Kavagavagane 15 - Ngudradreadrekadhane Ka Sisiu 魯凱語聖經

¹ Ku akwasulrapele lu tubalre payadrengere ki lisiane; ku akwatibelre ku vaga arwa pakagirimucu.

² Ku ngiathingale ku umawmase lu kawriva mwataluvaivai ku lrigilane; ku makulrungu ka umawmase lu avavaga kadrwa ku paluludane patuelre.

³ Ku maca ki Tamatama wadrele patuelre; Kai kakwakudhaneta ku mathariri ku malisi, maka wadrele patuelre.

⁴ Ku masulrapele ka vaga maru niake ka angatu; ku kikilrungane ku vaga pakasulri ki umawmase.

⁵ Ku makulrungu ka umawmase siadrekase ku sabulrwane ki tama; ku malrigili kidremedreme ka umawmase tarwamara ku sabulrwane ki tama.

⁶ Ku mwalecege ka umawmase ngiaradhekane ku tacekecekelane; ku tamuesadhane ki tangangangace ka umawmase yai amulisiananeini.

⁷ Ku ngiathingale ka umawmase wadulru putaluvaivai ku lrigilane; ku makulrungu ka umawmase kai wadulru.

⁸ Ku Tamatama kiaragai tarumara ku inulri ki madringelrese ka umawmase; malrase ku sapatarumarane ki tangangangace ka umawmase.

⁹ Ku Tamatama mavalracevace ku kadalranane ki tangangangace ka umawmase; madalame kudra ki la kiasilasilape ki dringelresane ka umawmase.

¹⁰ Ku kiauvagai ki dringelresane ku umawmase, lri kipathavungu; ku malrase kibulru, lri tara paacai.

¹¹ Kai swadriadringi kudra kai maka aseketane ki Tamatama; sikamanianenga aseketane iniane ku takidremedremane ki umawmase?

¹² Ku ngiakalrilrigu ka umawmase kai tarwamara ku sabulrwane; kwi lasu kai papiapia ki ngiathingale ka umawmase kibulru.

¹³ Ku kiarararagai ka umawmase taparangithane; ku watubitubi ku umawmase masumilringi ku lringau.

¹⁴ Ku saawlrwane ka umawmase marengerenge ki sapiathingale; ku makulrungu ka umawmase twakelretane ikai ki kadrwa ku thingale.

¹⁵ Ku kwalrialri ku kidremedreme ka umawmase makucingalre ngilribate ki vaivai; ai ku mathapware ka umawmase taikaiyane ku sakiaragai.

¹⁶ Maesaesai matikuru la musakene mukuludru ki Tamatama, walribate kudra ki satacekecekelane la kakaalra ku kwalrialri ku kidremedreme.

¹⁷ Ku wakanekane ku lalacenge sikakathane, la thingale makilibalibake, walribate kudra ki wakanekane ku labutulu, la makalililisi.

¹⁸ Ku maupupungu kalilisi, wadawlu ki rivwane; ku tarwamara si maka kiadili, walredreke ku rathudane.

¹⁹ Ku masasalrai ka umawmase, maru cecenekane ka angatu pasalraelre; ku mwalecege ka umawmase, kadrwa ku awpakaiyane.

²⁰ Ku ngiathingale ka lalake pakiaragai sasa ki tamaini; ku makulrungu ka lalake siadrekase ki tinaini.

²¹ Ku kadrwa ku thingale ka umawmase arakai ku kulrungane tuperavane; ku ngiathingale ka umawmase singiakai ki mwalecege kaungu.

²² Ku singiakai ki la mathariri ka gathimi ki laumawmase, ku akaungane lri tara ngimia; ku kaika nikikakane madrekadrekase lri tara sipai.

²³ Lu avavaga si mutakidremedremane matiakiragai turamuru; lu kawriva si mutakakekelretane mathariri turamuru.

²⁴ Ku ngiathingale ka umawmase matwase ngukakai ki kadalranane ki niake, kiadaili ki atuvereverane mwa ki kadalranane swadriadringi.

²⁵ Ku Tamatama lri buruku ku daane ki ngiakalrilrigu ka umawmase; lri palakebe ku tacekecekelane ki walibakane.

²⁶ Ku Tamatama mavalracevace ku langialisiane ku takidremedremane; tarwamara ku mabula ku vaga.

²⁷ Ku marau ku kai madringelrese ku tacekecekelane, mabebetethe ki daaneini; ku watelenge ki pavangalre, lri kalragi ku niake.

²⁸ Ku mwalecege ka umawmase kiadremedremeana ala tubalre; ku tangangangace ka umawmase ngialisiane ku taavavagane la dawlu ku amatikurwane.

²⁹ Ku Tamatama kialalra ku inulri ki mwalecege ka umawmase; Kai wathengete ki tangangangace ka umawmase.

³⁰ Ku mwalrakalrakai ku takalringalringavane pakiaragai ki umawmase; ku peaelaela ku mathariri ka vaga pakathariri pakiragai ki umawmase.

³¹ Ku kiararakete kilalra lri tarumara ku sabulrwane ki niake, lri tara kielre ki ngiathingale ka laumawmase.

³² Ku malrase ki sabulrwane maru ngiata tudreadrekase; ku kialalra paluludu ku sapasapukwanane yai amani ku wamalra ku thingalane.

³³ Ku mwasakene mukuludru ki Tamatama maru kiabulrunga ki thingalane; lu lri malra ku lrigu, lri tara paswalana kicawcakwane ngitatwalebe.