Izikile 42 - Ngudradreadrekadhane Ka Sisiu 魯凱語聖經

Adeethe ki daane ki Twaumase ka taidrusa ka daane

¹ Kwini umawmase waililuku nakwane mwa tali latadre ka kalatadrane, si mudaane ki taingeea ka daane itali dradha ki daane ki Twaumase; kikai daane ku tadailane kudra ki kiatukudha ki daane ki Twaumase itali sapakalriwgu kudra ki daane adeethe.

² Kikai daane ku lragiane malrimale ka mituru, ku ngulapane 25 ka mituru.

³ Ku tali thili wacubungu thili ki daane ki Twaumase mangeale ka mituru ku swadravane ka kadrwa ku manemane, ku tali thili la cubungu ki nidralriane ara lrenege tali latadre ka kalatadrane. Kikai daane situlrulu macuculrudu, ku sabebelenge sutitiki ki salelebe.

⁴ Tali dradha ki daane yakai ku kadalranane, ku ngulapane lrima ka mituru, ku lragiane malrimale ka mituru, ku lrawlrawdru wacubungu tali dradha.

⁵ Ki daane ku sabebeelengenga sutitiki ki kabicelrakane si saleleebenga, luka sivale arwa papudadane ka titikiane.

⁶ Kikai la taikaikaiyane piabelenge ki ruka, kai maiya ki yakalatadrane ki drumane ka ladaane ikai ku ulrudru pawlrudru.

^7-8 Ku balingibingi tali latadre ki saleleebenga ku kudremelrane 25 ka mituru, ki taikaikaiyane laka 25 ka mituru. Ku sabebelenge taikaikaiyane patuelre.

^9-10 Ku lebe kikai ki lataikaikaiyane, ki sapathagili ki tali talrawane ki balingibingi, yakai ku lrawlrawdru ku samamwa tali latadre ka kalatadrane. Tali lrawdru ki daane ki Twaumase, ku yatali sapakalriwgu ki daane ki Twaumase kudra daane ikai deethe yakai ku taingeea ku mararaamau ka daane.

¹¹ Cucubungu kwini ki daane yakai ku kadalranane, mararaamau kudra yatali dradha ku taingeea ka daane. Kwini daane ku tasuthane, tapangimiane, si lrawlrawdru mararaamau kwidra ki taingeane ka daane.

¹² Tali lrawdru kudra la daane lebe, ikai ki tapathagilane ki tali talrawane ka balingibingi mialri ikai ku lrawlrawdru.

¹³ Kwini umawmase peaelaela nakwane, “Tali talrawane si tali lrawdru kilakikai daane saniange patuelre. Ku lri mucucubungu ki Tamatama ku labarakalai yakai kai kane ku sanianiangenga ku sangu patarumarane. Asi lwiyane saniange kikai lataikaikaiyane, ku labarakalai lri malra kwini sanianiangenga ka sapatarumarane: Taleke ka lrisi, Balrithane ki pasalrivane ka lrisi, si Samupasalrivanane ka lrisi suru pikai kwini.

¹⁴ Ku labarakalai lu mudaane ki daane ki Twaumase la lri mulaatadrenga yai, kwi lalasu lri tara suru kwini silaimai lini sa kisikawkawlu ki Tamatama. Kwi lalasu lri tara silaimai ku drumane ka laimai ala lri dulru mwa ki tayelrelreane ki langumawmawmase.”

Ku tasuthane ki ngiathalringulu ki daane ki Twaumase

¹⁵ Kwini umawmase samaka leketenga tali daane ki daane ki Twaumase, waililuku nakwane lribate lrawlrawdru tali talrawane, si katwase lekete ngithalringulu ki daane ki Twaumase.

¹⁶ Kwi lasu arakai ku acepange ka angatu katwase lekete, tali talrawane ku lragiane 250 ka mituru,

^17-19 la lekete tali dradha, tali lrawdru, tali sapakalriwgu, ku lragiane lini 250 ka mituru.

²⁰ Ku niravadrane pangithalringulu kikai kadaengane ku lragiane 250 ka mituru, ku ngulapane 250 ka mituru. Kikai ngiathalringulu ka saravadrane wamalra apatatukudha ki saniange ka kadaengane si ngwakawmasane ka kadaengane.