Kavagavagane 11 - Ngudradreadrekadhane Ka Sisiu 魯凱語聖經

¹ Ku Tamatama mavalracevace ki kai pangiamia ka tintingi; madalame ku niaparamaramavane ku tintingi.

² Ku ngiakalrilrigu ka umawmase twapapapalra iniane ku akiarubwanane; ku ngiasasangate ka umawmase twapapapalra ku thingalane iniane.

³ Ku mwalecege ka umawmase yakai ku kapatengatenganane ararake; ku matavuvulrucu ka umawmase ngwalai ki kaika patengatengane si ngipapakamwamudu.

⁴ Lu kelanga ku apacadhane, ku akaesadhane manemaneana ku paluludane; kathane ku dringelresane ku lri dulru palribulu ki niake ki umawmase.

⁵ Ku kapatengatenganane lri pangukakai ki masadrarate ka kadalranane ki mwalecege ka umawmase; ku tangangangace ka umawmase ngiapapakamwamudu.

⁶ Ku dringelresane paralubu ki twakapatengatengane ku kidremedreme ka umawmase; ku matavuvulrucu ka umawmase mwalrubangane mwa ki ravaneini.

⁷ Ku tangangangace ka umawmase sana pacai, ku sidramadramaini maulrawnga; ku satalutalu ki paisu cekecekele lu alikainga lri tara kawlrau.

⁸ Ku madringelrese ka umawmase lri dulru kalrabuthu ki amatikurwane; ai ku manganga ka umawmase lri matikuru kamani.

⁹ Ku kai mwasakene ka umawmase ara vaga pangilisiane ki pasiagiagisi; ku lrigilane ki madringelrese ka umawmase wadulru paralubu ki palrapalra.

¹⁰ Ku mwalecege ka umawmase ngiaradhekane, ku kinauacekelane la kiraragai; ku tangangangace ka umawmase lu pacai, ku mapapangale la putariri.

¹¹ Ku cekele ngwalai ku taikaiyane ki madringelrese ka umawmase si ngiradhekane; ku lacekele ngwalai ku taavavagane ki tangangangace ka umawmase si mukadrulu.

¹² Ku mwalralrakai ki pasiagiagisi ku umawmase kadrwa ku tadrelane; ku ngiathingale ka umawmase yasaseleseleebane.

¹³ Ku madalame kawriariva capange ka umawmase pwataluvaivai ku akibubuliane ku vaga, ku twakapatengatengane ka umawmase maka kiasudralru.

¹⁴ Lu kakadrwa ku tarasangililuku, ku kuni lri tara turamuru; lu takalra ku taradrekase, ku kuni masulivate.

¹⁵ Ku wasiwmi ki kaika thingaleini ka umawmase, lri tara asipunu; ku kiadaili si kai kiparaisi, lri kasulivate ka kadrwa ku akatumanane.

¹⁶ Ku mapapedrenge ku ababai kiamusakene ki umawmase; ku kai mwalecege ku ababai ngiadadawlu ku akiarubwanane. Ku masasalrai ku umawmase matiakuru turamuru ka kadrwa ku namaneemanenga; ku magarange si sakiadilane ku umawmase amani ku maesaesai satacekecekelane.

¹⁷ Ku kialibake ku umawmase ngiatatuthariri, ku ngiakarakacane ka umawmase mabebetethe ki kinawmasaneini.

¹⁸ Ku tangangangace ka umawmase lri avuthane ku kwalrini; ku mwalecege ka umawmase lri tara maalra ku pakalreva.

¹⁹ Ku malrithethe pia ku mathariri ku awngane, lri tara malra ku niake; ku nau kanganga amia, wadawlu ki apacadhane.

²⁰ Ku tangangangace ku kidremedreme, magirimucu ku Tamatama; ku mwalecege ka umawmase, kiakiraragai iniane.

²¹ Ku tangangangace ku umawmase makucingalre mubere ki akipathavungane; ku mwalecege ka umawmase tara kiaparaalubu.

²² Ku mathariri laka kadrwa ku tadrelane ka ababai maru ngungwanenga ki beke ka sialridingi ku kingi.

²³ Ku nau pia kwini iyaiya ki mwalecege ka umawmase pwamadru ku mathariri ka madru; ku sidramadrama ki tangangangace ka umawmase pakagirimucu ki mapapangale.

²⁴ Ku matwababake ka kadrwa ku kekeane, arwa kaesaesai luka kaiyaiya; ku magethelrale ka kadrwa ku babaai, arwa kwalrilringa si matikuru.

²⁵ Ku matwababake ka kadrwa ku kekeane, arwa ngiradhekane; ku paralubu ki umawmase, lri muesai kamani.

²⁶ Ku warubu ku taleke si kai kilangai, lri kipusu; ku kiaragai kilangai ku taleke, kialrigu ki sanaka umawmase.

²⁷ Ku pakaelre ku puku pia ku mathariri ka awngane, lri tara maalra ku kinalavwavuthane ku akaesadhane; ku wasilape ki ngialisiane, wakela ku amatikurwane.

²⁸ Ku satalu ki akaesadhane, lri mia ki kalalidrarane mururu ku vasau; ku madringelrese ku umawmase ngiaesadhane, mia ki kaladralrangedrangane kasaleese ku vasau.

²⁹ Ku mailuku ku matikurwane mudaane ki lrawlrawdru, lri tara akaelre ku tacekecekelane; ku makulrungu ku umawmase lri tara asasiakaulu ki ngiathingale ka umawmase.

³⁰ Ku madringelrese ka umawmase ku madruini amani ku niake ka angatu; ku ngiathingale ka umawmase lri kikadalame si kitupapalra ki umawmase.

³¹ Ku mwalecege ka umawmase ikai kawmasane kiauramiana kibilri, sikamanianenga ku tangangangace ka umawmase si pasalrisalriu ka umawmase!