Izikile 35 - Ngudradreadrekadhane Ka Sisiu 魯凱語聖經

Ku Twaumase pathavungu ki swa Idume

¹ Ku Tamatama kawariva nakwane; amia kai,

² “Lri tara kawlrau ka umawmase, putaluvaivadha kaelaela ki swa Idume,

³ pelaela liniane, amiaku kaika abebeelengenga ka Tamatama: Lregelrege Seire, lri kiecebaku muswane! Lri pwalrimaku lrumai muswane, lai acinilrianengasu.

⁴ Lri paatawlrakavanaku ki lacekelesu; ku lakadaenganesu lai aubulane ka cinilrianenga; luka ngimiyaiya kikai, lri thingalesu ala ka Tamatamaku.

⁵ “Amanisu ku badha ki swa Iseraylri singikadruma. Ku swa Iseraylri lu ngwalai ki pasalrivaneini si kipadradresenge ku amatikurwane, la kisaibange ku bibiilrilinga, lri baaisu iniane ki badha si papacai.

⁶ Lakamani, kwaku ka abebeelengenga ka Tamatama lri papiaku ki takapalralrawthaneli panianiake kiketekete: Kiasalrungasu kalri kamudu, ka kai lri maka dulru mubere. Pasalriwsu ku papacai ki umawmase, ku kiame ki erai lri tara arakaai ku erai balrithi.

⁷ Lri paacinilrianaku pakisaalru ki lregelrege Seire, papacai demedeme ki walribate kwini ki laumawmase.

⁸ Ki lalregelrege palraelre ki swa Idume lri pasueteaku ngisarade ku wapacai, ki lalrelrelrege, lavalrwalru, ki ladrakerale lri suete ku kiakaruburu si pacai ku laumawmase.

⁹ Lrika palralrawthungasu aubulane ka cinilriane, kadrwanga ku umawmase ku lri ikai ki lacekelesu. Luka ngimiyaiya kikai, lri thingalesu ala ka Tamatamaku.

¹⁰ “Adravane ka Tamatamaku ki taidrusa ka kuni ka Yuda si Iseraylri, asu thuru muswane iya ki lalasu, si malranga elrelre ka kadaengane lini.

¹¹ Lakamani, lri papiaku ku takapalralrawthaneli panianiake kiketekete ka abebeelengenga ka Tamatama: Ku tapangimianesu kalisi, pathalra, kavalracevace ki kawkawluli, lri mialriaku pangimia kiecebe muswane. Kwi lalasu lri thingale lu piaku kikai pathavungu muswane ka pwasakaikaiyaku liniane ku takivuthane kitupasalrivane.

¹² Lukamaninga kwidra lri thingalesu, kwaku ka Tamatama nakialalranga naku ku tatudrekasanesu iya kai, ku lalregelrege ki swa Iseraylri aubulanenga ka cinilriane patuelre, lrika muswanenga patuelre.

¹³ Ku tangitatwadravanesu turamuru tulilisi nakwane, kialalranga naku patuelre.”

^14-15 Ku abebeelengenga ka Tamatama amia kai, “Lri pamatiseepelaku muswane. Kunadruma sa kipadradresedresenge ku amatikurwane kai kawkawluli, twangitwatumanesu putariri. Kikainga kai kiacaebe ki belenge kai umawmase lri mialri ngwalai ku taamakianesu si lri putariri. Swa tali lregelrege ka Seire, unu, patuelre ku kadaengane ki swa Idume, lri akabalrithi acinilriane patuelre. Lukamaninga kwidra, sanaka umawmase lri thingale nakwane ala ka Tamatamaku.”