Izikile 7 - Ngudradreadrekadhane Ka Sisiu 魯凱語聖經

Wadethenga ku alikaiyane ki swa Iseraylri

¹ Ku Tamatama papia nakwane kawriva; kwi lasu amia kai,

² “Lri tara kawlrau ka umawmase, kikai yai vagali ka abebeelengenga ka Tamatama papia ki swa Iseraylri: Kiasalrunga kai swa Iseraylri, wadethenga ku apalikaiyane palraelre!

³ “Iseraylri, ku alikaiyanesu wakelanga. Lri papiaku muswane gugu kai lisianeli. Lri ngwaladhaku ku tapianesu si saibange muswane; lri ngwaladhaku ku tapianesu ku matiavalracevace si pathavungu muswane.

⁴ Kainaku lri pacepe muswane, lai kainaku kakalithi muswane. Lri ngwaladhaku ku tapianesu ku ngialisiane turamuru si pathavungu muswane. Luka ngimiyaiya kikai, lri thingalesu aka Tamatamaku.”

⁵ Ku abebeelengenga ka Tamatama amia kai, “Lri edede kela mwa muswane ku amatikurwane.

⁶ Kiasalrunga, wadethenga ku alikaiyane. Kiasalrungasu!

⁷ Ku alikaiyane ki swa Iseraylri wakelanga. Ku tapatarumaramarane ikai lregelrege kadrwanga ku takirararagadhane, lrithavulanenga sikakathane; kwini vai padalrudalrunga si kela.

⁸ “Lri padaalrunga lai papiaku muswane gugu pakaelre ku lisianeli. Lri singikaiyaku ku tapianesu saibange muswane; lri singikaiyaku ku piasu ku matiagiririmucu si pathavungu muswane.

⁹ Kainaku lri pacepe muswane, kainaku lri kakalithi muswane. Lri singikaiyaku ku tapianesu ku ngialisiane si pathavungu muswane. Luka ngimiyaiya kikai, lri thingalesu aka Tamatamaku, ka pathavuthavungu muswane.”

¹⁰ Ku amatikurwane ka vai wakelanga. Yakai kidruanga ku walrumalrumai kabebetethe, ku ngikarakacanane wakelanga belenge.

¹¹ Ku ngikarakacanane si lrumai amaninga ku adreme ki manganga ka umawmase. Ku tacekecekelane lini, lringau lini, si lrigu lini kadrwanga patuelre.

¹² Mabeanga ku vai, ku walangai madha kiragaragai; ku kialangai madha kwalrialri ku kidremedreme, asi lwiyane ku girimucane ki Twaumase thadaalrane ka lri gugu pikai ki kinawmasane sanaka aneanenga ka umawmase.

¹³ Kadrwa ku naaneeanenga ku tarasiwbawbai ku lri dulru sawlri ku asipunuini si kainganai siwlri, asi lwiyane ku girimucane ki Twaumase lri gugu pikai ki kinawmasane ki sanaka umawmase. Ku manganga ka umawmase kai lri dulru panianiake.

¹⁴ Ku rapa ki kwapingi wasiangenga, sanaka umawmase padulrunga; ai kadrwa ku umawmase ku matwase kikaruburu, asi lwiyane ku girimucane ki Twaumase mialri gugu pikai ki kinawmasane sanaka umawmase.

Pathavungu ku pasalrivane ki swa Iseraylri

¹⁵ Ikai latadre yakai ku makarururuburu, ikai daane yakai ku swalrubu ku silravane. Ikai latadre ki cekele ku umawmase lri pacai makanaelre kiarakai ki lrabu; ikai daane ki cekele ku umawmase lri pacai makanaelre kiara caemane, kiara silravane.

¹⁶ Yakai ku laumawmase ku lri mia ki tavagu ka yavalrwalru ka kiapangituluku si mubere mwa lregelrege. Kwi lalasu lri ngwalai ki pasalrivane lini dadange makanaelre.

¹⁷ Ku alrima ki sanaka umawmasenga lri kamamelre; ku drapale ki sanaka umawmasenga lri manugiligili.

¹⁸ Kwi lalasu lri silaimai ku kaimadhane, si manugiligiligili ku kinawmasane patuelre, lai kiriti ku awlru, si kiaruburubwane kitusinalrelreme.

¹⁹ Lri malra ku kingi gingi si cilri pukadalranane ki cekele, mia ki wacilri ku ubulu. Asi lwiyane ikai ki takalisiane ki Tamatama ka vai, ku kingi gingi kai lri maka palribulunga liniane. Ku kingi gingi kai lri maka pangulwadhane liniane, lai kai maka pakabucuku ki barange lini. Ku kingi gingi papasalriu liniane.

²⁰ Kwi lalasu nawadradraranenga ku tharirane ki lasilu lini, ai kwi lalasu arakai kwini lasilu si darepe tumatigiririmucu ka samiamiange. Ngwalai kikai, ku Tamatama pangiakakalrase ki lasilu lini.

²¹ Amia kai ku Tamatama, “Lri paribicaku ki maelane ka kuni liniane, lri pasakurapaku ki kadrwa ku ukuludrane ka laumawmase ku lasilu lini, si lai padriimana tusinalreme.

²² Lu kitudrekadrekase ku kadalameli ka daane, lu mudaane ki daaneli ku sadre, si tusinalrelrelreme kudrukudrulru, lri kainaku kicaicapili lutumane.

²³ “Malrithaavulunga patuelre. Ki kuni yainu kidruanga mapapacapacapacai, ku lacacekele la malrumalrumalrumai ikai kidruanga.

²⁴ Lri ililukaku ki malilisinga ka minzuku pwa kai, lai lri ribici ki daane numi. Lu patudreadrekasaku ki lakuni ki labiu yai, kwini magagarangenga lri mialri kawlrau ku garangane.

²⁵ Ku akasulriane wakelanga! Lri kisilape numi ku rathudane, ai kai lri ikai ku rathudane.

²⁶ Ku amatikurwane lri edede kela; ku malisi ku wakela ku vaga lri kai telrai kela. Lri silape numi ki yuginsia si payugingi; ku labarakalai kadrwa ku manemane ku abulrwane ki laumawmase; ku laciwru laka kadrwa ku manemane ku apakipapawlringavane.

²⁷ Ku talialalai lri daange, ku tarasangililuku lri kasulringa; ku laumawmase lri mukuludru si manugiligili. Lri ngwaladhaku ku tapiane numi patuelre si pathavungu numiane; ku tapangimiane numi saibange ki palrapalra, lri pangimiaku saibange numiane. Luka ngimiyaiya kikai, lri thingale numi aka Tamatamaku.”