Kavagavagane 2 - Ngudradreadrekadhane Ka Sisiu 魯凱語聖經

Lamadru ki thingalane

¹ Lalakeli, kicawcakwana kai sabulrwaneli, madha karimurimuru kudra pelaelali muswane.

² Kilalra kwidra sabulrwane ki thingalane, la pulringalringau ku pacucuganeini.

³ Unu, kisilapa ki lrigilane; kitubia ku apulringalringavane ku kidremedreme.

⁴ Ka ngimiyaiya ki wasilasilape ku gingi ku culwane ku kidremedreme, mia ki wasilasilape ku tinukucingalrane ka zaisange ku kisamulane.

⁵ Luka ngimiyaiya kikai, lri pulringausu pukidremedreme ala ka manemane kudra mwasakene mukuludru ki Tamatama, si thingale ku apangimiane thingale ki Twaumase.

⁶ Asi lwiyane, amani ku Tamatama ku patarwamara ku thingalane, ku lrigilane si apulringalringavane twalai iniane.

⁷ Kwi lasu paralubu ki mwalecege ka umawmase, palakebe ki twakapatengatengane ka umawmase.

⁸ Kwi lasu paralubu ki aparamaramau ka umawmase, si palakebe ki twakapatengatengane ku kidremedreme iniane ku umawmase.

⁹ Alaiyasi kilalrasu pasalaladha nakwane, lri thingalesu ka manemane ku twakapatengatengane, aparamaramavane, mulecegane, la thingale lu lrika manemane ku apianesu.

¹⁰ Lri ka amaningasu ku ngiathingale ka umawmase, ku lrigilanesu lri pakiragai muswane.

¹¹ Ku tapwadailanesu drele lri palakebe muswane, ku pulringalringavanesu lri palakebe muswane,

¹² ku kaika apamamanesu twatumane, lai lri pakidaili muswane kudra ki ngwalai ki vaga si pacebe ku ngialisiane ka umawmase,

¹³ la kidaila kudra ki la wacilri ku patengane ka kadalranane, si yakai ki dradrimitane panianianiake,

¹⁴ madalame pia ku ngialisiane, arakai ku ngangacane kirararagai,

¹⁵ ngwakakai ki kai makalecege ka kadalranane, kaika amaka sudralrwalrwane ka umawmase.

¹⁶ Ku thingalane lri paralubu muswane dulru kiecebe ki kiasanu lrilrigili muswane ka malimeme ku vaga ka ababai.

¹⁷ Kikai ababai kaika mabula ikai ki taelrelreini, marimuru kudra tinumabulane ku takiketeketane ki taelrelreini.

¹⁸ Alaiyasi mwasu ki daaneini, mararaamau ki ngwakakai ki apacadhane ka kadalranane; ku kadalrananeini yai papia swadriadringi.

¹⁹ Sanaka wamwa ngulatatadre iniane ku umawmase kadrwa kuna tangeeanga ku siaulri kainganai, kadrwa ku umawmase ku maka siaulri mwa ki apanianiakane ka kadalranane.

²⁰ Lakamani, kusu twalralrava ki mathariri ka umawmase si mulecege ku tapanianiakane.

²¹ Ku lamwalecege tukapatengatengane ku kidremedreme ku umawmase lri sutelrai ikai kai ki kadaengane;

²² Ai ku Twaumase lri patwalai kai ki kadaengane mwalra ki manganganga ka umawmase, mia ki waakucu ki laubulu alra mwalra amudu ki pasalrisalriu ka umawmase!