Izikile 46 - Ngudradreadrekadhane Ka Sisiu 魯凱語聖經

Talialalai si kalalrilrisiane

¹ Amia kai ku abebeelengenga ka Tamatama, “Ikai ki takauawngane ka minaka nemelane ka vai, ikai ki tali talrawane ka lrawlrawdru ki tali daane ka kalatadrane lri tara elebe. Ai ikai ki Taisadrasadrane ka vai si aswalalanga ka vai, kwi lrawlrawdru tali talrawane lri muelebe.

² Ku barakalai lu pasikainga ki talialalai patarumara ku Lama ka lrisi yai, ku talialalai lri ngukakai lrawlrawdru ruka ki tali latadre ka kalatadrane kainganai mudaane, si acegecege ikai thili ki ulrudru ki lrawlrawdru. Kwi lasu lri ikai kwini drihai, lu maka drihainga lai lri katwase. Kikai lrawlrawdru lrika takaminueleebane, pakeela ki miauawawbu kai lri maka elebe.

³ Luka Taisadrasadrane ka vai si aswalalanga ka vai, ki kuni palraelre ka mapapangale lri ikai kai cucubungu ki lrawlrawdru sukubu ki Tamatama makanaelre.

⁴ Ikai ki Taisadrasadrane ka vai, ku talialalai lri papia ki Tamatama patarumara ku eneme ku kadrwa ku takatumanane ku lrulai ka kiu, ku vaeva ka balase ka nikiubawbalane ka kiu, tu Lama ka lrisi.

⁵ Ku vaeva ku kiu lri pakaredele patarumara ku 17.5 ka kunsenge ku Taleke ka lrisi; ku sapaelreane patarumara ku Taleke ka lrisi ki vaeva ka lrulai ka kiu, kai lri katumane ngisasingikaai ku talialalai. Ku 17.5 ka kunsenge ku Taleke ka lrisi lri pakaredele ku tulru ka kunsenge ku lawlau ka ulrive patarumara.

⁶ Ki aswalalanga ka vai, kwi lasu lri patarumara ku kadrwa ku takatumanane ku vaeva ku lrulai ka sawvalai ka lwange, eneme ku lrulai ka kiu, vaeva ku balase ka nikiubawbalane ka kiu.

⁷ Ku vaeva ka sawvalai ka lwange, ku vaeva ku balase ka nikiubawbalane ka kiu lri pakaredele patarumara ku 17.5 ka kunsenge ku Taleke ka lrisi; ku vaeva ku lrulai ka kiu ku sapaelreane ku Taleke ka lrisi kai lri katumane ngisasingikaai ku talialalai patarumara. Luka 17.5 ka kunsenge ku Taleke ka lrisi lri pakaredele patarumara ku tulru ka kunsenge ku lawlau ki ulrive.

⁸ Ku talialalai lri twalai lrawlrawdru ruka tali latadre ka kalatadrane mudaane masasawlri.

⁹ “Sanaka lrisi, lu kainganai sukubu ki Tamatama ku laumawmase, ku ngwakai ki tali dradha mudaane, lri ngukaai tali lrawdru mulatadre; ku twalai tali lrawdru mudaane, lri ngukaai tali dradha mulatadre. Ku aneaneane kai lri maka ngukakai ki vaeva ki lrawlrawdru masasawlri, lri tara ngukaai ki maelane ki lrawlrawdru katwase.

¹⁰ Ku laumawmase lu mudaane, ku talialalai lri mialri mudaane; ku laumawmase lu katwase mulatadre, ku talialalai lri mialri katwase mulatadre.

¹¹ Ikai ki kalalrilrisiane si taicengecengane tulrisisisi ka vai, sana patarumara ku vaeva ku sawvalai ka lwange, sana patarumara ku vaeva ku balase ka nikiubawbalane ka kiu, lri tara pakaredele ku 17.5 ka kunsenge ku Taleke ka lrisi patarumara. Ku vaeva ku lrulai ka kiu ku apaelreane ku Taleke ka lrisi kai katumane ngisasingikaai ku amani ka patarwamara ku umawmase patarumara. Sanaka 17.5 ka kunsenge ku Taleke ka lrisi lri paelre ku tulru ka kunsenge ku lawlau ka ulrive patarumara.

¹² “Ku talialalai lu arakai ku Lama ka lrisi si Sulivatane ka lrisi papia ki Tamatama patarumara ku ngipapatarumarane, pasikaiyanga iniane muelebe ku papia tali talrawane ku lrawlrawdru. Kwi lasu lri singikai ku kakudhane ki Taisadrasadrane ka vai patarumara ku Lama ka lrisi si Sulivatane ka lrisi. Kwi lasu lu katwasenga, kwi lrawlrawdru waelebe madu.”

Apatarumarane pivai ka lrisi

¹³ Ku Tamatama amia kai, “Luka mialrealre patarumara ku kadrwa ku takatumanane ku vaeva ka tara caicaailiana ka kiu tu Lama ka lrisi baai ki Tamatama. Luka kaiya tara patarumara ku miyaiya kai patarumara.

¹⁴ Lukamialrealre la mialria patarumara ku tulru ka kukingi ku milrikinku si vaeva ka kunsenge ku lawlau ki ulrive tu Taleke ka lrisi; ku lawlau yai sapaibwane ki milrikinku. Patarumara ku Taleke ka lrisi baai ki Tamatama, ku kakudhane lrika apalralrawthane ngimia.

¹⁵ Lukamialrealre patarumara baai ki Tamatama ku lrulai ka kiu, milrikinku, si lawlau ki ulrive, madha reteretege.”

Talialalai si kadaengane

¹⁶ Ku abebeelengenga ka Tamatama amia kai, “Ku talialalai alaiyasi patarumara baai ku kadaenganeini ki lalake ki talialalai, kwini kadaengane lri kaamanianenga kwini ki lalake ki talialalai, si ka palralraauthunga ka tacekecekelaneini.

¹⁷ Ku talialalai alaiyasi baai ku kadaenganeini ki tabebelenge ka sasiakawluini, kwini kadaengane lrika kinisalruane ka sasiakawlane, lu kelanga kudra ‘Tangilralrailraingane ka caili’, kwini sasiakawlu lri sawlri kwini kadaengane baai ki talialalai. Asi lwiyane kikai yai tacekecekelane ki zuku ki talialalai, kathane ku talialalai si lalake ki talialalai kulri maka palralrawthu sikadaengane kikai.

¹⁸ Ku talialalai maadha drikidrikisi ku tacekecekelane ki mapapangale. Kwi lasu lri tara patwalai ki tacekecekelane ki zuku ki talialalai vala ku kadaengane baai ki lalalake ki talialalai, amani kwi lasu lu tusinalreme si dredrepete ki laumawmase, la drikisi ku kadaengane ki kawkawluli.”

Tagagane ki daane ki Twaumase

¹⁹ Sakabilrilinga, kwini umawmase waililuku nakwane ngukakai ki thili ki lrawlrawdru ka kadalranane, daruru ki samamudaane ki wacubungu tali dradha ka lataikaikaiyane; kwini lataikaikaiyane ki daane yai saniange, wabaai paarakaikai ki labarakalai. Kwi lasu la drukange padrele nakwane papia tali sapakalriwgu kai ki lataikaikaiyane ka taluvaale ka kadaengane.

²⁰ Kwi lasu amia kai, “Kikai kadaengane yai wabaai ki labarakalai tutagagane ki Balrithane ki pasalrivane ka lrisi si Samupasalrivanane ka lrisi ka beate, la mialri ka taakakamane ki Taleke ka lrisi. Lukamiyaiya kai, kwi lalasu kai lri malra kwini saniange ka lamanemane iluku mutali latadre ka kalatadrane, si kabebetethe ki laumawmase.”

^21-22 La pacungulu, kwi lasu waililuku nakwane mwa tali latadre ka kalatadrane, si padrele nakwane ki lapiu tali latadre ka kalatadrane, ki lapiu yakaai ku swatiiki ku kalatadrane, ku lragiane 20 ka mituru, ku ngulapane 15 ka mituru.

²³ Kwini lakalatadrane yakaai ku lrenege ka raedre, la ikai ku tagagane deethe ki lrenege ka raedre.

²⁴ Kwini umawmase peaelaela nakwane, “Kikai yai tagagane. Ku latarakauawngu kai ki daane ki Twaumase yakai kai agaga ku patarumara ki laumawmase ku satulrisiane.”