Izikile 47 - Ngudradreadrekadhane Ka Sisiu 魯凱語聖經

Ku twalai ki daane ki Twaumase mwaludru ka acilai

¹ Kwini umawmase waililuku nakwane siwlri mwa ki lrawlrawdru ki daane ki Twaumase. Yakai ku acilai ku twalai lebe ki lrawlrawdru ki samamudaane mwalwaludru, si papiapia tali talrawane, ka amani kudra cucubungu ki daane ki Twaumase mwalwaludru katwase. Ku acilai twalai lebe tali lrawdru ki daane ki Twaumase mwaludru kainganai, la ngukakai tali lrawdru ki tapatarumaramarane.

² La pacungulu, kwini umawmase ililuku nakwane twalai tali dradha lrawlrawdru kainganai, la iluku nakwane ngithalringulu latadre si ngibangulu mwa lrawlrawdru tali latadre ka kalatadrane ka wacubungu tali talrawane. Yakai ku acilai ku twalai tali lrawdru ki lrawlrawdru kainganai mwaludru.

³ Kwini umawmase arakai ku acepange katwase lekete, twalai ki lrawlrawdru papia ki tamwaludrane, ka tali talrawane, sa leketenga tu 500 ka mituru; kwi lasu la dawlu nakwane si pikai kwini patalubalre ki acilai, ku acilai wakeakela ki pakilri.

⁴ Kwi lasu la twalai kwini papucucubungu lekete tu 500 ka mituru, ku acilai wakelanga ki paculru. Kwi lasu la twalai kwini papucucubungunga lekete tu 500 ka mituru, ku acilai wakeelanga ki tasilakelaketane.

⁵ Kwi lasu la peelanga twalai kwini papucucubungu lekete tu 500 ka mituru, ku mwadringane ki acilai kaidu wadulrunga pangu talubalre, lu langudhane maka wadulru madu lribate.

⁶ Kwi lasu peaelaela nakwane, “Lri tara kawlrau ka umawmase, kirarakeeta kilakikai patueelre!” Sakabilrilinga, kwini umawmase waililuku nakwane siwlri mwa thili ki vaalru;

⁷ yakaiyaku kwini drele maecebe ki vaalru yakai ku makaalra ku laangatu.

⁸ Kwi lasu peaelaela nakwane, “Kikai kadravane papia tali talrawane mwaludru, si lribate valrwalru Yuredange, la mwa ka Titimwane ka laveke. Kai acilai kadravane lu mwaludru mwa ki Titimwane ka laveke, ku titimwane ka acilai lri akabalrithi aacilai ki vaalru.

⁹ Kikai vaalru ku talribaatane lri ikai ku makaelaela ku panianianiake si lakange. Ku acilai vaalru pakabavane ki acilai ki Titimwane ka laveke, ku tamwaludrane ki acilai yakaai ku niake.

¹⁰ Twalai ki latacebeane kavai Ingidi mwa ka latacebeane ka Inigelaime, ikai babiabila ki laveke yakai ku taratukakange ku pavaivai ku laarai. Ka Titimwane ka laveke lri mia ka laveke Miditerania ikai ku makaelaela ku kange, kakalra turamuru.

¹¹ Ai ki ngwababiabila ki laveke ku labeneke si labaibaiyu mapaliliana ka acilai.

¹² Kikai vaalru maecebe lri ikai ku makaelaela ku angatu cebecebe si pumadrumadru, lri dulru madu kane. Ku vasau ki angatu kai marudarudame palralrawthu, ku angatu la kai ateke pumadru. Luka dramare pwamadru ku bavane ku madru, asi lwiyane kilakikai angatu yai nipwaciladhane arakai ku twalai ki daane ki Twaumase mwaludru ka acilai. Ku madru wadulru madu kane, ku vasau la tusasulravane madu.”

Pagisane ki kadaengane

¹³ Ku abebeelengenga ka Tamatama amia kai, “Ku pagisane ki kadaengane numi amani kai lebe. Kikai kadaengane abaadhane apavalavala ki tai 12 ka zuku ki swa Iseraylri; ku zuku ki Yusepe lri ngutai drusane.

¹⁴ Napapianga naku ki cucungulane numi kiketekete patarumara baai liniane kikai kadaengane tutacekecekelane lini. Kaiasasane lri maramaraamau numi mapipithingi kikai kadaengane.

¹⁵ “Ku pagisane talikai dradha: Twalai Miditerania papia tali talrawane mwa ka Hithelune, ala mwa salralribate ka Hamathe, cekele Zidada,

¹⁶ lacekele Biruta, si Siberaime (kilakikai cekele yakabicelrakane ki Damasekuse ka kuni si Hamathe ka kuni), cekele Hasere Tikune (yababiabila ki Haurane ka kuni).

¹⁷ Ku pagisane tali dradha twalai ka Miditerania papia ka tali talrawane daruru ka Hasere Inange, sia pagisane ki tali lrawdru ka Damasekuse si Hamathe.

¹⁸ “Ku pagisane tali talrawane: Twalai ki tamararaisane ki Damasekuse si Haurane papia tali lrawdru, la ngukakai kadravane Yuredange (tali sapakalriwgu ki kadravane yai Iseraylri, tali talrawane ki kadravane yai Gileade) La papia mwa ka Titimwane ka laveke ka Tamare.

¹⁹ “Ku pagisane tali lrawdru: Twalai Tamare papia kabicelrakane tali sapakalriwgu si tali lrawdru mwa kavai takasaleseane ka Miriba Kadise, ala ngibangulu papia kabicelrakane tali sapakalriwgu si tali dradha, si ngukakai pagisane ki Izipiti mwa ka Miditerania.

²⁰ “Ku pagisane tali sapakalriwgu: Twalai ka Miditerania papia tali dradha mwa ka salralribate Hamathe cucubungu tali sapakalriwgu.

²¹ “Kunumi ka lazuku lri mapipithingi numi kikai kadaengane.

²² Kikai kadaengane lrika tacekecekelanenga numi palralrawthu. Ku yakai numiane kai ku singibadhane si kudra tulalake lini ikai kai ku lalalake lri kitudrulru makanaelre ku kadaengane. Lu marasikai numi liniane tupararamava ki swa Iseraylri, paikaiya liniane ki lazuku ki swa Iseraylri pakuzibiki ku drulru ku kadaengane.

²³ Kwi singibadhane kela sanaka taikaiyane lini ka zuku, lri ikaai kwini ki zuku kitudrulru ku kadaengane. Amiaku kikai pelaela ka abebeelengenga ka Tamatama.”