Kavagavagane 20 - Ngudradreadrekadhane Ka Sisiu 魯凱語聖經

¹ Kai malrupi ka bava pakasalrai ki umawmase; Kai makecenge ka bava pamama ki umawmase; ku takabusuukane ka umawmase yai makulrungu.

² Ku elathane ki talialalai, mia ki tagiringane ki raiyungu; ku pakagirimucu ki talialalai sia ngiakakabebetethenga.

³ Ku makulrungu ka umawmase pacebe ku rivwane; ku kiadaili ki akarivwane ku umawmase amani ku lrigu.

⁴ Ku masasalrai ka tarakawaungu kai wathingale pamamwa ku talredrelredrekane; luka kalakitalekanenga laka kadrwa ku malra ku manemane.

⁵ Kai takidremedremane ki umawmase mia ki acilai ki dralremedreme, luka ngiathiingale ka umawmase lri maalra.

⁶ Patengatenganaku ka akasalrwane ku amia ka umawmase takaalra, ai ku twakapatengatengane ka umawmase tapiya?

⁷ Ku madringelrese ka umawmase mwalecege ku kakwakudhaneini, ku agaganeini lri kaesai turamuru!

⁸ Ku talialalai wanene ikai ki tasaibaibangane ki taetale, si thingale patuelre ki ngialisiane.

⁹ Aneane ku lri dulru mabula kai kidremedremeli, kiasinawnga ku pasalrivaneli iya?

¹⁰ Ku arakaikai ku taidrusane ku tintingi si bungubungu, kavalracevace ki Tamatama.

¹¹ Patwalai madu ki kakwakudhane ki vavalake drele, luka mabula, luka mathariri ku takaumawmasane lutumane.

¹² Ku wadulru drele ka maca, ku wadulru kilalra ka calringa, ki kai taidrusane baai ki Tamatama.

¹³ Madha ka tapeecane, lasu kai matikuru; kisamula kaungu, lasu kabucuku.

¹⁴ Kai umawmase lu langai ku lamanemane, makucingalre taiyane kalisi; ai lu katwasenga, apapelaela lrigu maduai iya.

¹⁵ Ku twakapatengatengane lu kawriva, silrialribate ki kingi gingi si lasilu.

¹⁶ Ku pasiakai ki kaika thingaleini ka umawmase siwmi yai, makulrungulriinga, kwi lasu lri arakai ku laimaini tusadrepetane.

¹⁷ Ku nilrilrigilane malra ku akaneane mwakalrivili kalimeme, ai kaiyana tarathainu ku tangilribatane la adaenga suete ki ngudwi.

¹⁸ Ku nikikakane ku awngane lri tara ngimia; ku kaika nimadrekadrekasane ku apangimiane kikaruburu madha kikaruburuburu.

¹⁹ Ku pasasarau ku vaga, makucingalre sekete ku kaika apulatalatadrane ka vaga; ku savagathane, madha tutalragilragi.

²⁰ Ku wapusu kaelaela ki marudrawdrange ka umawmase, ku niakeini mia ki vaeva ka tinaki ka yakai ki kadradridrimitane kaedrepe.

²¹ Lu saramucungulu ku tacekecekelane, lukabilrilane kaika akaesadhanenga.

²² Madha ngikakamanimani paecebe bilri, mukalava ki Tamatama, lri kamani ku pwasakai muswane.

²³ Ku kai mamamwa ka tintingi, ku kaika patengane ka tintingi, kavalracevace ki Tamatama patuelre.

²⁴ Tamatama ka wakelrete ku tapudrapalane ki umawmase, aneane ku lri dulru ngithathingale ku kadalrananeini?

²⁵ Lulri papiasu ki Twaumase kiketekete tara apapelaelana kidremedreme, amani lu pakanabilrilisu ngitatasiwlriwlri.

²⁶ Ku malrigili mulecege ka talialalai lri pakatwase ki manganganga ka umawmase, si lri pakilringau pathavungu liniane.

²⁷ Ku mathariri ka kidremedreme ki umawmase tinaki ki Tamatama, paledra ki kidremedreme ki umawmase.

²⁸ Ku talialalai lu arakai ku sakialibake si twakapatengatengane rathudu, ku takatalialaladhaneini lri dulru kapapedrenge.

²⁹ Ku papidikane yai lrigu ki yacengecenge; ku udrase yai sakiwsakenane ki tarudrawdrange.

³⁰ Ku dula pakatwase ki ngangacane; Ku tangilribatane ki sakwalrialri amanilringa ku twapela ku apapiane ki tapanianiakane.