Kavagavagane 23 - Ngudradreadrekadhane Ka Sisiu 魯凱語聖經

(6)

¹ Lu kalringulusu ki tabebelenge kane ku aga, pwalringau madu luka sia aneane.

² Alaiyasi ka pingiakalrakalrasu kane, ngiararuthuku madu.

³ Madha apikane karamici kwi twakaneaneini, kwini alau sapawlrabukaneini.

(7)

⁴ Madha akaelrelre kwi pukusu si kidredredreme kipasilape ku akaesadhane, arakaiya ku lrigilane si ngidradrepete.

⁵ Kai paisu si tacekecekelane padaalru si kawlrau, miakau twa sapakepake, mia ki takanga ka ngiapalai katwase.

(8)

⁶ Madha kanekane ku aga ki magetheathelrale ka umawmase, si karaau ku malimeme ka akaneaneini;

⁷ asi lwiyane luka ngitwatumane ku takidremedremananeini, miyaiya kwi kakwakudhaneini, kwi lasu adravane iya kai, “Bwala, kanea, ungula” Iya muswane, ai kaika kidremedremeini.

⁸ Kwi tapianeini ngiakathaithariri, lri apaputasu; kudra kawrivasu iniane ku mathariri ka vaga makacilri patuelre.

(9)

⁹ Madha kawrivariva ku kinavagavagane ki makulrungu, asi lwiyane kwi lasu kai lri tukucingalre ki ngiathingale ka vagasu.

(10)

¹⁰ Ku sidrumane ka pagisane madha patanulawla, la madha drikidrikisi ku takauawngane ki lapakulrulrulu.

¹¹ Ku Tamatama yai amani ku sapukwane ka tarapusakaikai liniane; lri kiecebe muswane, si pasikai liniane kidrikisi ku vaga.

(11)

¹² Kiararaakete madu ku sabulrwane, si kicacaligiri kilalra pasalaladha ku ngiathingale ka vaga.

(12)

¹³ Tara bulrua ki lavavalake; lu bulruane lrumai, kai lri pacai,

¹⁴ ngiabaalrelringa kamani ka palribulu ki niakeini.

(13)

¹⁵ Lalakeli, alaiyasi ikai ku thingalanesu, lri kiraagadhaku turamuru!

¹⁶ Lri ngwaladhaku ku takilalraneli ku madringelrese ku takawrivanesu si kiraragai kai kidremedremeli.

(14)

¹⁷ Madha pusamalramalra ki pasalrisalriu ka umawmase, katapikaiyana ku musakenane mukuludrane ki Tamatama ku kidremedreme.

¹⁸ Luka ngimiyaiya kai, ku lri ka angimianesu lri kasulivalivate ledraedra.

(15)

¹⁹ Lalakeli, kilalra kai vagali, ngithingala, la dradrele ku tapanianianiakanesu.

²⁰ Madha sitalragilragi ku taraungulu mapikaekane ka umawmase.

²¹ Ku taraungungulu mapikaekane ka umawmase lri tara matikuru. Ku twarakete kanekane apeapece, lri silaimai ku puripurici ka laimai.

(16)

²² Kilalra pasalaladha ki twalalake si lapu muswane ka marudrawdrangesu; adravane pasuludrunga, mwasakene madu liniane.

²³ Ku patengane ka sabulrwane, thingalane, tadrelane, alremelremeanesu langai, ai maadha kilangalangai.

²⁴ Ku tama ki madringelrese ka umawmase swadalepe kiraragai; lu ikai ku ngiathingale ku lalake maadrau ku takisasane.

²⁵ Pakisasa ki marudrawdrangesu! Pakiragadha ki tinasu!

(17)

²⁶ Lalakeli, savaeva ku kidremedreme papia nakwane kicawcakwane, twalralrava kai kadalranane ki tapanianianiakaneli.

²⁷ Ku pairairange si kai mwalecege ka ababai yai amani ku lri muniake ka lrubange;

²⁸ Kwi lalisu mia ki sadre ka walepelepenge, la takaalra ku umawmase ku watavuvulrucu cilringa ki madringelrese.

(18)

^29-30 Ku mabusubusuku ungungulu singibila sanaka baava, amani ku lri tubitubi ki tacekecekelane, lri dadange, karivurivu, kai idrengere ku lisiane. Ku macaini lri kadirele, kadadula ku kinawmasane.

³¹ Madha karamili ki yakupwane! Ku bava yakupwane kadirele likalikathe, vavangalre ku aungulanesu.

³² Lukabilrilane, lri miasu ki kiakaace ki siduduku ka sulrau.

³³ Kwi macasu lri utaluvaivai ku maelaelane ku tangimiamiane; lri kawlrau ku puku ki takidremedremane si avavaganesu.

³⁴ Lri miasu ki yakaai ki laveke kipeapeapelai, apece ikai karingavane ki sacegecegane ka angatu.

³⁵ Lri iyasu kai, “Tara ka kialrumadhaku, ku palrapalra pakialringau lrumai nakwane, ai kainaku twamanemane. Anau kai maka ngulralringalringavane? Lri katwaseana naku muribava!”