Izikile 39 - Ngudradreadrekadhane Ka Sisiu 魯凱語聖經

Ku Guge kiapamalebe

¹ Ku abebeelengenga ka Tamatama amia kai, “Lri tara kawlrau ka umawmase, lri kaelaelasu ki Guge ka warathudu ki drusa ka kuni ka Meseke si Tubale. Pelaela iniane, amiaku kaika abebeelengenga ka Tamatama: Lri kiecebaku muswane.

² Lri malraku balre muswane, si ililuku muswane katwase ki sadradradhanga ki kadaengane, la ililuku muswane mubelenge ki lalregelrege ki swa Iseraylri.

³ Ala lri mwalraku kwi ecenge ki virisu kwi bu, ecenge ki vanalesu kwi lraili.

⁴ Kusu si lakwapingisu, si la ngiaelre ka lakwapingi lri pacai ikai belenge lregelrege ki swa Iseraylri makanaelre. Kwi lawapacai ka kinawmasane numi lri tuakaneanaku ki langwababelenge ka ngiapalapalai ka adhadhame si lawaudriwdripi.

⁵ Lri ngisarade numi pacai ikai ubulane. Amiaku kai pelaela, ka abebeelengenga ka Tamatama,

⁶ Lri lamaku ki kadaengane ki swa Maguge si yakai ki ngwababiabila ki laveke kathaithaithariri ku tacekecekelane ka laumawmase. Luka ngimiyaiya kikai, lri thingale numi ala ka Tamatamaku.

⁷ Lri pudriadringadhaku pathingale ki kawkawluli kai naganeli ala ka saniange, kainaku lri pakitusinalremenga kai naganeli. Luka ngimiyaiya kikai, ku lakuni lri thingale nakwane ka Tamatama ka sanianiangenga ka Twaumase ki swa Iseraylri.”

⁸ Ku abebeelengenga ka Tamatama amia kai, “Kudra paswalali pelaela kudra vai kwini lri tara keela.

⁹ Ku umawmase ki lacekele ki swa Iseraylri lri katwase siludu kudra nicilriane ku lasakikaruburuburane si tuangatu twapwi. Kwi lalasu lri malra ku laalathare, labu, lalraili, laidiri lapangulru si tuangatu twapwi; kilakikai makalra turamuru lri dulru madu arakai pwangatu tarapitu ka caili.

¹⁰ Kwi lalasu kai lri muubulanenga siludu ku angatu, lai kai lri mwanga angatungatu kiangatu, asi lwiyane kwi lalasu yakai kwi apwangatwane lini kwi lacinilriane ka nasakikaruburuburane. Kwi lalasu lri ribici kudra ki nawaribici liniane ku umawmase, lai lri ravase kudra ki nawaravase liniane ku umawmase.” Ku abebeelengenga ka Tamatama amia kai pelaela.

Takidralrekane ki Guge

¹¹ Ku Tamatama amia kai, “Kikai lu ngimianga, lri ikaiyaku Iseraylri, ikai tali talrawane ki Titimwane ka laveke ka ‘Talribalribatane ki umawmase ka valrwalru’ silape ku taluvaale ku tadralredralrekane si baai ki Guge. Ku Guge si lakwapingini lri ikai kwini kidralreke makanaelre. Ki kikai valrwalru yai sia ‘Kwapingi ki Guge ka valrwalru’.

¹² Ku swa Iseraylri lri tarapitu ka dramare ala lri maka dralreke ki wapacai patuelre, ala lri kabula kwini kadaengane.

¹³ Kwi lalasu lri pakuniane makanaelre kamani ku wadralreke; ikai ki taakacianeli ka vai, kwi lalasu lri ngwalai kikai si lri kipicucubungu kilrigu. Amiaku kai pelaela ka abebeelengenga ka Tamatama.

¹⁴ Lu tara pitunga ka dramare, kwi lalasu lri pakatwase ku umawmase ku lri pacungulu dadavace drele mwa kidruanga, lai lri dralreke kudra yataluvaivaiyana ku lakinawmasane ki wapacai, luka ngimiyaiya kai kwi lalasu ala lri pakabula ki kadaengane.

¹⁵ Kwi lalasu lri salraelre ki cekele dadavace drele, sana drele ku culrale ki wapacai lai lri patuthingale pikai thili ki culrale, ku lrika adralrekane pikai ki ‘Kwapingi ki Guge ka valrwalru’ ki taralrukulruku ki tadralredralrekane.

¹⁶ (Ikai deethe yakai ku vaeva ka cekele ku lri sinagane kikai nagane ki lakwapingi.) Luka ngimiyaiya kikai, kwi kadaengane lai lri ngipelane kabula.”

¹⁷ Ku abebeelengenga ka Tamatama amia kai nakwane, “Lri tara kawlrau ka umawmase, lri patwalaisu kidruanga dawlu ki makaelaela ka ngiapalapalai walrawlrakwane ka waudriwdripi lani kainganai si kane kwi pasikaili liniane padulru kwi sapatarumarane ka beate. Ikai belenge ki lalregelrege ki swa Iseraylri lri ikai ku matidrareareange ku ngiakanekaneane, kwini lawaudriwdripi lri ikai kwini kanekane ku beate ungungulu ku erai.

¹⁸ Kwi lawaudriwdripi lri kane ku beate ki lakwapingi, lai lri ungulu ku erai ki latarasangililuku kai ki kawmasane. Kilakikai kwapingi lri mia ki balase ka nikiubawbalane ka kiu, lrulai ka kiu, kakiuane, sawvalai ka lwange, si lwange ka Basane ka maricuru ka kiaculu.

¹⁹ Lu culwaku kikai ki lakwapingi mia ki waculu ku sapatarumarane ku nilapulapwane, ku langiapalapalai ku adhadhame walrawlrakwane ka lawaudriwdripi lri ngilralraaingi ngulwadhane kane ku beate, ungulu ku erai, pakeela ku takabucukane si kabusuku tubakebake.

²⁰ Kwi lawaudriwdripi lri ikai ki takanekaneaneli ka cukwi kane kabucuku ku beate ki lasakikaruburuburane ka rigi, latarangurigirigi ka kwapingi, si lakwapingi patuelre. Amaniaku ka abebeelengenga ka Tamatama ka amia kikai pelaela.”

Angiradhekanane ki swa Iseraylri

²¹ Ku Tamatama amia kai, “Lri padrelaku ki lakuni ku lriguli, kwi lalasu lani drele ku tapangimianeli arakai ku puku kaungu ku aparamaramavane turingaringau.

²² Twalainga kai, kai swa Iseraylri lri thingale ala ka Tamatamaku ka Twaumase lini.

²³ Ku lakuni lri pulringawnga kai swa Iseraylri aka ngwalai ku tapasalrivane nakwane si kipakatwase. Wacilriaku liniane, si kai sirapale liniane, la paamaki liniane ku badha, papacai liniane.

²⁴ Pawacugaku ku kudrulru si ngangane lini. Wacilriaku liniane, si kai sirapale liniane.”

²⁵ Ku abebeelengenga ka Tamatama amia kai, “Ai lri kakalithaku ki mwabaibalrithi ki Yakubu ka swa Iseraylri, kwi lalasu lani pudriadringai tupela tutacekecekelane, lri palakebaku ki saniange ka naganeli.

²⁶ Kwi lalasu lri siwlriwlriane ikai suteelrai ki kadaengane lini. Kadrwanga ku umawmase ku lri kukuludru liniane, kwi lalasu lai lri karimuru ku tabaebalreane lini nakwane si kitusinalreme.

²⁷ Pakai ku athingalane ki lakuni ala ka sanianiangenga naku, lri patwaladhaku liniane ki badha ililuku siwlri mubalriu.

²⁸ Lukamaninga kwidra, ku kawkawluli lri thingale nakwane ka Tamatama ka Twaumase lini; asi lwiyane ku siaswalane pakatwasaku liniane, kikainga la sarubungaku liniane, si ililuku liniane siwlri mubalriu, kadrwa ku natangeeanga ku asuru.

²⁹ Lri arakaiyaku ku Rili paralikiliki ki swa Iseraylri, kainaku lri cilringa liniane lutumane. Amiaku kai pelaela ka abebeelengenga ka Tamatama.”