Izikile 43 - Ngudradreadrekadhane Ka Sisiu 魯凱語聖經

Ku Tamatama siaulri mwa ki daaneini

¹ Kwini umawmase wailuku nakwane mwa ki wacubungu tali talrawane ka lrawlrawdru.

² Wadrelaku ku lrigu ki Twaumase ki swa Iseraylri ku twalai talrawane kainganai. Ku lingauini mia ki bikabiki tugengegenge; kai kadaengane ngwalai ki lriguini si ledra.

³ Kikai maburusi si kudra nadreleli kunadruma sa kabebetethe Yerusalrime ku Twaumase ku maburusi si dreleli ikai babiabila kadravane Kibare ku maburusi maramaraamau. La kirimwaku guruthungane ikai cakena.

⁴ Ku lrigu ki Tamatama walribate lrawlrawdru tali talrawane si mwa ki daaneini.

⁵ Ku Ri ki Tamatama wamalra nakwane cidingi, si ililuku nakwane mwa tali daane ka kalatadrane. Ikai kwini, wadrelaku ki daane ki Twaumase swaeete ku lrigu ki Tamatama.

⁶ Kwini umawmase acegeecege ikai thili nakwane; la kilalraku ki Tamatama twalai ki daaneini kawriva nakwane.

⁷ Amia kai, “Lri tara kawlrau ka umawmase, kikai taikaiyane kai yai taetalaneli; lri ikaiyaku ki swa Iseraylri, si kapalralrawthunga rathudu liniane. Ku swa Iseraylri si latalialalai lini kai lri sukubunga ki lasamiamiange lai kai lri cegecegenga ku nagane ki wapacainga ka latalialalai tusinalreme ki saniange ka naganeli.

⁸ Ku lrawlrawdru ki daane ki talialalai lini si ulrudru ki lrawlrawdru wadeethe ki daaneli cucubungu ruka si ulrudru ki lrawlrawdru, vaeva ku balingibingi ki kadadalranane ku waagisi. Kwi lalasu naarakainga ku ngilisianane ku kakwakudhane lini tudreadrekase nakwane, lakamani sakagirimucaku si amudu liniane.

⁹ Kaiasasane kwi lalasu lri tara idrengere ku asukubane ki lasamiaminge, lri buruku mwalra kudra pasikai lini cegecege ku nagane ki aswalalala ka latalialalai, luka ngimiyaiya kai, lrika palralrawthungaku ikai liniane.

¹⁰ “Lri tara kawlrau ka umawmase, kudra lrika atungimiyaiyane ku daane ki Twaumase pelaela ki swa Iseraylri, kwi lalasu lani kinkiu. Pangitatainwa liniane kwi pasalrivane lini.

¹¹ Kwi lalasu alaiyasi ngitatainu, papianga liniane pelaela lalrwai ku lrika atungimiyaiyane kai daane ki Twaumase: Paelre ku zega kai ki daane ki Twaumase, ku tamasasawlriane mudaane mulatadre, ku tangimiamiane tali latadre, ku apangiraeragelanane tali daane, si la apangimiane ku lakakwakudhane. Pacasa kikai patueelre, kwi lalasu lani thingale ku apangimiane pangiraeragelane, si singikai ku kakwakudhane kaungu.

¹² Ku kakwakudhane kai ki daane ki Twaumase miyaiya kai: Lri tudaane pikai belenge lregelrege, ku ngiathalringulu ki daane ki Twaumase saniange ka kadaengane patuelre.”

Tapatarumaramarane

¹³ Ku takathane ki tapatarumaramarane amani kai lebe: Ku saarakaiyane lekete ki tapatarumaramarane si saarakaiyane lekete ki daane ki Twaumase mararaamau. Ku taikaiyane ki tapatarumaramarane ngithalringulu yakai ku varurukuru, ku mwadringane malrimale ka kunhunge, ku ngulapane laka malrimale ka kunhunge, ku babiabila 25 ka kunhunge ku mubelengane.

¹⁴ Ku salelebenga ki tapatarumaramarane twalai lebe ki varurukuru asipi vaeva ka mituru ku abelengane; ku kabicelrakane twalai latadre ki saleleebenga arwa papudadaane ku malrimale ka kunhunge, ku ubelengane drusa ka mituru. Ku sabebelenge la twalai ki kabicelrakane aru papudadaane ku malrimale ka kunhunge.

¹⁵ Ku sabebeelengenga, amaninga kudra talamalamane ku sapatarumarane, mialri ka drusa ka mituru ku abelengane, maececebe ki piu wauthudu tulawngu.

¹⁶ Ku belenge ki tapatarumaramarane yai sikake, ku lragiane eneme ka mituru, ku ngulapane eneme ka mituru.

¹⁷ Ku kabicelrakane mialri ka sikake, ku lragiane pitu ka mituru, ku ngulapane pitu ka mituru, ki ngwalalatadre yakai ku babiabila, ku abelengane 25 ka kunhunge. Ku ngwadravane ki varurukuru malrimale ka kunhunge. Ku satatabelenge mwa ki tapatarumaramarane ku tataetaetale yakai tali talrawane.

Patarumara ku tapatarumaramarane

¹⁸ Ku abebeelengenga ka Tamatama amia kai nakwane, “Lri tara kawlrau ka umawmase, kiraraketa kilalra! Kai lebenga ngwakai ki kakudhane ki patarwamara. Lu maka pianga ku tapatarumaramarane, lri ikaisu ki tapatarumaramarane patarumara ku Lama ka lrisi, la paralikiliki ku erai ki niculwane, si malra patarumara baai nakwane.

¹⁹ Kathaane ku zuku ki Lrivi, barakalai ka mwabaibalrithi ki Zaduke kalri maka mwa cucubungu nakwane pasikai kaungu nakwane. Kikai yai amaniaku ka abebeelengenga ka Tamatama ka wadrekase. Lri baaisu liniane ku vaeva ku lrulai ka sawvalai ka lwange tu Balrithane ki pasalrivane ka lrisi.

²⁰ Lri arakaisu kikai erai ki niculwane drisisi pikai ki sabebeelengenga kudra ki wauthudu ka supate ka piu, kabicelrakane ka supate ka piu, si ngwababiabilaini. Lri piasu kikai bula ki tapatarumaramarane, si patukudha iniane tusaniange.

²¹ Lri malrasu kudra saarakaiyane tu Balrithane ki pasalrivane ka lrisi ka lrulai ka sawvalai ka lwange iluku mulatadre ki daane ki Twaumase, si ikai kudra ikaiya kwini iyali lama.

²² Luka kaiyane lri arakaisu ku kadrwa ku takatwatumanane ku balase ka kiu tu Balrithane ki pasalrivane ka lrisi. Lri arakaisu ku erai ki kiu bula ki tapatarumaramarane, mararaamau ku taarakaiyanesu ku erai ki lrulai ka sawvalai ka lwange bula ki tapatarumaramarane.

²³ Lu maka bulangasu ki tapatarumaramarane, lri ilukusu ku kadrwa ku takatwatumanane ku lrulai ka sawvalai ka lwange si balase ka nikiubawbalane ka kiu

²⁴ mucucubungu nakwane. Ku labarakalai lri ara timu sabulu pwa ki kinawmasane lini, si tu Lama ka lrisi patarumara baai nakwane.

²⁵ Ki nimaka pitulane, lukakaiya lri patarumarasu ku vaeva ku lrulai ka sawvalai ka lwange, balase ka kiu, balase ka nikiubawbalane ka kiu tu Balrithane ki pasalrivane ka lrisi. Kilakikai nilapulapwane lrika tara kadrwa ku takatwatumanane.

²⁶ Ki nimaka pitulane, ku labarakalai lri bula ki tapatarumaramarane, si patukudha tusaniange.

²⁷ Luka samakavalrulu, ku labarakalai lri ikai ki tapatarumaramarane pasikai ki laumawmase patarumara ku Lama ka lrisi si Sulivatane ka lrisi. Lukamiyaiya kai, lri tarumaraku numiane. Amiaku kikai pelaela ka abebeelengenga ka Tamatama.”