Kavagavagane 19 - Ngudradreadrekadhane Ka Sisiu 魯凱語聖經

¹ Ku matiakukuru la muleecege, silrialribate ki matavuvulrucu si la kakulrungu.

² Ku pararake laka kadrwa ku thingale kaika atwalralravane; ku mararacange lu dadavace maduai pasakalisi ku tapudrapalane.

³ Yakai kai umawmase ku ngwalai ku kulrungane ku tatwatumanane si kabebetethe ku lrika angimianeini; ikai ki kidremedremeini la ngibaalrelringa kalisi ki Tamatama.

⁴ Ku la yakai ku paisu ka umawmase, taikaiyane ku bavane ka latalragilragi; ai ku matiakukuru ka umawmase, adravane ka sakwa ikaai ka kai tapia ka talragilragi mialri cilri iniane.

⁵ Ku wadraedrangelre siwmi, lri kai maka mubere ki akipathavungane; ku watavuvulrucu, lri tara kipathavungu.

⁶ Ku lamabelenge, kiavavangalre sanaka umawmase; ku matwabake, apiasitalragi iniane sanaka umawmase.

⁷ Ku matiakukuru ka umawmase adravane ka retesane kiakalrase si kicilri, ku talragilragi la aru kidaili; kwi lasu lu silape ki talragilragi, kadrwa ku amwane silape.

⁸ Ku kiapasilape ku lrigilane amani ku ngiakakilibake; ku ngiapapikai ku thingalane, kadrwa ku talikaiyane ku akaesadhane.

⁹ Ku madraedrangelre siwmi makucingalre mubere ki akipathavungane; ku watavuvulrucu lri tara kaamudu.

¹⁰ Ku makulrungu ka umawmase kai mamamwa lu ngikamiane si palribate ku tasikacane; ku duri kai swadalepe marasikai ruthuku ki tawki.

¹¹ Ku ngiathingale ka umawmase kai wacapange kalisi; ku kai waakeakeake ku tapasalrivane ki umawmase amani ku mathariri ku kakudhane.

¹² Kai talialalai lu kalisi mia ki raiyungu ka wagiringi; ku migemini mia ki udale ka mwalebe.

¹³ Ku makulrungu ka lalake yai amatikurwane ki tama; ku maririvu ka taelrelre ka ababai mia ki tudru kai idrengedrengere.

¹⁴ Kai umawmase patwalai ki marudrawdrange mucungulu ku daane si tacekecekelane; ku mwalecege ku taelrelre ka ababai yai patarumara ki Tamatama.

¹⁵ Ku masasalrai ka umawmase taapeecane awngu ku vai; ku kadrwa ku piapia ka umawmase lri tara kasilrau.

¹⁶ Ku paluludu ku hulrice ki Twaumase, lri kalragi ku niake; ku wabaebalre ku kadalranane ki Tamatama, lri tara kaamudu.

¹⁷ Ku pakubulu ki matiakukuru ka umawmase taingeane ka pakiasalru ku paisu ki Tamatama; ku tapianeini ku mathariri, ku Tamatama lri sawlri baai.

¹⁸ Saka lavavalakeana ku lalalake makakaiya bulru, ai madha pakilringalringau turamuru, amani lu amudu numi liniane.

¹⁹ Ku maupupungu kalilisi ka umawmase ani pakiwbilrili ku malisi ka madru; lu palribulusu iniane, lri tara pelanasu palribulu iniane.

²⁰ Kilalra pasalaladha ku sabulrwane, si kiragai kicawcakwane, lasu angiathingale ka umawmase.

²¹ Kai umawmase alau lri kakaalra ku kikake, ai kathane ku takidremedremane ki Tamatama ka lri ngimia.

²² Kai ravane matialrumale; kai matikurwane mathaithariri ki watavuvulrucu.

²³ Ku mwasakene mukuludru ki Tamatama, lri kisupisupilri ku akalragiane ku niake; si sutelrai cekecekele, lai kai kidaruru ki amatikurwane.

²⁴ Ku masasalrai ka umawmase wataale ku alrima malra ku akaneane, ai masaalrai pungududhane.

²⁵ Lrumadha ki ngiakalrilrigu ka umawmase, ku makulrungu ka umawmase lani kalrigili; kaelaela ki saawlrwane ka umawmase, lani tarumara ku thingalane.

²⁶ Ku walrumai ki tama, pakatwase ki tina, amani kudra wadawlu ku akiarubwanane ka lalake.

²⁷ Lalakeli, sana isadrasu ku akicawcakwanane, wacilrisu ku sabulrwane ki lrigilane, adravane ka thingalengaasu lri karimurusu.

²⁸ Ku ngialisiane ku siwmi siadrekase ki aparamaramavane; ku manganga ka umawmase mararau ki pasalrivane.

²⁹ Ku ngiakalrilrigu ka umawmase lri tara kipathavungu; ku makulrungu ka umawmase makucingalre mubere ki akilrumadhane.