Izikile 5 - Ngudradreadrekadhane Ka Sisiu 魯凱語聖經

Ku Izikile kiakiriti ku isiu

¹ Ku Tamatama amia kai, “Lri tara kawlrau ka umawmase, lri malrasu ku vaeva ku maraangisi ku dramu si tusakirikiritane, la kiriti ki ngisingisisu, kiriti ki isiusu, la malra kwini ngisingisi si isiu pubelenge ki tintingi, ala apavalavala aparamaraamau pautulru.

² Lu utakelanenga ku vai ku takilringulane ki cekele, lri malrasu kwini vaeva ki taitulru kwini isiu ngisingisi si pikai adringi ki cekele lama; la malra kwini taingeanenga kwini ki tulru si iluku mulatadre ki cekele, la takudadadavace si takungetengetele pawtatiki; la malraanga kudra tedrane ku vaeva si pubelenge pakipalai ki valrigi, lri arakaiyaku ku dramuli katwase kurisi.

³ Kusu sura ku piya ku isiu, si cabu pikai ki babiabila ki laimaisu,

⁴ Ala malra ngupiya si kainganai, la pwa ki apwi lama. Patwalai kai ki piya ka isiu, ku apwi lri aru swadrau lama mwa palraelre ki kuni Iseraylri.”

⁵ Ku abebeelengenga ka Tamatama amia kai, “Amani kai kudra Yerusalrime! Wamalraku iniane pikai kabicelrakane ki kawmasane, lani ngithalrilringulu iniane ku lakuni.

⁶ Ai kai Yerusalrime wabaebalre ki padradrekaseli, manganganga ki lakuni, maparawramuru ki ngwadadethe ka kuni ku tabaebalreane. Kai Yerusalrime kai paluludu ki padradrekaseli, wacilri ki hulriceli.

⁷ Lakamani, Yerusalrime, kusu kilalra kai taiyaneli ka abebeelengenga ka Tamatama. Kaisu paluludu ki padradrekaseli, la cilrisu ki hulriceli, si tupapalra ku kakwakudhane ki lakuni, ngisasilasilape ku makakalra ki ngwadadethe ki kuni ku akivangavangane.

⁸ Ngwalai kai, peaelaelaku ka abebeelengenga ka Tamatama, lri kiecebaku muswane; lri ikaiyaku cucubungu ki lakuni si saibange muswane.

⁹ Asi lwiyane ku piasu ku awngane kavalracevaceli patuelre, lakamani lri pathavungaku muswane. Kainaku paiyana kikai pathavungu muswane, lubibilrili lai kai lri pianga kikai pathavungu muswane.

¹⁰ Ku tangimiane, ikai Yerusalrime, ku lamarudrawdrange lri kane ku beate ki lalalake; ku lalalake lri kane ku beate ki lamarudrawdrange. Lri pathavungaku muswane, kudra sasipiane si abalu ku laumawmase lri mialri kipasawvagavagai sarau mwa kidruanga.

¹¹ “Lakamani, kwaku ka abebeelengenga ka Tamatama papiaku ki palralrawthu ka niakeli kiketekete: Kudra paiyangasu ku matiagirimucu, matialrase si kudrulru ki saniange ka daaneli, kadrwa ku ataulraneli amudu muswane.

¹² Lu pautulrwane ki laumawmase ku taingeane ka laumawmase lri ikai daane ki cekele kacaeme si pacai, lri pacai ki silravane; ku saka taingeane ki tulru lri ikai latadre ki cekele kiara lrabu pacai; kudra tedranenga lri kipasarau mwa kidruanga, lri arakai kai dramuli kurisi liniane.

¹³ “Lri malraku patueelre ku lisiane gugu pikai ki kinawmasanesu, pakeela ku tamugugwane patuelre, si ngulwaadhanaku. Lukamiyaiya kai, lri thingalesu, amani sa kaisu kadringelrese ku kidremedreme la pakalisisu nakwane; kwaku ka Tamatama naamianga naku kikai vaga.

¹⁴ Ku laumawmase ki ngwadadethe ki lakuni lu lribate kwini, lri ulralrakai makanaelre muswane, si katwase kidaili muswane.

¹⁵ “Lu kalisiaku, si pakilriingau pathavungu muswane, ku ngwadadethe ku lakuni lri ngituluku makanaelre. Kwi lalasu lu drele kwini matiaukuludru ku tangimiamiane lri kavalracevace muswane, si ulralrakai muswane.

¹⁶ Lri retegaku ku talekesu, si pakasilrau muswane, lasu kilrialringau ku sakwalrialri ki masilrau, mararaamau ki marangisi ka lraili amudu muswane.

¹⁷ Lri arakaiyaku ki silravane si waudriwdripi amudu ki lalalakesu, lai arakaiyaku ku swalrubu, akilrumadhane, si amakakaruburane papacai muswane. Kwaku ka Tamatama amiaku kikai pelaela.”