Izikile 44 - Ngudradreadrekadhane Ka Sisiu 魯凱語聖經

Ku taarakaiyane lrawlrawdru tali talrawane

¹ Kwini umawmase wailuku nakwane siwlri mwa ki tali latadre ka kalatadrane ki daane ki Twaumase ka lrawlrawdru tali talrawane. Kikai lrawlrawdru nielebane.

² Ku Tamatama peaelaela nakwane, “Kikai lrawlrawdru lri tara ka nielebane palralrawthu, madha muelelebe. Ku aneaneane ku umawmase kai lri maka arakai kikai lrawlrawdru, asi lwiyane kwaku ka Tamatama, ka Twaumase ki swa Iseraylri ngwakainga naku kai ki lrawlrawdru mudaane. Kikai lrawlrawdru lrika palralrawthunga ka nielebane.

³ Ku yacengecenge atalialalai, kwi lasu lri dulru kainganai mwa kikai, si ikai cucubungu nakwane kane ku saniange ka pange. Kwi lasu lri tara twalai tali latadre ka kalatadrane ki lrawlrawdru ruka masasawlri.”

Nitukakudhanane lu mudaanane ki daane ki Twaumase

⁴ La pacungulu, kwini umawmase waililuku nakwane lribate tali dradha lrawlrawdru, la kela cucubungu ki daane ki Twaumase. Wadrelaku ku lrigu ki Tamatama swaeete ki daaneini; la guruthunganaku ikai cakena.

⁵ Ku Tamatama la iya kai nakwane, “Lri tara kawlrau ka umawmase, kirarakeeta kwi drelesu, si kilalrasu patueelre. Lri pelaelaku muswane ku kakudhane ka apangimiane ki ngwakai ki daane ki Twaumase. Dradrela lu lrika aneane ku lri maka mudaane ki daane ki Twaumase, lu lrika aneane ku kai lri maka mudaane ki daane ki Twaumase.

⁶ “Pelaela ki lawabaebaebalre ka swa Iseraylri, kwaku ka abebeelengenga ka Tamatama kainaku lri maka kiadilinga ku piapia lini ku ngialisiane patueelre.

⁷ Kwi lalasu lu papia nakwane patarumara ku erai si lamace ki sapatarumarane, pwadaane ki daane ki Twaumase kwidra ki lakai kiagelregelre tulrisi, kai pasalaladha nakwane ka maelane ka zuku, ngwalai kikai wakudrulrunga ki daaneli. Ku kawkawluli paiya kilakikai ngialisiane, si baebalre ki takiketeketaneli.

⁸ Kwi lalasu kai ngiakakamani ikai ki daaneli kaungu ku saniange ka tatulrisilrisiane, swadraalrulringa pasiamece ki maelane ka zuku.

⁹ “Amiaku kikai pelaela ka abebeelengenga ka Tamatama: Kwi kai tarwamara kigelregelre ka lrisi, la kai pasalaladha nakwane ka lamaelane ka zuku, madha paudadaane ki daaneli, adravane ka yakaikaai ki swa Iseraylri ka maelane ka zuku mialri madha pudadaane.”

Ku kai lri maka abarakalai ku swa Lrivi

¹⁰ Ku Tamatama amia kai nakwane, “Yakai kwi Lrivi ka zuku kwi latwapapalra ki drumane ki swa Iseraylri cilri katwase nakwane si katwase sukubu ki lasamiamiange, lri pathavungaku liniane.

¹¹ Kwi lalasu lri dulru ikai ki daaneli si drangalrungalru ki lrawlrawdru, ikai ki daaneli kauawngu. Kwi lalasu lri dulru atalingikaiyane ki laumawmase culu ku Lama ka lrisi si drumane ka lasapatarumarane, la mawbalribalrithi pasikai ki laumawmase twatumane.

¹² Ai, kwi lalasu naatalingikaiyanenga ki swa Iseraylri marasikai ku asukubane ki samiamiange, papasalriu ki laumawmase, lakamani, kiaketeketaku ka abebeelengenga ka Tamatama, kwi lalasu lri tara kipathavungu.

¹³ Kwi lalasu kai lri maka abarakalai si pasikai nakwane kaungu, lai kai lri maka deethe ki saniange ka lawbubululi, kai lri maka mudaane ki Alrivilriviilrivinga ka taikaikaiyane. Ki kikai sakipathavungane ku tapiane lini ku langialisiane.

¹⁴ Lri sikawlaku liniane ikai ki daane ki Twaumase piapia sanaka awngane.”

Labarakalai

¹⁵ Ku abebeelengenga ka Tamatama amia kai, “Lu cilri nakwane si katwase kudra drumane ku swa Iseraylri, ku labarakalai ka Lrivi ka zuku, mwabaibalrithi ki Zaduke lri pacungucungulu kapatengatengane ku kidremedreme ikai ki daane ki Twaumase pasikaikai nakwane. Lakamani, kaiasasane kathane kwi lalasu kalri dulru deethe nakwane, pasikaikai nakwane twatumane. Kwi lalasu lri ikai cucubungu nakwane patarumara ku lamace si erai ki sapatarumarane.

¹⁶ Kathane kwi lalasu ka lri maka mudaane ki daane ki Twaumase, si kauawngu ikai ki tapatarumaramaraneli, la marasikaikai ki drihai ikai ki daane ki Twaumase.

¹⁷ Kwi lalasu lu mudaane mwa ki lrawlrawdru ki tali daane ka kalatadrane lri tara silaimai ku lalasare ka kaimadhane. Kwi lalasu lu ikai tali daane ka kalatadrane lu kamaninga ka kiapuawawngane ikai ki daane ki Twaumase kai lri maka silaimai ku ubale ki kiu.

¹⁸ Kwi lalasu lri sitalrupunu ku niarakaiyane ku lalasare ka kaimadhane tutalrupunu, la sikaswi ku kaimadhane, ai madha silakelakete, amani lu kaigipi.

¹⁹ Kwi lalasu lu mu tali latadre ka kalatadrane si kielre ki laumawmase, lri paswalana mwalra kudra silaimai lini sa ikai ki daane ki Twaumase kauawngu, la suru pikai ki cakarane ki daane ki Twaumase, la silaimai ku drumane ka laimai, amani lu pakadula ki laumawmase kwini saniange ka laimai.

²⁰ “Kwi labarakalai kai lri maka kikiriti ku awlru kai lri maka elrenge ku isiu. Ku isiu lri kaciane tutakekelreetane.

²¹ Ku labarakalai lulri mwa ki tali daane ka kalatadrane, kai lri maka ungulu sanaka baava.

²² Ku barakalai kai lri maka mwa karudrange ki cacapange ka walibakane si makakatwasenga ka ababai. Kathaane ku tawvailekete ki swa Iseraylri si redelane kauawngu ka walibakane ku lrika adulrwane lini mwa karudrange.

²³ “Kwi labarakalai lri bulru ki kawkawluli pathingale pilri ku tinusaniangane si ngwakawmasanane, si lu tulrisilrisi ku mabula si kaika mabula ku lamanemane.

²⁴ Ku labarakalai lri singikai ki hulriceli turingaringau ki rivwane. Kwi lalasu lri singikaai ku kakudhane paluludu ku tatulrisilrisiane ki ngwakai ki takisuswane, la paluludu ki Taisadrasadrane ka vai si tusaniange ka vai.

²⁵ “Ku wapacai ka kinawmasane luka marudrawdrangeini, lalalake, betakane, si kaiyana marudrange mupalrapalrane ka lamataka, ku barakalai madha ngwalalai ku taecengane ki drumane ka kinawmasane ki wapacai si kai kabula ikai ki tatulrisilrisiane.

²⁶ Kwi lasu lu kabulanga, lri tara ukalavana makapitulu ku vai

²⁷ Ala lri maka mudaane mutali daane ka kalatadrane ki daane ki Twaumase kipuawngane, la lri paswalana ngipapasikai patarumara ku Balrithane ki pasalrivane ka lrisi. Amiaku kikai pelaela ka abebeelengenga ka Tamatama.

²⁸ “Ku kipawcungulu ku zaisange ki labarakalai amani kai awngane ki barakalai. Kai barakalai ikai Iseraylri kai lri maka ikai ku kadaengane tutacekecekelane. Amaniaku ku amurikaiyane lini patueelre.

²⁹ Ku Taleke ka lrisi, Balrithane ki pasalrivane ka lrisi, Samupasalrivanane ka lrisi akaneane ki labarakalai patuelre. Ku patarumara si baai nakwane ki swa Iseraylri lri papianga liniane patuelre.

³⁰ Ki caicaili ku aswalaalanga ku nikitalekane si nipatarumarane baai nakwane si ku nipawkalrivilane tusaceacebe lri papia ki labarakalai patuelre. Ku laumawmase lu akame tupange, ku aswalaalanga kadu baadha ki barakalai, luka miyaiya kai, ala lri patarumaraku ku akaesadhane baai ki tacekecekelane numi.

³¹ Ku labarakalai kai lri maka kane kudra ngiapapaacai si kiakace ki waudriwdripi si pacai ka laadhadhame si lawaudriwdripi.”