Kavagavagane 1 - Ngudradreadrekadhane Ka Sisiu 魯凱語聖經

Tinukucingaalrane ka kavagavagane

¹ Kavagavagane ki lalake ki Davidi, ka talialalai ki swa Iseraylri ka Sulumungu.

² Kikai kavagavagane lri pathingale ki laumawmase ki lrigilane si sabulrwane, si pulringalringau ki kavagavagane ku matiasamali ku paluludane.

³ Lri bulru ki laumawmase ku apangimiane si thingale cekecekele, ku apangimiane kapatengatengane, aparamaramau, mwalecege ku takaumawmasane.

⁴ Ki lakikwini lri pakalrigili ki kadrwa ku thingale ka umawmase, lai lri bulru ki yacengecenge ku amulecegane lu twatumane.

⁵ Kilakikai kavagavagane lai dulru aru paadili ku thingalane ki malrigili ka umawmase, la kibulru ku ngiathingale ku umawmase,

⁶ si thingale ku tapapiane pathalrilriku ki kavagavagane, si takivagane ki malrigili ka umawmase.

Pakiapapawlringau ki layacengecenge

⁷ Ku mwasakene mukuludru ki Tamatama yai sapathagili ki lrigilane. Ku makulrungu ka umawmase siadrekase ki thingalane, la kai mubangalre kicawcakwane.

⁸ Lalakeli, kilalra si paluludu ku sabulrwane ki tamasu, madha karimurimuru ku bulru ki tinasu.

⁹ Kwi bulru lini lri lapu ki takaumawmasanesu, mia ki vaeva ka pagamucu, ka lri aru tuthariri muswane, mia ki vaeva ka silu.

¹⁰ Lalakeli, alaiyasi ikai ku la manganga ka umawmase ku wakela si lrilrigili muswane, madha tupapapalra liniane.

¹¹ Alaiyasi iya kai kwi lalasu, “Bwala, takatwase si papacai ki umawmase, tasilape ku kadrwa ku capili ka umawmase si lrumai, tusakivavangane.

¹² Tamia ki swadriadringi malra liniane patakunianiake lrungulrungu, patubakebake ki umawmase pwa ki valrulrange.

¹³ Lri malrata ku la makaelaela ku lawbubulu, si pasueete ki daane ku niribicane ku lamanemane!

¹⁴ Takarededele pia kikai, la tamavalavala makanaelre ku nikupane ku lawbubulu!”

¹⁵ Lalakeli, madha tupapapalra ki la miyaiya kai ku umawmase, kiadaili madu mubere liniane.

¹⁶ Kwi lalasu maraacange ku apiane ku ngialisiane, kiasanu papacapaacai ki umawmase kai pususu.

¹⁷ Ku adhadhame lu pulringalringau nau pwalra tharamete lu iyasu kadrwa ku paluludane;

¹⁸ ai ku manganga ku umawmase ngiapapasikaikai paipai ku lravathe, lri ngikakamani ngipapapacai.

¹⁹ Ku waravase kupa ku umawmase amaanilringa ka wapacai; si ku satalutalu panianiake ki akupane ka umawmase ku akipadradresengane lini ngimiyaiya kikai.

Takawrivane ki thingalane

²⁰ Kilalraa, ku thingalane yakai ki lakadalranane si tairuburubwane ki cekele tawtawtau kawrivariva,

²¹ yakai thili ki lrawlrawdru ki cekele si tasueteane ki laumawmase akwadradrau tawtawtau:

²² “Makulrungu ka laumawmase, kai takakulrungane numi lri pakela lwigane? Kai tudrekadrekase numi ki lrigilane lri pakela lwigane? Kai numi maka pualringalringau?

²³ Kilalra kai pakipapawlringawli; lri bulrwaku numiane, kudra pulringauli lri pelaelaku numiane.

²⁴ Watawtawtavaku, la kai numi kilalra; wadawlaku numiane, la kai numi thengete.

²⁵ Twadrekase numi ku tapakipapawlringavaneli numiane patueelre, kainu mwabangalre lu tupelaku numiane.

^26-27 Ngwalai kikai, lu kelanga ku amatikurwane numi, lri mulralrakadhaku; lu kipadradresenge numi ku matikurwane, ku matiaukuludru lu mia ki valrigi kela sititi numiane, si mailuku numiane ku amatikurwane, la tubinga numi kwalrialri, lri tumwamelracaku numiane.

²⁸ Lukamaninga kwidra, lri kitubi numi nakwane, lri kainaku thethengete lutuumane; lu silape numi nakwane, lri kai numi maka kidringai lutuumane.

²⁹ Takalraasane numi ki lrigilane, si kai musakene mukuludru ki Tamatama.

³⁰ Kadruana ku tatukucingalrane numi ku tapakipapawlringavaneli, si sidreadrekase ku takaelaelaneli.

³¹ Lakamani, lri kikabebetethe numi matikuru, pakiwbilrili ki kakwakudhaane numi.

³² Ku kadrwa ku thingale ku umawmase lri ngwalai ku takalrasane ki thingalane si pacai; ku makulrungu ku umawmase lri ngwalai ku tangilralrailrailrainganeini si kamudu.

³³ Ai kudra la kialalra pasalaladha nakwane ku umawmase lri tara kasulivalivate; kwi lasu lri kisupisupilri ku sulivatane, kai lri mukuludru ki sapapacai.”