umawmase kiapadrimadrima ku puku.

⁶ Lu kikaruburu tara paswalana ikai ku apangimiane; lu takalra ku taramadrekadrekadrekase, lri tara akaci.

(22)

⁷ Ku lavaga ki ngithingale kaika adulrwane pulringalringau ki makulrungu ka umawmase; kwi lalasu lu ikai ki takaigigiane mametemete.

(23)

⁸ Ku paiyaiya ku ngialisiane ka umawmase lri kitu taramadrekadrekadrekase ku ngialisiane.

⁹ Ku tamadrekadrekasane ki makulrungu ka laumawmase yai pasalrivane; ku twasinalreme ki palrapalra, kiakalisi ki umawmase.

(24)

¹⁰ Ikai ki amatikurwane ka vai si kakiwcu, amani ku twaramuru.

(25)

¹¹ Kudra kiavutha kibilibili si kipapacai ka umawmase taala kwi alrimasu paralubu, madha kalrilrilriki.

¹² Kadrwa ku capilaneli alau lri iyasu, ai ku Twaumase lri singikai ku tapangimianesu kidremedreme saibange muswane. Maka wadrele muswane, pakeela ki adringi ki kidremedremesu. Kwi lasu lri singikai ki kakwakudhanesu kelrete ku apakalrevane apathavungane.

(26)

¹³ Lalakeli, kanea ku valu, amani ku mathaithariringa, lu kanesu ku twalai ki tatumwane malra ku valu malimeeme.

¹⁴ Pulringalringava, ku thingalane papia ki kidremedremesu lri ka miyaiya kikai, alaiyasi malrasu, ku lrika angimiane waledra, ku sasiadradrama kai lri kamudu.

(27)

¹⁵ Kusu ka mangangace ka umawmase, madha kidredredreme ku aravasane ki madringelrese ka umawmase; la madha kabebebetethe ki taikaikaiyaneini.

¹⁶ Kai madringelrese ka umawmase adravane tubakebakebake, lri tara peelana ngidrakale; sana kela ku amatikurwane lri makakaai amudu ki mangangace ka umawmase.

(28)

¹⁷ Lu drelane lu matikurukuru ku badha madha kiragaragai; lu tubakebake ku badha madha kiragaragai.

¹⁸ Ku Tamatama wadrele muswane; kai madalame lu pikaisu ku miyaiya kai ku kidremedreme; alau lri ngwalai kikai si lri kai pathavungunga ki badhasu.

(29)

¹⁹ Lu kaesaesai ku manganga ku umawmase madha ngwalalai si kai kathaithariri ku kidremedreme; madha pusamalramalra liniane.

²⁰ Ku manganga ka umawmase kadrwa ku angimiane ku kadalranane, kadrwa ku sidramane.

(30)

²¹ Lalakeli, musakena mukuludru ki Tamatama, musakena ki talialalai. Madha kirederedelane ki wabaebaebalre ka laumawmase;

²² Kikai miyaiya kaika umawmase lri makakaai kamudu. Kaisu wathingale ki Twaumase ki talialalai ka lri pathavungu, lai lri dulru pulebe ku amatikurwane?

Drumane ka vaga ki ngiathingale

²³ Kikai bilrilane ka vaga kawriva ki ngiathingale: Ku tarasaibaibange, madha apakaelaelaela.

²⁴ Alaiyasi kakadrwa ku pasalrivane ku tupasalrivaneini, lri kipusu lri kikavalracevace ki yakawmasane ki umawmase,

²⁵ ku pathavungu ki pasalriu ku tarasaibaibange lri kasulivalivate, si lai lri kimalrigulrigu.

²⁶ Ku twakapatengatengane tubalre amani ku patengatengane ka talragi.

²⁷ Paswalana ikai lrialringulu padulru ku satudadanane, si ikai umawma padulru ngilreepenge, ala pathagili tudaane.

²⁸ Madha caapange siwmi si pangilisiane ki pasiagiagisi; la madha tavuvuvulrucu.

²⁹ Madha iyaiya kai, “Ku tapiane nakwane, lri tungimiyaiyaku pia iniane! Lri bilriaku!”

³⁰ Walribatenga naku ku umawma ki masasalrai ka umawmase, si babudubudwaneini ka makulrungu ka umawmase,

³¹ kathane ku cecenekane ka angatu ka swaete cebecebe, maubulunga palraelre, ku ngiathalringulu ku la raedre mababurukunga.

³² Takwa dredrelaku, si takukidredredreme, la kibulrwaku ku taingeaane.

³³ Amiasu kai, “Nau ngikatatutudru, apece, ngikakebere isadra padaalru.”

³⁴ Ai, lu kasipelrengesu, ku matikurwane lri mia ki sadre kela lrumai muswane, ku uramane lri mia ki wailuku ku dramu ka gurucuki kainganai kikaruburu muswane.