Izikile 41 - Ngudradreadrekadhane Ka Sisiu 魯凱語聖經

¹ La pacungulu, kwini umawmase ililuku nakwane mwa ki Alrivilrivi ka taikaikaiyane. Kwi lasu walekete ki ulrudru ki balingibingi, ku kudremelrane tulru ka mituru,

² ku ngulapane lrima ka mituru, maecebe ki balingibingi, ku kudremelrane tara 2.5 ka mituru. Kwi lasu la leeketenga ki Alrivilrivi ka taikaikaiyane, ku lragiane mapusale ka mituru, ku ngulapane mangeale ka mituru.

³ Kwi lasu ala mudaane. Kwi lasu walekete kwini ki ulrudru ki balingibingi, ku kudremelrane vaeva ka mituru, ku ngulapane tulru ka mituru, ki maecebe ka balingibingi ku kudremelrane taratulru si apararamau ka mituru.

⁴ Kwi lasu la leeketenga tali daane, ku lragiane mangeale ka mituru, ku ngulapane mangeale ka mituru. Kwi lasu peaelaela nakwane, “Kikai yai Alrivilriviilrivinga ka taikaikaiyane.”

Adeethe ki balingibingi ki daane ki Twaumase ka lacakare

⁵ Kwini umawmase walekete tali daane ka balingibingi ki daane ki Twaumase, ku kudremelrane tulru ka mituru. Ki balingibingi talikai ki daane ki Twaumase ngithalringulu yakai ku lacakarane, ki lacakarane ku swadravane drusa ka mituru.

⁶ Kwini cakarane tulru macuculrudu, ki sivaale talumatulrulu ku taikaikaiyane. Tali latadre ki balingibingi ki daane ki Twaumase luka sivale tuvarurukuru ki salelebe, ku sabebelenge malubibiri ki salelebe, ngwalai kai ku cakarane adulrwane madu pikai ki wauguthu ikai ki balingibingi belenge, kai lri kedrekedrenga.

⁷ Lukamiyaiya kai, lu salatadrane drele, ku balingibingi ki daane ki Twaumase, twalai belenge papulelebe, ku kudremelrane maramaraamau. Ku ngwakai tali latadre ki balingibingi ki daane ki Twaumase si latadre kilakikai cakarane yakai ku ngwaadrau ku tataetaetale, ku umawmase lri dulru twalai ki saleleebenga mwa ki mwasakadrusa, ala mwa ki mwasakatulru.

^8-11 Ku balingibingi tali latadre ki lacakarane ku kudremelrane 2.5 ka mituru. Tali dradha ki daane ki Twaumase yakai ku vaeva ku lrawlrawdru wadulru mwa ki lacakare, tali lrawdru la mialri ikai ku vaeva ku lrawlrawdru ku wamwa ki lacakare. Wadrelaku ku ngiathalringulu ki daane ki Twaumase 2.5 ka mituru ku ngulapane ka kadrwa ku manemane; kikai kadrwa ku manemane tulru ka mituru ku abelengane, mararaamau ku abelengane kudra wadeethe ki balingibingi ki daane ki Twaumase ka lataikaikaiyane. Kwini ngiathalringulu ki daane ki Twaumase ka kadrwa ku manemane si taikaikaiyane ki labarakalai kabicelrakane kadrwa ku manemane, ku ngulapane mangeale ka mituru.

Tali sapakalriwgu ka daane

¹² Tali sapakalriwgu ki daane ki Twaumase kikai swadradrau ka kadaengane ka kadrwa ku manemane ikai ki taalikaiyane yakai ku vaeva ku daane, ku lragiane 45 ka mituru, ku ngulapane 35 ka mituru, ku ngiathalringulu ku balingibingi ku kudremelrane 2.5 ka mituru.

Ku takathane ku lekete ki daane ki Twaumase

¹³ Kwini umawmase walekete ki daane ki Twaumase, ku lragiane malrimale ka mituru. Twalai lrilrikudru ki balingibingi ki daane ki Twaumase mwa ki kadrwa ku manemane ka kadaengane ku taalikaiyane tali dradha kudra ki daane, ku tamadadailane malrimale ka mituru.

¹⁴ Cucubungu ki daane ki Twaumase si maecebe ka kadrwa ku manemane ka kadaengane ku lragiane malrimale ka mituru.

¹⁵ Kwi lasu la leeketenga tali sapakalriwgu kudra ki daane ku swadravane, paelre ki maecebe ka ruka, mialri ka malrimale ka mituru. Ki daane ki Twaumase cucubungu ruka, Alrivilrivi ka taikaikaiyane, si Alrivilriviilrivinga ka taikaikaiyane,

Tali daane ki daane ki Twaumase

¹⁶ Twalai lebe mwa ki lribange ki balingibingi arakai ku baali patuelre. Kilakikai lribange wadulru madu elebe.

¹⁷ Ki daane ki Twaumase ngithalringulu ki balingibingi, twalai lebe mwa belenge ki lrawlrawdru,

¹⁸ tali daane tali latadre wapapacase tu Kirubime si tuabare. Apatatilibi ki Kirubime si abare. Sanaka Kirubime drusa ku lringau patuelre:

^19-20 Ku lringau ki umawmase papia tali kai ki abare, ku lringau ki raiyungu papia kai ki abare. Ki balingibingi ngithalringulu, twalai daedae mwa belenge ki lrawlrawdru miyaiya kai patuelre.

²¹ Ku ulrudru ki Alrivilrivi ka taikaikaiyane yai sikake. Ikai cucubungu ki samamudaane ki Alrivilriviilrivinga ka taikaikaiyane yakai ku vaeva

Niara angatwane ka tapatarumaramarane

²² lu drelane mia ki niarakaiyane ku angatu ka tapatarumaramarane, ku abelengane 1.5 ka mituru, ku ngulapane vaeva ka mituru. Ki tapatarumaramarane ki supate ka piu ka ulrudru, ki cucubungu ki tapatarumaramarane, si ngwababiabila niara angatwane patuelre. Kwini umawmase peaelaela nakwane, “Kikai yai nicegecegane picucubungu ki Tamatama ka cukwi.”

Lrawlrawdru ki Alrivilrivi ka taikaikaiyane si Alrivilriviilrivinga ka taikaikaiyane

²³ Ku Alrivilrivi ka taikaikaiyane si Alrivilriviilrivinga ka taikaikaiyane tara yakaai ku vaeva ku lrawlrawdru.

²⁴ Ki lrawlraawdru drusa ku saelelebane, ki vaeva ka saelelebane wadulru madu tu drusa, wadulru madu apacacikipi.

²⁵ Ku lrawlrawdru ki saniange ka taikaikaiyane nipapacasane tuabare si Kirubime, mararaamau ki balingibingi. Ki lrawlrawdru cucubungu ruka ka salalatadre arakai ku baali paidringi.

²⁶ Cucubungu ruka maecebe ka cakarane tara yakaai ku tikiane ka lribange, ki balingibingi wapapacase tuabare.