Kavagavagane 18 - Ngudradreadrekadhane Ka Sisiu 魯凱語聖經

¹ Ku kai maka kiaelre ki umawmase ngiakakalikaalithi sikakathane; ku la nitupacengecengane ki umawmase, kwi lasu tara wabaebalre.

² Ku makulrungu ka umawmase kai madalame ki saawlrwane, madalame sikakathane ikai cucubungu ki umawmase ngikadhawdhawmu.

³ Ku ngangane si ngikalrilrigwane tarwadradrusadrusa; ku twasinalrelreme si kadrwa ku inwane la kai madadaidaili.

⁴ Ku vaga ki umawmase wadulru atacebeane ki thingalane, ku mwadringane mia ki laveke, ku alrivilrivane mia ki mwalwaludru ka acilai.

⁵ Ku pangialralraingi ki ngangane, kai madringelrese; ku twapasalrivane ki kai pasalriu, kai aparamaramau.

⁶ Lu avavaga ku makulrungu ka umawmase la pacebe ku rivwane; kwi lasu sana kawriva kialrumai.

⁷ Lu avavaga ku makulrungu ka umawmase ngiapapaturamuru; ku bibianeini alrubangenga iniane.

⁸ Kai cacapange ka vaga maru mwakalrivili kalimeme ka akaneane, sana pungudwi la makakaai lrelre.

⁹ Kai salradhane si mabebetethe mababitake.

¹⁰ Kai Tamatama maru amaninga kudra makecenge ka nikepalane, ku madringelrese ka umawmase walailai mudaane kipalakebe.

¹¹ Ku sapaiswane ku umawmase arakai ku tacekecekelane si raedre tukepale, lu kidremedreme abelenge la kakeecenge amia, ka lri dulru palakebe iniane.

¹² Ku ngiatatwalebe ka umawmase lri malra ku lrigu; ku ngiakalrilrigu ka umawmase ngiadadawlu ku akamudane.

¹³ Ku kai paswalana kilalalra la makanaswala tubalre, amani kudra makulrungu ka kadrwa ku inwane.

¹⁴ Ku nau tara panianiake amia ku takidremedremane, wadulru kiadili ki sakwalrialri ki caemane; ku twaramuru ku takidremedremane, twapapalra kawlrau ku sidramane.

¹⁵ Ku ngiathingale ka umawmase, ku kidremedreme akuli ki lrigilane; ku ngiathingale ka umawmase, kialalalra ku vaga ki ngiathingale.

¹⁶ Kai saceacebe ki umawmase mwaelebe ki apakadwadhane ka lrawlrawdru, waililuku iniane mwa kikawriva ki abelenge ka umawmase.

¹⁷ Ku paswala kawriva ku tangimiamiane, miakau pacengecenge, ai lu kela ku ecebeini, lri drele ku tangimiamiane.

¹⁸ Lu pangu kuzibiki lri paisadra kwini rivwane, lri dulru musuburu kwini tamadradrikidrikisane lini.

¹⁹ Ku kiaurami ka retesane, ku kecengane silrialribate ki makecenge ka kepale ka kaika adulrwane mucekele; ku rivurivwane mararamau ki sadrukudrukurane ki lrawlrawdru ki cekele.

²⁰ Sanaka taiyanesu tara yakaai ku angimiane; alau lri satalusu iniane panianiake.

²¹ Kwi vagasu lri dulru palakebe ki niakesu, lai lri mialri dulru muniake muswane; ku mavagathe, ku angimiane amanisu ka ngiamamalra.

²² Ku siataelrelre ki mwalecege ka ababai ku akaesadhane kadrwa ku lekete; athingalane ka Tamatama ku swabulrubulru.

²³ Ku la kitubi ki matiakukuru ka umawmase akwatiiki; ai ku la satubalreane ki satacekecekelane ka umawmase akwacaaeme.

²⁴ Ku wacapange sitalrailragi, wadawlu ku angilisiananeini; ai ku katalragiane walribate ki betakane ku makakilibakane.