Izikile 38 - Ngudradreadrekadhane Ka Sisiu 魯凱語聖經

Ku Guge yai sarakaikaiyane ka lamanemane ki Tamatama

¹ Ku Tamatama kawariva nakwane; amia kai,

² “Lri tara kawlrau ka umawmase, lri kaelaelasu ki Guge ka warathudu ki swa tali Maguge ka taidrusa ka kuni ka Meseke si Tubale. Lri kaelaelasu iniane,

³ pelaela iniane, amiaku kikai ka abebeelengenga ka Tamatama: Lri kiecebaku muswane.

⁴ Lri malraku balre muswane, la arakai ku sakakaili si kaili ki calringasu, la malra pakarededele bilibili muswane si sangililukusu ka lakwapingi. Ku kwapingisu makalra ku sakikaruburuburane ku rigi si sialaimai ku madeemele ku laimai ki kwapingi ka latarangurigirigi. Sanaka kwapingi sia alathare si dramu.

⁵ Ku kwapingisu yakai ku twalai Perisia, Kuse, si Pute, ka nidawlane mulrawlrau akwapingi; kwi lalasu waecenge ku alathare, la sitalrupunu ku talrupunu ki kwapingi.

⁶ Ku drumane yakai ku twalai Gumire, swa tali dradha ka Tugarema kainganai ka lakwapingi, la ikaiyana ku twalai ki lakuni ku kwapingi.

⁷ Kusu pudriadringaadha pakundringi liniane, la mialrisu padulrudulrua ku lrika aililukane marasikai.

⁸ Lu ngilribatenga ku nitarapiane ka caili, lri dawlaku muswane si katwase pamaki ki vaeva ka kuni; kwini kuni kwi laumawmase twalai ki lakuni kainganai mubalriu, kwi lalasu kaiasasane yacengecenge kasulivalivate. Lri mwadringisu ki lalregelrege ki swa Iseraylri; kikai kadaengane kunadruma kiacilringa ki umawmase, ka matisepele, ai kaiasasanenga takaalranga ku umawmase ku swatelrainga ikaikai kwini.

⁹ Ku ililukusu ku lakwapingi, si twalai ki lakuni kainganai tupapalra muswane kikaruburu ku lakwapingi, lri mia ki makudremelre ka ememe kabungu kai ki kadaengane, lri mia ki umuku valrigi palraelre ki kadaengane.”

¹⁰ Ku abebeelengenga ka Tamatama amia kai ki Guge, “Lu kelanga kwidra, lri tavuvulrucungasu si kibubuli madrekadrekase,

¹¹ la mwa drikisi kudra ki lakai watelenge ki badha ka lacekele ka amani kudra ki kadrwa ku balingibingi ka lacekele, kadrwa ku drumane ku satelengane ki badha, si ka mathaithaithariri ku tacekecekelane ku laumawmase ka cekele,

¹² lri malrasu ribici ravase kudra nacinilriane si aubulanenga, kaiasasane laka swaetenga ku laumawmase ka lacekele. Kwini yakaikai kwi laumawmase twalai ki lakuni kainganai yelrelre mwa kai ki kabicelrakane ki kawmasane. Kwi lalasu thathatha ku lanilapulapwane si tacekecekelane.

¹³ Ku swa Seba si swa Didane, si twalai ki lacekele ka Taresise ka latarasiwbawbai lri kivaga muswane, ‘Ku sarubusu ki madrau ka lakwapingi pakai ku aribicane ravase? Kiasanu ribiribicisu ku kingi si gingi, si ililuku ku lanilapulapwane, la malra ku lalawbubulu tuniravasane?’

¹⁴ “Lakamani, lri tara kawlrau ka umawmase, padarura pelaela ki Guge, ku abebeelengenga ka Tamatama amia kai: Sa kathaithaithaririana ku tacekecekelane ki kawkawluli, lri thagilisu katwase.

¹⁵ Lri katwasesu ki tali sadradradhanga kai ki kadaengane, si ililuku kudra ki twalai ki lakuni si ngielre, ka maadrau laka tagagarange ka latarangurigirigi ka kwapingi,

¹⁶ lri kikaruburusu ki kawkawluli ka swa Iseraylri; ku kwapingisu lri mia ki icecelrenge ka ememe kabungu palraelre ki kadaengane. Lukamaninga kwidra, lri pakatwasaku muswane mwa drikisi ki kadaenganeli, lani thingale ku lakuni nakwane; lai lri pangukaiyaku ku tapianesu papia liniane si pathingale ala ka sanianiangenga naku.

¹⁷ Amanisu kudra lri kela ku tangeea ku umawmase iyaiyali kunadruma. Sakamani kwidra, pangwakaiyaku ki sasiakawluli ka layuginsia ki swa Iseraylri pelaela iya kai, lubibilrili lri dawlaku ku tangeea ku umawmase si lri kikaruburu ki swa Iseraylri.” Ku abebeelengenga ka Tamatama amia kikai pelaela.

Ku Tamatama pathavungu ki Guge

¹⁸ Ku abebeelengenga ka Tamatama amia kai, “Luka tadrikisane ki Guge ki swa Iseraylri kwini ki vai, lri kalisiaku.

¹⁹ Lri ikaiyaku ki girimucane pelaela: Ikai kwini ki vai, kai swa Iseraylri lri ikai ku maadrau ku lingilingi.

²⁰ Ku yadringi ki acilai ku lakange, la ngwababelenge ka laadhadhame, ngwalalebe ka latadradrau tatitiki ka waudriwdripi, si laumawmase lri ngwalai ki kiwcane si manugiligili makanaelre. Ku latabebelenge ka lregelrege lri ngangutukadre, ku balingibingi ki cekele lai lri mukadrulu.

²¹ Lri arakaiyaku ku makaelaela ku amatikurwane ku akakiwcane ki Guge. Kwaku ka abebeelengenga ka Tamatama ka amia kai pelaela. Ku lakwapingini lri makalilisi, si mapapacapacai.

²² Lri arakaiyaku ku swalrubu si atueraeradhane pathavungu iniane. Lri arakaiyaku ku maadrau ka udale, kananu, maadrau ka apwi, si balaru pulebe pwa ki kinawmasane ki ililukuini ka lakwapingi si marasikaikaini ka langiaelre ka kwapingi.

²³ Lri piaku kikai padrele ki lakuni ku takasanianganeli, ka sanianiangenga ka Twaumase. Luka amani kwidra, kwi lalasu lri thingale ala ka Tamatamaku.”