Izikile 40 - Ngudradreadrekadhane Ka Sisiu 魯凱語聖經

Bavane ka daane ki Twaumase ka maburusi (40.1–48.35) Ku Izikile kiailuku mu Yerusalrime

¹ Satara 25 ka caili ki taacaicaliane nai, ka amani kudra satara 14 ka caili ka aswalalanga ki dramare ka samakamangeale ka vai ku takimalrane Yerusalrime, ku maadrau ka puku ki Tamatama mwalebe mwa ki kinawmasaneli, si malra nakwane ililuku katwase.

² Ikai ki maburusi, ku Tamatama wailuku nakwane mwa ki kadaengane Iseraylri, si malra nakwane pikai belenge ki vaeva ka lregelrege. Wadrelaku ku mia ki vaeva ka cekele ku tatudaanane.

³ Ku Twaumase wailuku nakwane mwa kwini; la drelaku ku tangeea ka umawmase mia ki lriwlu ledra, ku alrima la ecenge ku calrisi si lekete ka angatu, la acegecege ikai sawalatadre ki lrawlrawdru.

⁴ Kwini umawmase amia kai nakwane, “Lri tara kawlrau ka umawmase, pudriadringadha drele, la kirarakete kilalra, si pudriadringai kirarakete ku baaili pelaela muswane, asi lwiyane amani kai ku tangadrane ku takiilukanesu mwa kai. Kudra drelesu patuelre pelaela ki swa Iseraylri.”

Tali talrawane ka lrawlrawdru

⁵ Wadrelaku ku daane ki Twaumase, ki ngiathalringulu yakai ku raedre. Kwini umawmase la ecenge ku vaeva ka tulru ka mituru ku lragiane ka acepange ka angatu, si lekelekete ki raedre. Ku ubelengane tulru ka mituru, ku kudremelrane tulru ka mituru.

⁶ Pacungulu, kwi lasu la kela ki wacubungu tali talrawane ka samamudaane ka lrawlrawdru, sa mwanga tataetaetale ki lrawlrawdru, ikai belenge ki tataetaetale la lekete tali latadre ki lrawlrawdru, tulru ka mituru ku mwadringane.

⁷ Sa lribatenga ki lrawlrawdru yakai ku maecebe ku balingibingi ka kadalranane; kwini maecebe ku balingibingi ka kadalranane maecebe tara yakaai ku tulru ku daane ki tarakadrekadrenge. Ki vaeva ki daane ki tarakadrekadrenge tulru ka mituru maececebe; kwini ki ladaane yakai ku balingibingi agisi, ku kudremelrane drusa ka mituru. Lu lribatanenga kilakikai daane ki tarakadrekadrenge, la ikaiyana tali daane ku lrawlrawdru tulru ka mituru ku mwadringane, wadaruru ki vaeva ki ruka ki lrawlrawdru; kikai ruka ki lrawlrawdru wacubungu ki daane ki Twaumase.

^8-9 Kwi lasu la lekete ki lrawlrawdru ki ruka, supate ka mituru ku mwadringane. Kikai lrawlrawdru ki ruka yakai ki takamudane ki yakai ku balingibingi ka kadalranane, talikaiyane kavai deethe ki daane ki Twaumase; kwini yakai ku balingibingi ka kadalranane maecebe ku ulrudru ku kudremelrane vaeva ka mituru.

¹⁰ Maecebe ki yakai ku balingibingi ka kadalranane tara yakaai ku tulru ka daane ki tarakadrekadrenge, ku takadravane maramaraamau, ku saagisane ku ulrudru ku kudremelrane la mialri maramaraamau.

¹¹ Kwini umawmase la lekete kwini ki samamudaane ki lrawlrawdru, ku ngwadravane ki lrawlrawdru lrima ka mituru, ku yakai ku balingibingi ka kadalranane ku ngwadravane eneme si apararamau ka mituru.

¹² Ku cucubungu ki daane ki tarakadrekadrenge patuelre yakaai ku aleebe ku balingibingi: Ku mubelengane malrimale ka kunhunge, ku kudremelrane malrimale ka kunhunge, ki daane adringi tulru ka mituru maececebe.

¹³ Kwi lasu la leeketenga kwini ki maecebe ka daane ki takadrekadrengane ki latadre ki balingibingi ku tamadadailane, 12.5 ka mituru.

¹⁴ Ki talikaiyane ki yakai ku balingibingi ka kadalranane ka lrawlrawdru ki ruka papia kalatadrane; kwi lasu walekete ki lrawlrawdru ki ruka, ku ngwadravane mangeale ka mituru.

¹⁵ Kai yakai ku balingibingi ka kadalranane, twalai kai ki madradrau ka lrawlrawdru mwa lrilrikudru ki balingibingi ki lrawlrawdru ka ruka, ku lragiane 25 ka mituru.

¹⁶ Ku latadre ki balingibingi ki ladaane ki tarakadrekadrenge patuelre yakaai ku tikiane ku lribange, kabicelrakane ki ulrudru ki balingibingi la mialri ikai ku tikiane ku lribange, ngithalringulu ki ruka ki lrawlrawdru mialri ikaai ku tikiane ku lribange patuelre. Ki yakai ku balingibingi ka kadalranane maecebe ku ulrudru ki balingibingi laka nipapacasane tuabare patuelre.

Tali latadre ka kalatadrane

¹⁷ Kwini umawmase waililuku nakwane mwa tali latadre ka kalatadrane. Kikai tali latadre ka kalatadrane ngithalringulu deethe tali latadre ki balingibingi matulrulu ku daane, ku latadre ki daane nidralriane arakai ku lrenege ki kadalranane,

¹⁸ Kikai tadralriane ki kadalranane pangiathalringulu ki tali latadre ka kalatadrane. Kai tali latadre ka kalatadrane alelebe ki tali daane ka kalatadrane.

¹⁹ Ki tali daane ka kalatadrane yakai ku vaeva ku lrawlrawdru, abebelenge ku vaeva ka taetalane ki tali latadre ka kalatadrane; kikai lrawlrawdru yai tangukaikaiyane masasawlri twalai latadre ka kalatadrane mwa tali daane ka kalatadrane. Kwini umawmase la lekete ku tamadadailane kai ki drusa ka lrawlrawdru, ku lragiane malrimale ka mituru.

Tali dradha ka lrawlrawdru

²⁰ Kwini umawmase walekete kwini papia tali latadre ka kalatadrane ka wacubungu tali dradha ka lrawlrawdru.

²¹ Kwini yakai ku balingibingi ka kadalranane maecebe tara yakaai ku tulru ka daane ki tarakadrekadrenge. Kwi maecebe ka ulrudru ki balingibingi si ruka ki lrawlrawdru ku takathane mararaamau ki lrawlrawdru tali talrawane, ku lragiane 25 ka mituru, ku ngulapane 12.5 ka mituru.

²² Ku ruka ki lrawlrawdru, lribange, si nipapacasane tuabare ka ulrudru ki balingibingi mararamau ki lrawlrawdru tali talrawane patuelre. Ku samamudaane ki yakai ku balingibingi ka kadalranane pitu ka tataetaetale papia tali dradha ki lrawlrawdru, ku takamudane ki yakai ku balingibingi ka kadalranane yakai ku vaeva ku lrawlrawdru ka ruka papia tali latadre ka kalatadrane.

²³ Kikai lrawlrawdru magisi ki tali latadre ka kalatadrane, cucubungu la ikaiyana ku vaeva ka lrawlrawdru, papia tali daane ka kalatadrane. Kwini umawmase la lekete ku tamadadailane kai ki drusa ka lrawlrawdru, ku lragiane malrimale ka mituru.

Tali lrawdru ka lrawlrawdru

²⁴ Kwini umawmase waililuku nakwane mwa tali lrawdru; la drele nai ku wacubungu tali lrawdru ku lrawlrawdru. Kwi lasu la lekete kai ki lrawlrawdru; ku daane ki tarakadrekadrenge, ulrudru ki balingibingi, si lrawlrawdru ruka ku takathane maramaraamau ki drumane ka lrawlrawdru.

²⁵ Kikai lrawlrawdru si lrawlrawdru ruka ngithalringulu yakaai ku tikiane ku lribange patuelre. Ku yakai ku balingibingi ka kadalranane ku lragiane 25 ka mituru, ku ngulapane 12.5 ka mituru.

²⁶ Ku samamudaane ki yakai ku balingibingi ka kadalranane yakai ku pitu ku tataetaetale mwa belenge mwa lrawlrawdru tali lrawdru, kudra takamudane ki yakai ku balingibingi ka kadalranane ka lrawlrawdru ki ruka papia tali latadre ka kalatadrane. Maecebe yakai ku ulrudru ki balingibingi, ki ulrudru wapapacase tuabare.

²⁷ Kikai lrawlrawdru wacucubungu ki papia ki tali daane ka kalatadrane. Kwini umawmase la lekete ku tamadadailane kai ki drusa ka lrawlrawdru, ku lragiane malrimale ka mituru.

Tali lrawdru ka lrawlrawdru ki tali daane ka kalatadrane

²⁸ Kwini umawmase waililuku nakwane twalai tali lrawdru ka lrawlrawdru mudaane mwa ki tali daane ka kalatadrane. Kwi lasu walekete ki tali daane ka kalatadrane tali lrawdru ka lrawlrawdru, ku takadravane mararaamau ki tali latadre ka kalatadrane.

^29-30 Kikai mialri ikai ku daane ki tarakadrekadrenge, lrawlrawdru ka ruka, si ulrudru ki balingibingi, ku takadravane mararaamau ki drumane ka lrawlrawdru. Ngithalringulu ki lrawlrawdru si lrawlrawdru ka ruka yakai ku tikiane ka lribange patuelre. Ku yakai ku balingibingi ka kadalranane ku lragiane 25 ka mituru, ku ngulapane 12.5 ka mituru.

³¹ Ku lrawlrawdru ka ruka papia tali latadre ka kalatadrane; maecebe ki yakai ku balingibingi ka kadalranane ki balingibingi wapapacase tuabare. Lu mubelengane kai ki lrawlrawdru yakai ku valru ka tataetaetale.

Tali talrawane ka lrawlrawdru ki tali daane ka kalatadrane

³² Kwini umawmase waililuku nakwane mwa ki tali daane ka kalatadrane ki tali talrawane ka lrawlrawdru. Kwi lasu walekete tali talrawane lrawlrawdru ka tali daane ka kalatadrane, ku adravane mararaamau ki drumane.

³³ Kikai mialri ikai ku daane ki tarakadrekadrenge, lrawlrawdru ka ruka, si ulrudru ki balingibingi, ku takadravane mararaamau ki drumane ki lrawlrawdru. Ngithalringulu ki lrawlrawdru si lrawlrawdru ka ruka yakaai ku tikiane ku lribange. Ku yakai ku balingibingi ka kadalranane ku lragiane 25 ka mituru, ku ngulapane 12.5 ka mituru.

³⁴ Ku lrawlrawdru ka ruka papia tali latadre kalatadrane; maecebe ki yakai ku balingibingi ka kadalranane ki balingibingi wapapacase tuabare. Belenge kai ki lrawlrawdru yakai ku valru ka tataetaetale.

Lrawlrawdru tali dradha ki tali daane ka kalatadrane

³⁵ Kwini umawmase waililuku nakwane mwa lrawlrawdru tali dradha. Kwi lasu walekete lrawlrawdru tali dradha ki tali daane kalatadrane, ku takadravane mararaamau ki tali latadre kalatadrane.

³⁶ Kikai mialri ikai ku daane ki tarakadrekadrenge, ulrudru ki balingibingi, si lrawlrawdru ka ruka. Ngithalringulu ki lrawlrawdru si lrawlrawdru ka ruka yakaai ku tikiane ku lribange. Ku yakai ku balingibingi ka kadalranane ku lragiane 25 ka mituru, ku ngulapane 12.5 ka mituru.

³⁷ Ku lrawlrawdru ka ruka papia tali latadre ka kalatadrane, ki maecebe ku balingibingi ka kadalranane ki balingibingi wapapacase tuabare. Belenge kai ki lrawlrawdru yakai ku valru ku tataetaetale.

Cakarane

³⁸ Tali latadre ka kalatadrane yakai ku vaeva ku cakarane, mararaisi ki papia tali daane ka kalatadrane tali dradha lrawlrawdru ki lrawlrawdru ka ruka, ka tasinasinavane ki waudriwdripi ki Lama ka lrisi.

³⁹ Ki lrawlrawdru ka ruka piakai ku supate ku cukwi, ki thili drusa, kilakikai cukwi taculuculwane ki waudriwdripi ki Lama ka lrisi, Balrithane ki pasalrivane ka lrisi, si Samupasalrivanane ka lrisi ka waudriwdripi.

⁴⁰ Kudra latadre ki lrawlrawdru ka ruka samamudaane ki tali dradha lrawlrawdru yakai ku supate ku cukwi, ki thili drusa.

⁴¹ Laka miyaiya kai, valru ku cukwi ku sarakaikaiyane culu ki apatarumarane, ikai tali daane ki lrawlrawdru ka ruka supate, ikai tali latadre ki lrawlrawdru ka ruka supate.

⁴² Kwini supate ka cukwi yatali daane ki lrawlrawdru ka ruka taculuculwane ki waudriwdripi ki Lama ka lrisi. Kilakikai cukwi yai tinulrenegane, ku mubelengane malrimale ka kunhunge, ku lragiane 75 ka kunhunge. Ku sarakaikaiyane culu ki lasapatarumarane piabeelenge ki cukwi patuelre.

⁴³ Ki cukwi ngubabiabila twa varurukuru ka 7.5 ka kunhunge ku ngwadravane. Ku sarakaiyane patarumara ku labeate piakai belenge patuelre.

⁴⁴ Kwini umawmase waililuku nakwane mwa tali daane ka kalatadrane. Kwini tali daane ka kalatadrane yakai ku drusa ku daane, ku vaeva yakai thili tali dradha lrawlrawdru, wacubungu tali lrawdru, ku vaeva yakai thili tali lrawdru lrawlrawdru, wacubungu tali dradha.

⁴⁵ Kwini umawmase peaelaela nakwane, kwini wacubungu tali lrawdru kwi daane yai taikaikaiyane ki mauawngu ikai ki daane ki Twaumase ka labarakalai,

⁴⁶ Kwini wacubungu tali dradha kwi daane yai taikaikaiyane ki yacucubungu ki tapatarumaramarane kauawngu ka labarakalai. Ku labarakalai mwabaibalrithi ki Zaduke makanaelre. Ikai ki zuku ki Lrivi, kathane kwi lalasu ku lri maka mucucubungu ki Tamatama pasikai kaungu.

Tali daane ka kalatadrane si daane ki Twaumase

⁴⁷ Kwini umawmase walekete ki tali daane ka kalatadrane, ku lragiane malrimale ka mituru, ku ngulapane malrimale ka mituru, ka sikake, ku daane ki Twaumase yatali sapakalriwgu, cucubungu yakai ku vaeva ku tapatarumaramarane.

⁴⁸ Pacungulu, kwi lasu la ililuku nakwane mwa ki daane ki Twaumase cucubungu ruka. Kwi lasu la lekete cucubungu ruka, ku mwadringane 2.5 ka mituru, ku ngulapane pitu ka mituru, ki maecebe ka balingibingi ku kudremelrane tara 1.5 ka mituru.

⁴⁹ Ku tataetaetale cucubungu ruka ku ngulapane mangeale ka mituru, ku mwadringane eneme ka mituru. Cucubungu ruka maecebe tara yakaai ku vaeva ku ulrudru.