Izikile 45 - Ngudradreadrekadhane Ka Sisiu 魯凱語聖經

Tamatama ne ka kadaengane

¹ Lu apadrudrudrulrunga ku kadaengane baai ki lazuku, pikaiya ku taingeaane si patarumara baai ki Tamatama. Kikai kadaengane ku lragiane 12.5 ka kunlri, ku ngulapane mangeale ka kunlri; palraelre kwini kadaengane yai saniange ka kadaengane.

² Patwalai kai ki kadaengane agisa tusikake ka saarakaiyane tudaane ku daane ki Twaumase, ku thili ku lragiane 250 ka mituru, ki ngiathalringulu drima ku 25 ka mituru ku kadrwa ku yakai ku manemane ku kadaengane.

³ Ku apararamau kai ki kadaengane, ku lragiane 12.5 ka kunlri, ku ngulapane lrima ka kunlri, agisa tusaarakaiyane tudaane ku daane ki Twaumase, ka sanianiangenga ka kadaengane.

⁴ Ikai kai ki kuni palraelre, kikai kadaengane yai saniange, ka niagisane baai ki yakaikai ki daane ki Twaumase kisikawkawlu ki Tamatama ka labarakalai; ikai adringi yakai ku atudaanane lini si daane ki Twaumase ka kadaengane.

⁵ Ku taingeane ka apararamau ka kadaengane abaadhane ki yakaikai ki daane ki Twaumase kauawngu ki swa Lrivi, ikai adringi yakai ku ladaane ki swa Lrivi ka cekele.

⁶ Ikai kai ki saniange ka kadaengane thili agisa ku taingeane ka kadaengane, ku lragiane 12.5 ka kunlri, ku ngulapane 2.5 ka kunlri, ka aikaiyane tudaane ki swa Iseraylri.

Kadaengane ki talialalai

⁷ Agisa ku taingeane ku kadaengane si baai ki talialalai. Kikai kadaengane lri twalai tali sapakalriwgu ki saniange ka kadaengane si papia ka Miditerania, twalai tali talrawane ki saniange ka kadaengane papia ka pagisane ki maelane ka kuni tali kai talrawane, ku lragiane ki kadaengane mararaamau ku tamapipithingane ki lazuku ki swa Iseraylri.

⁸ Kikai kadaengane amani ku kitudrulru ki talialalai ikai Iseraylri. Lukamiyaiya kai, kwi lasu lai kai dredrepetenga si tusinalreme ki kawkawluli; ku tedrane ku kadaengane kai ki kuni palraelre lri apavalavala baai ki lazuku ki swa Iseraylri.

Kakudhane ka apaluludane ki talialalai

⁹ Ku abebeelengenga ka Tamatama amia kai, “Talialalai ki swa Iseraylri, makakelretenga! Madha ngikamianenga, tusinalreme dredrepete ki mapapangale; putaluvaivadha ku dringelresane, si arakai ku aparamaramavane marasikai. Madha vuthavuthanga pakatwase ki kadaengane lini ki kawkawluli. Amaniaku ka abebeelengenga ka Tamatama ka amia kikai pelaela.

¹⁰ “Sanaka umawmase lri arakai ku lekete ki aparamaramavane lekete.

¹¹ “Kai ‘Ipa’ saarakaiyane tintingi ki makawlukulu, kai ‘Bathe’ saarakaiyane tintingi ki aciaciladhane, ka arakai ku ‘Humire’ tutangadrane: Ku takadravane takatikianane ki ‘Ipa’ si ‘Bathe’ Lri mararaamau, ka lri sitangadrane ki ‘Humire’: 1 humire=10 ipa=10 bathe.

¹² “Ku satintingane ki telregane yai: 20 girase=1 sikile; 60 sikile=1 mina.

^13-15 “Singikaiya kai lebe kai takelretane lu patarumara numi: Titikiane ka mugi: Ku 1/60 lu kitaleke Madradrau ka mugi: Ku 1/60 lu kitaleke Lawlau ki ulrive: Ku 1/100 lu malranga Kai lawlau ki ulrive lri arakaai ku ‘bathe’ tintingi patuelre: 10 bathe=1 humire=1 kure. Kiu: Ku kiu ikai ki tapagwagwane ki swa Iseraylri, luka drusa ka idai lri patarumara ku vaeva. “Lri patarumara numi ku Taleke ka lrisi, Lama ka lrisi, Sulivatane ka lrisi, lukamiyaiya kai, kwi pasalrivane numi lri kipacepe. Amiaku kikai pelaela ka abebeelengenga ka Tamatama.

¹⁶ “Ku laumawmase ki kuni palraelre lri tara iluku kilakikai sapatarumarane si mwa ki talialalai ki swa Iseraylri.

¹⁷ Ikai ki aswalalanga ka vai, Taisadrasadrane ka vai, si drumane ka tatulrisisisiane ka vai, ku talialalai lri kamani ku wabaai ki kuni palraelre ki laumawmase ku Lama ka lrisi ka waudriwdripi, Taleke ka lrisi, si Paralikiliki ka lrisi. Kwi lasu lri padulru ku Balrithane ki pasalrivane ka lrisi, Taleke ka lrisi, Lama ka lrisi, Sulivatane ka lrisi, la pasikai ki laumawmase ki swa Iseraylri mupasalrivane.”

Kalalrilrisiane

¹⁸ Amia kai ku abebeelengenga ka Tamatama, “Ki aswalaalanga ki dramare ka aswalaalanga ka vai, lri patarumarasu ku vaeva ku kadrwa ku takatumanane ku lrulai ka sawvalai ka lwange tusatulrisiane, si bula ki daane ki Twaumase.

¹⁹ Ku barakalai lri malra ku erai ki Balrithane ki pasalrivane ka lrisi si drisisi pikai ki ulrudru ki lrawlrawdru ki daane ki Twaumase, ki talusupatele ka piu ki tapatarumaramarane, si samamudaane ki ulrudru ki lrawlrawdru ki tali daane ka kalatadrane.

²⁰ Kwini ki dramare ki samakapitulu ka vai, lri tuthadaalranesu pasikai kudra ki kai waranau kai wathingale si la pasalriu ku umawmase patarumara tulrisi. Lukamiyaiya kai, lrika tapakabulanesu ki daane ki Twaumase.

²¹ “Twalai ki aswalaalanga ki dramare ki samaka 14 ka vai, lri pangimiasu ku tatulrisisisiane ki Takilragavane ka lrisi makapitulu. Ikai kai ki minaka pitulane ka vai, sanaka aneanenga ka umawmase lri kane makanaelre ku kaika nipawsemakane ka pange.

²² Ki aswalaalanga ka vai ki kalalrilrisiane, ku talialalai lri tara ngipapasikaai si pasikai ki sakatukuniane ki mapapangale patarumara ku vaeva ku sawvalai ka lwange tu Balrithane ki pasalrivane ka lrisi.

²³ Ikai ki minaka pitulane ki kalalrilrisiane, kwi lasu luka kaiya lri patarumara ki Tamatama ku pitu ka kadrwa ku takatumanane ku sawvalai ka lwange si pitu ka balase ka nikiubawbalane ka kiu tu Lama ka lrisi. Kwi lasu lai lri mialri lukakaiya lri patarumara ku vaeva ku balase ka kiu tu Balrithane ki pasalrivane ka lrisi.

²⁴ Ku vaeva ku sawvalai ka lwange, ku vaeva ka balase ka nikiubawbalane ka kiu lri pakaredele ku 17.5 ka kunsenge ku Taleke ka lrisi, tulru ka kunsenge ku lawlau ka ulrive lri pakaredele patarumara.

²⁵ “Ikai ki Talakangane ka lrisi, twalai ki sakapitu ka dramare ki samaka 15 ka vai pathagili ka minaka pitulane ka vai, ku talialalai lri singikaai ku kakudhane ki Takilragavane ka lrisi lukakaiya lri patarumara ku Balrithane ki pasalrivane ka lrisi, Lama ka lrisi, Taleke ka lrisi, si lawlau ki ulrive.”