Izikile 4 - Ngudradreadrekadhane Ka Sisiu 魯凱語聖經

Wagiki ku akilringulane ki Yerusalrime

¹ Ku Tamatama amia kai, “Lri tara kawlrau ka umawmase, malra ku vaeva ku lringiga si pikai ki cucubungusu, la zega ku vaeva ku cekele maru Yerusalrimenga pikai belenge,

² la lrukwa pangithalringulu ki cekele tusiru, si raedre ku tasakaiyane kikaruburu, si tasulasuladhane ki kwapingi, la darepa tupangulru ka saarakaiyane buruku ki cekele, sapatuthingalane ka kialringulu ku cekele.

³ Ala, lri malrasu ku vaeva ku adreme si cegecege pikai kabicelrakane muswane si cekele tubalingibingi. Lri cucubungusu kai ki cekele, sapatuthingalane ka kialringulu ku cekele, ku walringulu ki cekele laka amanisu. Amani kai ku baaili ki swa Iseraylri ka sasakaladhane.

^4-5 “Pacungulu, lri papiasu viri cicigiane apece; lri malraku ku pasalrivane ki swa Iseraylri si drepete ki kinawmasanesu. Lri ikaisu kwini apece tara 390 ka vai, pasikai ki pasalrivane lini kwalri. Ku tapapecaneli muswane kwini ki vai amani ku taturingaringavananeli ku naika akipathavungane lini ka vai, ku minakavalane ku vai mararaamau ki nitara cailane.

⁶ Kikai sapathavungane lu alikainga, lri papiasu vanale cicigiane apece maka masupatele ka vai, pasikai ki pasalrivane ki swa Yuda kwalri, ku minakavalane ku vai mararaamau ki nitara cailane.

⁷ “Lri cucubungusu Yerusalrime, papia ki kialringulu ka cekele vidrividri kwi alrima, la yugingi kikaruburu kai ki cekele.

⁸ Lri kerengaku muswane, lai kaisu dulru ngibangulu, pakeela ku taalikaiyane ku vai ku takilringulane ki cekele.

⁹ “Pacungulu, lri malrasu ku la titikiane ka mugi, madradrau ka mugi, lepelepe, kavaingiku, becenge, nigwagulrane tubungu ka mugi si thalre lrevege, la tupange. Kikai yai amani kudra akaneanesu lu papiasu viri cicigiane apece tara 390 ka vai,

¹⁰ Ki vaivaai lri kanekaanesu ku 230 kunke, luka kaiya lri singikaaisu ku nikelretaneenga kane.

¹¹ Ki vaivaai lrika aku drwadrwadrusa ki kupu ku akibaadhanesu si ungulu ku acilai.

¹² Lri ikaisu cucubungu ki mapapangale, arakai ku caki ki umawmase twapwi si akame kikai pange la kane.”

¹³ Ku Tamatama amia kai, “Kikai sapelaelane sa pakatwasaku ki swa Iseraylri pumaelane ki kuni, kwi lalasu lri kane kudra kaika palraingi ki hulrice ka kaika mabula ka lamanemane.”

¹⁴ Ai, twabalreaku, “Abebeelengenga ka Tamatama, kainaku ngiapapakakudrulrwana, singi ka lavavalakaku kai kane ku ngiapapaacai, ku kiakane ki waudriwdripi ku lawaudriwdripi. Kainaku wakaneana ku kaika mabula ku akaneane.”

¹⁵ Ku Twaumase la iya kai, “Mathariri, kai lrikatumane arakai ku caki ki lwange paubalrithi ki caki ki umawmase tusapwangatwane, la pibelenge akame ku pange.”

¹⁶ Kwi lasu la iyanga kai, “Lri tara kawlrau ka umawmase, lri pakaamudaku ku taleke ki Yerusalrime, lai lri kakadrwa ku pange. Sana mavalavalavala kudra nikelretaneenga baai ki laumawmase pakane ku pange, paungulu ku acilai, kwi lalasu lri kathekelre, daange tubi.

¹⁷ Kwi lalasu lri kane eleme kwi pange, lai ungulu patuelre kwi acilai; kwi lalasu lri kasulringa, ngwalai ki pasalrivaneini si aru karilariilai la pacai.”