Izikile 36 - Ngudradreadrekadhane Ka Sisiu 魯凱語聖經

Ku Twaumase patarwamara ku akaesadhane baai ki swa Iseraylri

¹ Ku Tamatama amia kai, “Lri tara kawlrau ka umawmase, padarura kai vagali papia ki lalregelrege ki swa Iseraylri,

² pelaela liniane, kilalra ku taiyaneli kaika abebeelengenga ka Tamatama: Ku badha ki swa Iseraylri natwapeaperavane ku takwalrialriane lini si iya kai, ‘Kudra nasidrumane ka belenge ki lregelrege naianenga patuelre!’

³ “Lakamani, kusu yuginga, si pelaela amiaku kaika abebeelengenga ka Tamatama: Ku pasiagiagisi ka lakuni sa malra ravase ku belenge ki lregelrege ki swa Iseraylri, la drikisi ku kadaengane lini, sanaka umawmase mwalralrakai ki swa Iseraylri.

⁴ Lakamani, kunumi ka lamaadrau ka lregelrege, latikiane ka lregelrege, lavalrwalru, kiacilri si acinilrianenga, kiaravase demedeme ki ngwadadethe ka kuni, kiatusinalreme ka tawlrakavane ka lacekele, makitu kilalraili makanaelre, ku taiyane numiane ki abebeelengenga ka Tamatama.

⁵ “Kwaku ka abebeelengenga ka Tamatama yakaiyaku ki girimucane kaelaela ki langwadadethe ka kuni, inilringa ki swa Idume. Kwi lalasu kiararagai turamuru, kadrwa ku tumanemane lini ki umawmase la drikisi si malra ki kadaenganeli, la maalranga elrelre ki tapagwagwagwaneli.

⁶ “Lakamani, kusu yuginga ki kadaengane ki swa Iseraylri; pelaela ki lamadrau ka lregelrege ki latikiane ka lregelrege, lavalrwalru: Kwaku ka abebeelengenga ka Tamatama, ngwaladhaku ku takitusinalrelrelremeane lini ki lakuni si kagirimucu.

⁷ Lakamani kwaku ka abebeelengenga ka Tamatama, twakucingalraku cidingi kai alrima si kiketekete iya kai: Kwi ngwadadethe muswane kwi lakuni lri tara kitusinalreeme.

⁸ Ai, lalregelrege ki swa Iseraylri, kwi laangatu numi lri pelana ngiesadhane, si pumadru pasikai ki kawkawluli. Kawkawluli lri padaalrunga numi si siwlri mubalriu.

⁹ Lri paralubaku numiane, lri pukiamaku kwi kadaengane numi lri siwlriwlriane kipavilringi si sabulu ku sapaivai.

¹⁰ Lri padilaku paru kakalra ku umawmase numi; lri ikai numi ki cekele, si tupela tutacekecekelane.

¹¹ Lri pangiradhekanaku ki umawmase si nilapulapwane; lri takaalra ku lalalake lagagane numi, ku umawmase makakalranga ki siaswalane. Lri pikaiyaku numiane ku nataikaiyane numi kunadruma, lai lrika ngiraeradhekane numi ki nasiaswalane. Luka ngimiyaiya kikai, lri thingale numi ala ka Tamatamaku.

¹² Kawkawluli ka swa Iseraylri, lri ililukaku numiane kainganai siwlri, lanu tupela ikai ki kadaengane ki swa Iseraylri. Lrika kadaenganenga numi, si kai pakasilraunga ki lalalake numi.

¹³ “Amiaku kaika abebeelengenga ka Tamatama: Kai laumawmase amia kai, kikai kadaengane wakaane ki umawmase, kadaengane ki mamudu ka kuni ka laumawmase.

¹⁴ Ai, twalainga kai, kikai kadaengane kai lri kanenga ki umawmase, kai lri pakamudunga ki lalalake lagagane. Amiaku kikai pelaela ka abebeelengenga ka Tamatama.

¹⁵ Kikai kadaengane kai lri pakitusinalremenga numiane si kiwlralrakai ki maelane ka kuni, lai kai pakamudunga ki kuni si umawmase numi. Amiaku kikai pelaela ka abebeelengenga ka Tamatama.”

Bavane ka tacekecekelane ki swa Iseraylri

¹⁶ Ku Tamatama kawariva nakwane; amia kai,

¹⁷ “Lri tara kawlrau ka umawmase, ku swa Iseraylri lu ikai ki kadaengane lini, ku kakwakudhane lini ki tacekecekelane wakudrulrunga kwini ki kadaengane. Lu drelaku ku kakwakudhane lini mia ki siaerai ka ababai, ikai ki tatulrisilrisiane kaika mabula.

¹⁸ Kwi lalasu yakai kai ki kadaengane papacai ki umawmase, sukubu ki lasamiamiange, wakudrulrunga ki kadaengane, ngwalai kikai papiaku liniane gugu ku girimucane.

¹⁹ Ngwaladhaku ki kaika takabulane ku kakwakudhane ki tacekecekelane pathavungu liniane, si pakatwase liniane mwa ki maelane ka kuni.

²⁰ Kwi lalasu adravane mwinu tara pakiarubuane ki saniange ka naganeli; ku palrapalra amia kai, ‘Kilakikai umawmase yai kawkawlu ki Tamatama, kai lalasu twalai ki kadaengane ki Tamatama kainganai.’

²¹ Kai swa Iseraylri adravane acaicali mwa kidruanga tara pakiarubuane ki saniange ka naganeli, lai kainaku dulru kai palakebe ki saniange ka naganeli.

²² “Lakamani, lri pelaelasu ki swa Iseraylri, amiaku kaika abebeelengenga ka Tamatama: Swa Iseraylri, ku lrika apianeli kaika pasiakai numiane, pasiakaiyaku ki saniange ka naganeli, kaamani kudra ikai numi ki lakuni pakiaruburubwane ka nagane.

²³ Amani kudra ikai numi ki maelane ka kuni si pakiarubwane ku naganeli; lri ikaiyaku cucubungu liniane pathingale kai naganeli ala ka saniange. Luka ngimiyaiya kikai, kwi lalasu lri thingale ala ka Tamatamaku. Amiaku kikai pelaela ka abebeelengenga ka Tamatama.

²⁴ Lri patwaladhaku ki lakuni si kidruanga malra sarubu pataelre numiane, si ililuku numiane siwlri mubalriu.

²⁵ Lri arakaiyaku ku alrivilrivi ku acilai paralikiliki numiane, si sinau patuelre kwi kudrulru numi, la mwalra patuelre ku lasamiamiange numi.

²⁶ Lri patarumaraku baai numiane ku bavane ka kidremedreme, bavane ka ri. Lri pabalrithaku ku kidremedreme numi, la mwalra kudra mia ki lrenege ku kawlukulane ka kidremedreme, la pabalrithi ku vaeva ka yakai ku erai yakai ku beate, wadulru pasalaladha ka kidremedreme.

²⁷ Lri malraku kai Rili si patarumara baai numiane, lanu dulru paluludu kai hulriceli, la pasalaladha kai padradrekaseli.

²⁸ Luka ngimiyaiya kikai ala lri dulru numi ikai ki patarumarali ki cucungulane numi kudra kadaengane. Kunumi lri akawkawlu numi nakwane; lai lri a Twaumasaku numiane.

²⁹ Lri palribulaku numiane pakatwase ki makudrulru sanaka lamanemanenga. Lri pangukaalraku ku taleke numiane, lai kai lri ikainga ku silravane.

³⁰ Lri papumadrwaku mulaabece ki laivai numi, lai lri kakalra ku taleke, lai kai numi lri ngukainga ki silravane si kitusinalreme ki lakuni.

³¹ Lri ngulrialringau numi ku ngilisianane ku kakwakudhane si tapasalrivane numi, lai lri ngwalai ki pasalrivane si tapamamane numi si ngikakavalracevace.

³² Swa Iseraylri, kwaku ka abebeelengenga ka Tamatama lri pathingalaku numiane, ku piali kikai patuelre kaika pasiakai numiane. Ngwaladha ku tapiane numi si tainu kalrumale.”

³³ Amiaku kaika abebeelengenga ka Tamatama, “Lu bulanga naku ki pasalrivane numi, lri pikaiyaku numiane ki cekele, si tupeela tutacekecekelane.

³⁴ Kunadruma, ku walribate ku umawmase ani awbubulanenga amia makanaelre ki umawma numi, ai lri patupelaku numiane kaungu tubavane tuumawma.

³⁵ Kwi lalasu lri iya kai, kunadruma kudra mia ki calragulragu ka umawma, kaiasasanenga mianga ki babengelradhane Idingi; kunadruma kudra kiakabebetethe, kiaravase patuelre ka tawlrakavanenga ka cekele, kaiasasanenga tapangalenga ku umawmase, laka makecengenga ka yakai ku kepale ka cekele.

³⁶ Lukamaninga kwidra, kudra kaiyana mamudu ku ngwadadethe ka lakuni lri thingale ala ka amaniaku ka twapela tucekele ki tawlrakavane, twapela kaungu ki ubulane. Amiaku kikai pelaela ka Tamatama. Amianga naku kikai, lri tara ngimiya.”

³⁷ Ku abebeelengenga ka Tamatama amia kai, “Lri patupelaku ki swa Iseraylri papia nakwane kitubi ku akiparalubane; lri pangimiaku ki lakiu liniane ku kalrane ku umawmase.

³⁸ Ku taulrakavane ka lacekele lri madrikidrikisinga ku umawmase, mia Yerusalrime kunadruma lu ikai ki tatulrisisisiane madrikidrikisi ku saarakaiyane patarumara ku lakiu. Luka ngimiyaiya kikai, kwi lalasu lri thingale ala ka Tamatamaku.”