Izikile 8 - Ngudradreadrekadhane Ka Sisiu 魯凱語聖經

Sakadrusa ka maburusi ka drele ki Izikile (8.1–10.22) Ku tasukusukubane ki samiamiange ki cekele Yerusalrime

¹ Saka taraeneme ka caili ku taacaicaliane nai, ka sakaeneme ka dramare ki samaka lrimale ka vai, ku twalai Yuda kainganai acaicali ka laciwru wakela ki daaneli drele nakwane. Ku puku ki abebeelengenga ka Tamatama la kirimu mulebe mwa nakwane.

² Papwabebelengaku drele, la drele ku tangeea ku mia ki umawmase ku tangimiane; ku kinawmasaneini twalai ki takilrisaisane papulelebe mia ki apwi, twalai ki takilrisaisane papubebelenge mia ki niselredrane ka lriwlu likalikathe.

³ Kwi lasu la sege ku vaeva ku mia ki alrima, si taisiu nakwane. Pacungulu, ikai ki maburusi, ku Ri ki Twaumase la alra nakwane pwa ka belenge, si ililuku nakwane mwa ka Yerusalrime. Kwi lasu waililuku nakwane mwa ki daane ki Twaumase tali dradha ki lrawlrawdru tali daane kalatadrane ki samamudaane. Ikai kwini yakai ku vaeva ku wagirimucu ki Twaumase ku samiamiange.

⁴ Ikai kwini, wadrelaku ku lrigu ki Twaumase ki swa Iseraylri, mararaamau ku dreleli sa ikaiyaku babiabila vaalru Kibare.

⁵ Ku Twaumase amia kai nakwane, “Lri tara kawlrau ka umawmase, papia tali dradha drele!” La papiaku tali dradha drele, ikai ki ruka samamudaane thili ki tapatarumaramarane, yakai ku vaeva ku wagirimucu ki Twaumase ka samiamiange.

⁶ Ku Twaumase amia kai nakwane, “Lri tara kawlrau ka umawmase, wadrelesu liniane lu tumatumane? Drela, kai swa Iseraylri yakai kai piapia kai matilralrase, wavutha nakwane pakatwase ki Alrivilrivi ka taikaikaiyaneli, Ai lri dreleananasu ku ngililisiane kikai.”

⁷ Kwi lasu waililuku nakwane mwa ki salalatadre ka kalatadrane ki samamudaane, ku lrika adrelaneli ku vaeva ku lulutu ka balingibingi.

⁸ Ku Twaumase amia kai, “Lri tara kawlrau ka umawmase, lri ikaisu kai ki balingibingi panguadrau lutu.” La lutaku panguadrau, si drele ku vaeva ku lrawlrawdru.

⁹ Ku Twaumase peaelaela nakwane, “Mudaana, la dredrele kwi taikaiyane lini kwini piapia lini kwi ngialisiane, ka matiagirimucu.”

¹⁰ La katwasaku mudaane si drele. Wadrelaku ki balingibingi swaete ku tinuswasulravane si drumane ka kaika mabula ka lawaudriwdripi, la ikaiyana kudra sukusukubu ki swa Iseraylri ka samiamiange.

¹¹ Ta mapitulu ku laciwru ki swa Iseraylri ku yakai kwini, paelre ki Yazania ka lalake ki Sapange. Ku tangeea waecenge ku tapikaikaiyane patuebelre, la tuebebebelre ku sangwalreme.

¹² Ku Twaumase amia kai nakwane, “Lri tara kawlrau ka umawmase, wadrelesu ki laciwru ki swa Iseraylri luka manemane ku piapia lini kibububuli? Kwi lalasu wasukusukubu ikai ki swaeete ku samiamiange. Kwi lalasu la patalunga iya kai, ‘Ku Tamatama kai wadrele naiane; wacilringa kikai.’ ”

¹³ Pacungulu, ku Tamatama amia kai nakwane, “Lri drelesu liniane ku pia lini ku silrialribate ku ngilisianane kikai.”

¹⁴ Ala ililuku nakwane mwa tali dradha ki daane ki Tamatama, ku lrika adrelaneli ku takaalra ku labaibai; kwi lalisu watubitubi ku tapacadhane ki twaumase ka Tamuze.

¹⁵ Ku Tamatama amia kai, “Lri tara kawlrau ka umawmase, wadrelesu kilakikai? Lri drelesu ku mapaarawramuru ku ngilisianane kikai.”

¹⁶ Ala ililuku nakwane mwa tali daane kalatadrane ki daane ki Tamatama. Ikai ki daane ki Tamatama ki samamudaane ki tali daane kalatadrane, ikai kabicelrakane ki tapatarumaramarane si ruka, lri ikaai kau ta 25 ku umawmase, walrilrikudru ki tali daane kalatadrane, si cubungu talrawane, wasukusukubu ki walrawlrau ka vai.

¹⁷ Ku Tamatama amia kai nakwane, “Lri tara kawlrau ka umawmase, wadrelesu kilakikai? Drela, kikai la swa Yuda paiya kai ngilisiane turamuru, ikai ki kuni palraelre yakai kidruanga malrumalrumalrumai, la kaina ngulwadhane, wamwana ki daaneli pia kikai ngialisiane pakagirimucu nakwane. Drela, kai lalasu arakai ku kadrwa ku usakenane tusinalreme nakwane.

¹⁸ Lakamani, lri papiaku liniane gugu kai girimucaneli. Kainaku lri pacepe liniane, lai kainaku lri kakalithi liniane. Kai lalasu adravane akwadrau karaleale, papia nakwane kitubi, kainaku lri kilalra.”