Izikile 37 - Ngudradreadrekadhane Ka Sisiu 魯凱語聖經

Peaela panianiake ku marudame ka culrale

¹ Ku madrau ka puku ki Tamatama mwalebe makakai nakwane; ku Rini la ililuku nakwane mwa ki valrwalru. Kwini valrwalru yakai kidruanga ku laculrale.

² Ku Tamatama waililuku nakwane salraelre ki valrwalru; la drelaku ki valrwalru swaeete sapa ku mameealenga ka laculrale.

³ Ku Tamatama la iya kai nakwane, “Lri tara kawlrau ka umawmase, kilakikai culrale lri dulru pelana panianiake?” La tubalreaku, “Abebeelengenga ka Tamatama, kathanesu kalri thingale!”

⁴ Ku Tamatama amia kai, “Papia kikai ki laculrale yugingi, pelaela kai ki rudaedame ka laculrale kilalra ku vaga ki Tamatama iya.

⁵ Pelaela liniane, kwaku ka abebeelengenga ka Tamatama amiaku kai liniane: Lri kingivaalaku ipi puadringi numiane, lanu pelana panianiake.

⁶ Lri pacebeaku ku uvace si beate numi, lai lri cabu ku lrangici. Lri ipaku kingivaale puadringi numiane, lai lri pelana numi panianiake. Luka ngimiyaiya kikai, lri thingale numi ala ka Tamatamaku.”

⁷ La pangimiaku ku drekase ki Tamatama yugingi. Sa icengecengaku iyaiya, kialalraku ku seesee amia ku lingau, la kalrithaavulu, ku laculrale la kirimu marairaisi.

⁸ Sa drelaku, ku larudawdame ku culrale la pathagili cebe ku uvace si tubeate, la cabu ku lrangici, ai kudra kinawmasane kai manianianiake.

⁹ Ku Tamatama amia kai nakwane, “Lri tara kawlrau ka umawmase, papia ki valrigi yugingi, pelaela iniane, ku abebeelengenga ka Tamatama amia kai: Twaladha kidruanga ipi, ipa puadringi kai ki lakinawmasane, kwi lalasu lani panianiake.”

¹⁰ La pangimiaku ku drekase ki Tamatama si yugingi, ku niake la mwadringi ki kinawmasane, ku kinawmasane ala kiriimu panianiake, si acegecege. Ku kalrane lini nai tukwapingi madu.

¹¹ Ku Tamatama amia kai nakwane, “Lri tara kawlrau ka umawmase, kai swa Iseraylri mia kikaai ki wapacai ka kinawmasane. Kwi lalasu lu ngikakidremedreme marudamenga turamuru, kadrwa ku sasiadradrama, kadrwanga ku angimiane.

¹² Lakamani, papia ki kawkawluli ka swa Iseraylri yugingi, pelaela liniane, amiaku kikai ka abebeelengenga ka Tamatama: Lri muelebaku ki takidralrekane numi, si malra numiane pulatadre, la ililuku numiane siwlri mwa Iseraylri.

¹³ Lu muelebengaku ki takidralrekane numi, si ililuku pulatadre numiane, lri thingale numi ala ka Tamatamaku.

¹⁴ Lri ipaku kai niakeli pwadringi numiane, lai lri panianiake numi, si pikai numiane ki kadaengane numi. Luka ngimiyaiya kikai, lri thingale numi ala ka Tamatamaku. Lu kawrivanga naku lri tara ngimiya. Amiaku kikai pelaela ka Tamatama.”

Kai swa Yuda si swa Iseraylri maelre akuni

¹⁵ Ku Tamatama la kawriivanga nakwane; amia kai,

¹⁶ “Lri tara kawlrau ka umawmase, malra ku vaeva ku angatu, la pibelenge pacase ‘Yuda ka kuni’ La malrana ku vaeva ku angatu, la pibelenge pacase ‘Iseraylri ka kuni’.

¹⁷ Ala malra kwini drusa ka angatu ecenge pikai ki alrima, ku tara awlru la apacacungulu si ka vaevanga ka angatu.

¹⁸ Alaiyasi kivaga ku sakacekelesu, kikai yai manemane ku pacugane iya,

¹⁹ peaelaela madu liniane, kwaku ka abebeelengenga ka Tamatama lri malraku kwi wadaihu ki swa Iseraylri ka angatu si apacacungulu ki wadaihu ki swa Yuda kwini angatu, ki kwini drusa ka angatu lai lri ikai ki alrimali avaevanga.

²⁰ “Lri ikaisu cucubungu ki laumawmase ecenge kwini drusa ka angatu, si padrele liniane.

²¹ Ala lri pelaelasu liniane, kwaku ka abebeelengenga ka Tamatama lri malraku ki kawkawluli patwalai ki taacaicaliane lini ki lakuni ililuku kainganai, si sarubu liniane, lai lri ililukaku liniane siwlri mubalriu.

²² Lri ikaiyaku kwini, ikai ki lalregelrege ki swa Iseraylri, malra liniane pangielre, si ngidarepe avaeva ka kuni. Kwi lalasu lri tangeangea ku talialalai ku lri rathudu liniane, kai lri ka drusanga ka kuni.

²³ Kwi lalasu kai lri sukubunga kudra ki matialrase ka lasamiamiange si ngikakudrulru, lai kai ngilisianenga si pasalriu. Lri palribulaku liniane kidaili ki apasalrivane si abaebalreane ku tapanianianiakane. Lri sinavaku bula liniane. Kwi lalasu lri akawkawlu nakwane; lai lri a Twaumasaku liniane.

²⁴ Lri utaluvaivai ku tangeea ku talialalai ku mia ki sasiakawluli ka Davidi; kwi lasu lri atalialalai liniane, ataraagwagu liniane, lri pangielrenga liniane. Kwi lalasu lrika patengatenganenga ku kidremedreme pangimia ku hulriceli.

²⁵ Kwi lalasu lri ikai kwidra patarumarali baai ki sasiakawluli ka Yakubu ku kadaengane, ka amani kudra nataikaiyane ki cucungulane lini kudra kadaengane. Kwi lalasu lrika palralrawthunga ikai kwini, ku mwabaibalrithi liniane lai lri mialri ikai kwini. Yakai kudra tangea ku mia ki sasiakawluli ka Davidi ka talialalai lrika palralrawthunga rathudu liniane.

²⁶ Lri kiketeketaku liniane, ka lrika patengatenganenga ki lalasu kisupisupilri ku sulivatane. Lri paruadiadilaku liniane ikai kwini, lai aruedhaedhale ku umawmase, si ku daaneli lrika palralrawthunga acegecege ikai ki kadaengane lini.

²⁷ Lri ikaiyaku taelre liniane. Lri a Twaumasaku liniane; kwi lalasu lai lri akawkawlu nakwane.

²⁸ Luka palralrawthunga acegecege ku daaneli ikai liniane, ku lakuni lri thingale nakwane ka Tamatamaku ka wapilringa ki swa Iseraylri akawkawluli.”