Kavagavagane 22 - Ngudradreadrekadhane Ka Sisiu 魯凱語聖經

¹ Ku akimatikaikaiyane madu makuciacingalre ki tacekecekelane; ku akikasalrwane madu makipusamamalra ki kingi gingi.

² Ku matiakukuru ka umawmase si sapaiswane ka umawmase yakai ku vaeva ku tamararamavane, kwi tadrusa tara bekace ki Tamatama.

³ Ku ngiathingale ka umawmase sana drele ka amatikurwane kiasamula mubere; ku kadrwa ku thingale ka umawmase arwa cucubungu si sulisi.

⁴ Ku angimiane ki mwasakene mukuludru ki Tamatama, la ngitatwalebe ku kidremedreme, amani kai akaesadhane, lrigu, akalragiane ku niake.

⁵ Ku ngiakakilibake ki niakeini ka umawmase, wathingale mubere ki saarakaikaiyane pwalra ki manganga ka umawmase ka lravathe.

⁶ Bulrwa ki lavavalake ngukakai ki mwalecege ka kadalranane, lani twalai ki vavalake pakeela ki tarudrawdrange kai kidaili.

⁷ Ku matiakukuru kiakadrenge ki sapaiswane; ku akiame duri ki paakiame ka tawki.

⁸ Ku wasabulu ku kai madringelrese ka sapaivai, lukabilrilinga kadrwa ku taalikaiyane ku amatikurwane; ku sadredrepetaneini ki umawmase ka puku lri tara kamudu.

⁹ Ku matwabake si vala baai ku akaneane ki matiakukuru ka umawmase, lri tara kisubulrubulru.

¹⁰ Lu pakatwasane ki ngiakalrilrigu ka umawmase, ku rivwane, makalilisiane, tusinalremeane patueelre lri idrengere.

¹¹ Ku madalame ku alrivilrivi kabula ku kidremedreme si mathariri ku saiyaiya ka umawmase, kiakadalame ki talialalai.

¹² Ku maca ki Tamatama wadrele sirapale ki patengane ka sabulrwane; waamudu ku takawrivarivane ki tara tavuvuvulrucu.

¹³ Ku masasalrai ka umawmase taikaiyane tavanane; kwi lasu amia kai, yalatadre ku raiyungu mukalavalava lri lreede iniane.

¹⁴ Ku ngudwi ki pairairange ka ababai yai lrubange; ku kavalracevace ki Tamatama ku umawmase lri mulrubangane.

¹⁵ Kai lavavalake yakaaiyana ki makulrungu, lu lrumadhane bulru lri dulru kilalra.

¹⁶ Ku wamalra pamatikuru ki matiakukuru ka umawmase si ngwalai satacekecekelane, ku wavavangalre baai ku saceacebe ki sapaiswane, lukabilrilanenga lri tara kawrame.

Taimatulrulane ka vaga ki ngiathingale

¹⁷ Kilalra, lri malraku ku vaga ki ngiathingale si bulru muswane, kirarakeeta si kicawcakwane.

¹⁸ Alaiyasi dulrusu pikai ki kidremedreme pulringalringau, la kai telrai arakai, kwini yai mathaithariringa.

¹⁹ Ani savaeva ku kidremedreme satalu ki Tamatama amiaku muswane, lakamani ku malrali kilakikai vaga ki ngiathingale bulru muswane.

²⁰ Pasiakaiyaku muswane pacase kai taimatulrulane, ikai kwini yakai ku ngwakai ki lrigilane si sapasapukwanane ka vaga,

²¹ lri bulru muswane ka manemane ku patengane ka sabulrwane, pakai ku lu silapesu la dulru kidringai ku pacengecenge ku satubalreane, si tubalre kudra ki siakawlu pakatwase muswane ku umawmase.

(1)

²² Madha ngikamiamiane drikisi ki matiakukuru; ikai ki tasaibaibangane madha tusinalremelreme si drepete ki kadrwa ku paralubu ka umawmase.

²³ Ku Tamatama lri pusakai liniane kidrikisi kawriva; luka aneane ku twalisi ki niake lini, ku Tamatama lri mialri malra ku niake kwini ki umawmase.

(2)

²⁴ Madha sitalragilragi ki maupupungu kalilisi ka umawmase;

²⁵ amani lu twalralrawsu kudra malisi ka kakwakudhaneini, si kai maka ngitatupelanga.

(3)

²⁶ Madha siwmiwmi ku akiame ki palrapalra;

²⁷ alaiyasi kaisu maka mukiame, adravane kwi tapeapecanesu lri kimaalra kisalri ki umawmase.

(4)

²⁸ Ku tagisane ki cucungulane ku pagisane, kusu maadha velevelevele patanula.

(5)

²⁹ Wadrelengasu ku mageteme lu twatumane? Kwi lasu kai twapapapalra karededele ki kadrwa ku piapia ka laumawmase; kwi lasu amani ku lri acegecege ikai cucubungu ki talialalai si marasikaikai.