Izikile 6 - Ngudradreadrekadhane Ka Sisiu 魯凱語聖經

Ku Tamatama maelaela ki wasukubu ki samiamiange

¹ Ku Tamatama papia nakwane kawriva; kwi lasu amia kai,

² “Lri tara kawlrau ka umawmase, kwi lringawsu papia ki lalregelrege ki swa Iseraylri, papia liniane pelaela ku vagali.

³ Tawtava ki lalregelrege ki swa Iseraylri ku akicacaligirane kilalalra ku vaga ki abebeelengenga ka Tamatama. Kwaku ka abebeelengenga ka Tamatama papiaku ki lalregelrege, lalrelrelrege, maecebe ki vaalru ka lregelrege, la valrwalru iya kai kawriva: Lri arakaiyaku ku dramu kabebetethe ku tasukusukubane ki umawmase ku samiamiange.

⁴ Ku tapatarumaramarane lri kikabebetethe, ku tapatarumaramarane ki sangwalreme lri kicilri si kacacwake. Ku yakai cucubungu ki tapatarumaramarane ku laumawmase lri ikai cucubungu ki samiamiange kipapacai makanaelre.

⁵ Lri pangisaradaku ku wapacai ka kinawmasane ki swa Iseraylri, la sarade ku laculrale lini pangithalringulu ki tapatarumaramarane.

⁶ Ku lacekele ki swa Iseraylri patuelre lri kiamudu. Luka ngimiyaiya kikai, kwi tapatarumaramarane si samiamiange lini patuelre lri kiburuku, ku tapatarumaramarane ki sangwalreme lai lri kiverevere kacacwake. Ku pia lini patuelre lri kiburuku si kalalisi.

⁷ Lri ikai kidruanga ku kiapapacapacai ku laumawmase, ku laabalu ku umawmase lai lri thingale nakwane aka Tamatamaku.

⁸ “Lri palraingaku ku tabeekele ku umawmase ku lri udripi si mubere luka takipapacapacadhane, lai kipasawvagavagai mwa ki lakuni,

⁹ lai acaicaicali ku tacekecekelane. Ikai kwini, kwi lalasu lri pulringau nakwane, si lai lri thingale ku pathavunguli liniane, ku pakiarubwaneli liniane, ka amani sacilringa nakwane ku kidremedreme lini, kai twakapatengatenganenga nakwane, ku madadalame ki samiamiange lribate ki dalamane nakwane. Kwi lalasu lri ngwalai ku tapiane ku ngialisiane si ngilisianane ki kakwakudhane si ngikakavalracevace.

¹⁰ Kwi lalasu lri thingale aka Tamatamaku, ku pakipapawlringawli ku vaga kaika ungawngau.”

¹¹ Ku abebeelengenga ka Tamatama amia kai, “Kusu rututa kwi alrima, pikipika kwi drapale, la tubi ku tapiane ki swa Iseraylri ku ngialisiane si lamatiavalracevace. Kwi lalasu lri kikaruburu si pacai, lri kiara silravane pacai, lri kiara caemane pacai.

¹² Ku acaicali mwadaili ku umawmase lri kacaeme si pacai, ku asuru ikai ki ngwadadeethe ku umawmase lri kikaruburu si pacai, ku abalu si panianiake ku umawmase lri kiara silravane pacai. Lri papiaku liniane gugu pakaelre kai lisianeli.

¹³ Ku wapacai ka kinawmasane lini lri ngisarade ikai ki samiamiange, lri ikai ngithalringulu ki tapatarumaramarane, lri ikai sanaka tadradrau ka lregelrege, si belenge ki sanaka abelenge ka lregelrege, lri ikai tailebe ki sanaka masalese ka angatu si tharialupu ka angatu, ka amani kwidra taikaiyane lini sukubu ki samiamiange. Luka ngimiyaiya kikai, kai lalasu lri thingale aka Tamatamaku.

¹⁴ Lri tara pwalrimaku amudu ki kuni lini. Lri paacinilrianengaku iniane, twalai tali lrawdru ki calragulragu pakeela tali dradha ka cekele Ribela; ku taikaiyane ki swa Iseraylri kadrwa ku kaika acinilrianenga. Luka ngimiyaiya kikai, kwi lalasu ala lri thingale ka Tamatamaku.”