Izikile 48 - Ngudradreadrekadhane Ka Sisiu 魯凱語聖經

Ku lazuku mapipithingi ku kadaengane

^1-7 Ku pagisane tali dradha ka kadaengane yai twalai Miditerania papia tali talrawane si lribate kavai cekele Hithelune, salralribate Hamathe, cekele Hasere Inange, daruru mwa ki tamaagisane ki Damasekuse ka kuni si Hamathe ka cekele. Ku lazuku lri ikai kai ki kadaengane, twalai pagisane cucubungu talrawane mwa sapakalriwgu ka Miditerania, lri singikai ki Dange, Asere, Napetali, Manase, Iparaime, Riwbingi, Yuda, ku tamasakaikaiyane, twalai tali dradha mwa tali lrawdru lri kitudrulru ku taingeane ku kadaengane.

Tali kabicelrakane ka nipawkalrivilane ka kadaengane

⁸ Ikai pagisane ki Yuda pithinga ku taluvaale ku kadaengane yakai ku makucingalre ku arakaiyane. Kikai kadaengane twalai tali dradha mwa tali lrawdru ku ngulapane 12.5 ka kunlri, twalai talrawane mwa tali sapakalriwgu ku lragiane mararaamau kudra ki mapithipithingi ki lazuku ku kadaengane. Ku daane ki Twaumase lri ikai kai tudaane.

⁹ Kikai kadaengane ku kabicelrakane iga pikai ku taluvaale ku lragiane 12.5 ka kunlri, ku ngulapane mangeale ka kunlri kikai kadaengane apatarumarane baai ki Tamatama.

¹⁰ Ku labarakalai lri ikai kai ki saniange ka kadaengane kipithingi ku taluvaale. Kudra kitudrulru lini, twalai talrawane mwa tali sapakalriwgu 12.5 ka kunlri, twalai tali dradha mwa tali lrawdru lrima ka kunlri. Ku daane ki Tamatama lri ikabicelrakane kikai.

¹¹ Kikai saniange ka kadaengane yai abaadhane ki barakalai ka mwabaibalrithi ki Zaduke. Kwi lalasu patengatengane ku kidremedreme pasikaikai nakwane, kai ngiamia ki zuku ka Lrivi ka drumane ka umawmase, katwase tupapalra ki swa Iseraylri baebalre nakwane.

¹² Lakamani, kwi lalasu lri ikai tali thili ki zuku ki Lrivi kitudrulru ku taingeane ku kadaengane; kikai nipawkalrivilane ka kadaengane yai sanianiangenga.

¹³ Ku zuku ki Lrivi lri ikai tali lrawdru ki kadaengane ki labarakalai kitudrulru ku taingeane ka nipawkalrivilane, twalai talrawane mwa sapakalriwgu 12.5 ka kunlri, twalai tali dradha mwa tali lrawdru lrima ka kunlri.

¹⁴ Kikai nipatarumarane baai ki Tamatama ikai ki kuni palraelre mathaithariringa ka kadaengane, kai lri maka malangalangai, mabaibalrithi, mababai. Kikai kadaengane yai saniange, ka Tamatamane.

¹⁵ Kikai nipawkalrivilane ka kadaengane yakaiyana kwi tedrane ku lragiane 12.5 ka kunlri, ku ngulapane drusa ka kunlri; kikai kadaengane kaika saniange ka kadaengane, ku langumawmawmase lri dulru ikai, lri dulru arakai. Lri tucekele ikai kai ki kabicelrakane,

¹⁶ ku tangimiane yai sikake, ki thili 2,250 ka mituru.

¹⁷ Ki ngiathalringulu ki cekele putedra ku kadrwa ku manemane, ku ngulapane 125 ka mituru.

¹⁸ Lu maka tucekelenga ku tedrane ka saniange ka kadaengane tali lrawdru taluvaale ka kadaengane ku swadravane tali talrawane ku lragiane lrima ka kunlri, ku ngulapane 2.5 ka kunlri, tali sapakalriwgu ku lragiane lrima ka kunlri, ku ngulapane 12.5 ka kunlri; kikai kadaengane yai abaadhane ki yakai ki cekele ki laumawmase pakauawngu.

¹⁹ Ku yakai ki cekele makanaelre ku umawmase, adravane ka sumanemane ka zuku, lri dulru kaungu makanaelre.

²⁰ Lu miakai, kikai kabicelrakane kai ki kadaengane amani kudra nipawkalrivilane ka kadaengane, ki thili 12.5 ka kunlri ka sikake, ikai adringi lrika atucekelane.

^21-22 Kikai nipawkalrivilane ka kadaengane yakai ku daane ki Twaumase, kadaengane ki barakalai, kadaengane ki zuku ki Lrivi, si atucekelane ka kadaengane; ku tedrane ku kadaengane tali talrawane si tali sapakalriwgu yai talialaladhane, pagisane ki cucubungu talrawane kela tali talrawane, ki cucubungu sapakalriwgu kela laveke Miditerania, cucubungu tali dradha mararaisi ki pagisane ki Yuda, cucubungu tali lrawdru mararaisi ki pagisane ki Biniyamingi.

Kadaengane ki drumane ka zuku

^23-27 Kwini tali lrawdru ka nipawkalrivilane ka kadaengane avalane baai ki drumane ka zuku; twalai pagisane tali talrawane mwa tali sapakalriwgu ka Miditerania, singikaai ki Biniyamingi, Simiune, Isakare, Zibulungu, Gade ku tamasakaikaiyane, twalai tali dradha mwa tali lrawdru lri ngutaingeane kitudrulru.

²⁸ Tali lrawdru ki Gade ku pagisane yai twalai Tamare papia tali sapakalriwgu tali lrawdru ngukakai ki takasaleseane ka kadaengane ka Miriba Kadise, ala papia tali sapakalriwgu tali dradha si luludu ki pagisane ki Izipiti daruru mwa ka Miditerania.

²⁹ Ku abebeelengenga ka Tamatama amia kai, “Pangukuzibika apavalavala kikai kadaengane baai ki lazuku ki swa Iseraylri, tutacekecekelane lini.”

Lrawlrawdru ki cekele Yerusalrime

^30-34 Cekele Yerusalrime talu 12 ku lrawlrawdru ki cekele. Maececebe ku balingibingi ki cekele ku la lragiane 2,250 ka mituru, laka tulrutulru ku lrawlrawdru ki cekele. Ku vaeva ka lrawlrawdru singiakaai ki zuku ki swa Iseraylri sunagane. Ku balingibingi tali dradha ku tulru ka lrawlrawdru yai Riwbingi, Yuda, Lrivi; ku balingibingi tali talrawane ku tulru ka lrawlrawdru yai Yusepe, Biniyamingi, Dange; ku balingibingi tali lrawdru ku tulru ka lrawlrawdru yai Simiune, Isakare, Zibulungu; ku balingibingi tali sapakalriwgu ku tulru ka lrawlrawdru yai Gade, Asere, Napetali.

³⁵ Ku balingibingi ngithalringulu ki cekele ku lragiane 9,000 ka mituru. Twalainga kaikameane, kikai cekele lri ki pasi, “Ku Tamatama yakai kai”.