Kavagavagane 12 - Ngudradreadrekadhane Ka Sisiu 魯凱語聖經

¹ Ku madalame ki lrigilane ka umawmase kiaragai kibulru; kathane kudra makulrungu ka umawmase ka magirimucu kipasapukwane.

² Ku Tamatama lri baai ku akaesadhane ki mathariri ka umawmase; pathavungu ki matavuvulrucu ka umawmase.

³ Ku paiya ku ngialisiane kai lri maka dulru pakasulivate ki umawmase; ku madringelrese ka umawmase mapapedrenge acegecege kai lrudralrudralrudrai.

⁴ Ku makalecege ku taelrelre ka ababai amani ku pagamucu ki taelrelre ka sawvalai; ku kadrwa ku inwane ka taelrelre ka ababai maru dukunga ka batekale ikai ki culrale ki taelrelre ka sawvalai.

⁵ Ku mwalecege ka umawmase arakai ku aparamaramavane marasikai ki palrapalra; ku mangangace ka umawmase kiadredredreme ku atavuvulrucane sikakathane.

⁶ Ku vaga ki tangangangace ka umawmase wadulru papacai ki umawmase; ku vaga ki madringelrese ka umawmase wadulru palribulu ki umawmase.

⁷ Ku tangangangace ka umawmase amatiakuru, kai maka pacungulu ku lagagane; ku tacekecekelane ki madringelrese ka umawmase pacungulu ikai palralrawthane.

⁸ Ku saawlrwane ka umawmase lri kidrengedrengere; ku makulrungu ka umawmase lri tara kisidreekase.

⁹ Ku kiasidrekase ka langumawmawmase, la ikai ku sasiakawluini, silrialribate kudra ki ngiatatwabelebelenge ngiatatwadradrau la kasilrasilrau ka umawmase.

¹⁰ Ku mwalecege ka umawmase kialibake ki lawaudriwdripi; ku tangangangace ka umawmase mabebetethe ki lanilapulapwane.

¹¹ Ku magusulu ki awngane ka tarakawaungu kai maurame ku akaneane; ku kiasilasilape ku kaika patengane ka umawmase kadrwa ku miyaiya ku kulrungane.

¹² Ku tangangangace ka umawmase marau ku pana ki mangangace ka umawmase; ku balace ki mwalecege ka umawmase pwamadru ku mathariri ku madru.

¹³ Ku tangangangace ka umawmase mwacilri mwa ki lrubange ka vagatheini; ku mwalecege ka umawmase lri tara kasulivate kalrabuthu ki amatikurwane.

¹⁴ Kai umawmase twalai ki vaga si kakwakudhaneini malra ku pakalreva; kwi lasu lri malra ku naika amalraneini ku sapawlrawlravane.

¹⁵ Kai makulrungu ka umawmase tapacengecengane lu kidremedreme; ku ngiathingale ka umawmase kialalra ku sapasapukwanane.

¹⁶ Kai makulrungu ka umawmase sana kalisi, makakai paathingalane; ku malrilrigili kidremedreme ka umawmase wadulru kiadili kitusinalreme.

¹⁷ Ku patengatengane kawriva, athingalane ku aparamaramavane; ku watavuvulrucu siwmi, pakadula ki kadrwa ku pasalrivane.

¹⁸ Ku kai kiapapawlringalringau lu kawriva mararamau ki marangisi ka dramu ka wadula ki umawmase; ku ngiathingale kawriva mia ki sasulravane pawdringai ki umawmase.

¹⁹ Ku matavuvulrucu ka lridame lri makakaai kamudu; ku twakapatengatengane ka bibiane lri ikai apalralrawthu.

²⁰ Ku kiadredredreme ku ngialisiane, pia kidremedreme ku atavuvulrucane; ku padrumudrumulru ku akarathudane, swaete ku sakiararagai.

²¹ Ku mwalecege ka umawmase lri kasulivalivate ki la atumaananenga; ku tangangangace ka umawmase lri kai reteretege ki amatikurwane.

²² Ku watavuvulrucu ku ngudwi, ku Tamatama magirimucu; ku pangiamia ku takiketeketane, lri kidrengedrengere.

²³ Ku saawlrwane ka umawmase kai paathingalane ku lrigilane; ai ku makukulrungu ka umawmase athingalane ku kulrungane.

²⁴ Ku alrima ki kiasamula lri tara gemegeme ku puku; ku masasalrai ka umawmase lri kipakaungu kwalri.

²⁵ Ku thekelrane parwa ngikurwane ki umawmase; ku mathariri ka vaga pakagarange ki umawmase.

²⁶ Ku madringelrese ka umawmase amani ku mathariri ka sinsi ka talrailragi ki lapasiagiagisi; ku tangangangace ka umawmase papia ki amuliane.

²⁷ Ku masasalrai ka umawmase kailri akame ku panaini; ku kiasamula ka umawmase la kakaalra ku tacekecekelane.

²⁸ Ikai ki dringelresane ka kadalranane yakai ku niake; ikai kwini ki kadalranane kadrwa ku apacadhane.