Kavagavagane 14 - Ngudradreadrekadhane Ka Sisiu 魯凱語聖經

¹ Ku mwalecege kalrigili ku ababai wacegecege ku tacekecekelane; ku makulrungu ka ababai ngiakakamani suburu ki tacekecekelane.

² Ku mwalecege ku kakwakudhane ka umawmase mwasakene mukuludru ki Tamatama; ku apapiyaiya ku kakwakudhane ka umawmase twadrekase ki Tamatama.

³ Ku makulrungu ka umawmase ngwalai ki ngikalrilrigwane si kai icelrecelrebe ku vaga, lri kipathavungu; ku ngiathingale ka umawmase arakai ku vaga ngipapalakebe.

⁴ Luka kadrwa ku lalwange ku pavilringi, lri twalainu kainganai ku taleke; lu ikai ku lalwange ku pavilringi, wadrima aru kakalra ku taleke.

⁵ Ku matiadralru ku wasiwmi ka umawmase patengatengane ku la takawrivane; ku kaika patengane ku wasiwmi ka umawmase watavuvuvulrucu lu kawriva.

⁶ Ku ngiakarakacane ngikalrilrigu ka umawmase kai lri maka malra ku thingalane; ku langiathingale ku umawmase maduai kisilape ku lrigilane.

⁷ Kidaila ki makulrungu ka umawmase, asi lwiyane kadrwa ku abulrwane lini ku lrigilane.

⁸ Ku saawlrwane ki ngiathingale ka umawmase wathingale ku angukakaiyane ku kadalranane; ku kulrungane ki makukulrungu ka umawmase malrigilaku taiyaane ngitatavuvuvulrucu.

⁹ Ku makulrungu ka umawmase lu pasalriu kai mwabangalre ngitatupela; ku mwalecege ka umawmase kiasilape ku lrika amapaceacepane.

¹⁰ Ku kwalrialri ki kidremedreme, kai lri maka kivala ku palrapalra; ku kiragaragai ki kidremedreme, kai lri maka kisupilri ku palrapalra.

¹¹ Ku daane ki tangangangace ka umawmase lri tara mukadrulu kasuburu; ku daane ki mwalecege ka umawmase lri tara acegecege kapapedrenge.

¹² Yakai ku kadalranane lu drelane madringeelrese, ala ka papia ki apacadhane ka kadalranane.

¹³ Kai peravane alau lri mialri ka akwalriane ki kidremedreme; Kai peravane sana ngilribate, ku adirivanane alau lri mialri ka sakamiyana.

¹⁴ Ku manganga ka umawmase lri pakiwbilrili ku malisi ka madru; ku mathariri ku kakwakudhane ka umawmase lri pakiwbilrili ku mathariri ka madru.

¹⁵ Ku kadrwa ku thingale ka umawmase kiapawtenga sanaka vaga; ku saawlrwane ka umawmase wadradrele kipapawlringau sanaka manemane.

¹⁶ Ku ngiathingale ka umawmase mwabere ki amatikurwane; ku makulrungu ka umawmase ngiasasingikaai ngitatu pacengecenge.

¹⁷ Ku maduai kalisi ka umawmase, makulrungu ku tatwatumanane; ku matavuvulrucu, kiakagirimucu ki umawmase.

¹⁸ Ku kadrwa ku thingale ka umawmase pakiwbilrili ku madru ki kulrungane lini; ku ngiathingale ka umawmase siapagamucu ku lrigilane.

¹⁹ Ku tangangangace ka umawmase yakai cucubungu ki mathariri ka umawmase guruthungane; ku manganga ka umawmase yakai ki lrawlrawdru ki mwalecege ka umawmase kitubitubi.

²⁰ Ku matiakukuru ka umawmase adravane ka pasiagiagisi mavalracevace iniane; ku yakai ku paisu ka umawmase swaete ku latalragilragi.

²¹ Ku makalithi ki matiakukuru yakai ku akaesadhane; ku siadrekase ki pasiagiagisi yakai ku pasalrivane.

²² Ku paiya ku mathariri, kiatukucingalre kiusakene; ku paiya ku ngialisiane, papia ki amuli ka kadalranane.

²³ Ku kiasamula kaungu, kai mathekelre ku acekecekelane; ku yalaelangane ki vaivaivaai, lri tara matikuru.

²⁴ Ku ngiathingale ka umawmase siapagamucu ku akaesadhane; ku makulrungu ka umawmase arakai ku kadrwa ku thingalane ngikalrilrigu.

²⁵ Ku patengane lu siwmi, palribulu ku niake ki umawmase; ku kawariva ku draedrangelrane, pakadula ki umawmase.

²⁶ Ku mwasakene mukuludru ki Tamatama yakai ku tasatalwane; ku wacekecekeleini la mialri kasulivalivate kapapedrenge.

²⁷ Ku mwasakene mukuludru ki Tamatama yai tacebeane ki niake; lri dulru pakidaili ki umawmase ki matiamukuludru ka apacadhane.

²⁸ Ku lrigu ki talialalai yakai ki tatakalrane ki mapapangale; luka kadrwa ku mapapangale, kwi lasu lri kakadrua ku namanemanenga.

²⁹ Ku kaimaupupungu kalilisi amani ku saawlrwane ka umawmase; ku maupupungu kalilisi ka umawmase yai mwataluvaivai ku kulrungane.

³⁰ Kai isaselebane twathariri ki kinawmasane; kai pathalrane yai gange ki culrale.

³¹ Ku twasinalreme dredrepete ki lamatiakukuru ka umawmase amani ku twasinalrelreme ki wabekace iniane ka Tamatama; ku makalithi ki matiakukuru ka umawmase, amani ku mwasakene ki Tamatama.

³² Ku ngikarakacanane ki tangangangace ka umawmase pakamudu iniane; ku mwalecege ka umawmase ikai ki naika apacadhane, lri kipalakebe.

³³ Ku takidremedremane ki ngiathingale ka umawmase yakai ku thingalane; ku makulrungu ka umawmase laka kadrwa ku thingale kuna vaevanga.

³⁴ Ku dringelresane pangiaradhekane ki lakuni; ku pasalrivane yai kiarubwanane ki laminzuku.

³⁵ Ku ngiathingale ku latabebelenge ka sasiakawlu kiadrengedrengere ki latalialalai; ku kai pangiamia ku awngane ku tabebelenge ka sasiakawlu lri kipathavungu.