Izikile 9 - Ngudradreadrekadhane Ka Sisiu 魯凱語聖經

Kiapathavungu kai swa Yerusalrime

¹ Sakabilrilinga, kialalraku ku Twaumase akwaadrau kawriva, “Kunumi ka kiasikawlu kainganai pathavungu kai ki cekele ka umawmase, iluka kwi adreme numi si kainganai!”

² La makakaai ikai ku taeneme ku umawmase ku mailuku ku adreme twalai tali dradha ki lrawlrawdru ki tali latadre kalatadrane ki daane ki Twaumase kainganai, ikai kwini ku tangeea sialaimai ku lalasare ka kaimadhane si iluku ku sapacapacasane. Kwi lalasu wakeela makanaelre, si acegecege ikai thili ki lriwlu ka tapatarumaramarane.

³ Ku lrigu ki Twaumase ki Iseraylri matwase ki Kirubime, talwaela musamamudaane ki daane ki Twaumase; kikai lrigu nayadrengere ikai belenge ki Kirubime. Ku Tamatama la tawtau dawlu kwini ki sialaimai ku lalasare ka kaimadhane, si pelaela iniane,

⁴ “Lu katwasa, dadavace salraelre kai Yerusalrime, lu kipadradresengesu ku ngwalai ku tangimiane ki la ngialisiane ikai kai ki cekele si kwalrialri dadange ku umawmase, patuthingala pikai ki punu lini makanaelre.”

⁵ La kilaalranga naku ki Twaumase papia ki drumane ki umawmase iya kai, “Kunumi ilrilrikudra kabibilrili iniane, dadavace salraelre ki cekele, la pwalrima papacai, madha pakatwatwase sanaka umawmasenga, madha kakalikalithi.

⁶ Adravane ka tarudrawdrange, langukathathabarane, ka ngiatawvaileleketenga, ka latina, ka lrulai, papacadha patuelre; ai madha papacapacai kudra ki la yakai ku sapatuthingalane ikai ki punu ku umawmase. Kaiasasane twaladha kikai, twaladha ki Alrivilrivi ka taikaikaiyaneli paswala pwalrima!” Kwi lalasu la pwalrima papacai kudra ki acegecege ikai ki daane ki Twaumase ka laciwru.

⁷ Ku Twaumase amia kai liniane, “Malra kwini kinawmasane ki wapacai si abate pasuete pikai kalatadrane ki daane ki Twaumase, kudrulra ki daane ki Twaumase! Kaiasasane pathagilanga pwalrima!” Kwi lalasu la pathagili ikai ki cekele papacai ki umawmase.

⁸ Kwi lalasu sa ikai ki cekele papacapacai ki umawmase, tangeangeea ku asuru ikai ki daane ki Twaumase. Waguruthunganaku ikai cakena si akwadrau, “Abebeelengenga ka Tamatama, tengatengaanesu kalri papia Yerusalrime gugu pakaelre ku lisiane, la amudu kai ki sakathathaananenga ka umawmase ki swa Iseraylri?”

⁹ Ku Twaumase la tubalre, “Ku pasalrivane ki swa Iseraylri si swa Yuda wadarurunga belenge. Kai kuni palraelre yakai kidruanga ku mapapacapacapacai; kai Yerusalrime swaete kwi lanivuthane tupasalrivane. Kwi lalasu amia kai, kwaku ka Tamatama wacilringa naku ki kuni lini, si kai sirapalenga liniane.

¹⁰ Ai lutumane kainaku lri pacepe liniane, kainaku lri kakalithi liniane. Ku tatungimiyaiyane lini ki palrapalra, lri tungimiyaiyaku liniane.”

¹¹ Sakabilrilinga, kudra sialaimai ku lalasare ka kaimadhane wailuku ku sapacapacasane kainganai, si papia ki Tamatama pelaela, “Pangiamianga naku ku drekasesu si tulrepenge ku awngane!”