Izikile 34 - Ngudradreadrekadhane Ka Sisiu 魯凱語聖經

Taraagwagu ki swa Iseraylri

¹ Ku Tamatama kawariva nakwane; kwi lasu amia kai,

² “Lri tara kawlrau ka umawmase, kaelaela ki magagemegeme ki swa Iseraylri, papia liniane yugingi. Pelaela liniane, amia ku kai liniane ka abebeelengenga ka Tamatama: La taraagwagu ki swa Iseraylri, lri kipadradresenge numi ku amatikurwane! Ngiakakalikaalithi numi, la kai agwagu ki lakiu.

³ Waungulu numi ku mireke ki kiu, la silaimai ku ubale ki kiu, si culu ku maricucurunga ku kiu, si kane ku beate ki kiu, ai kadruana ku taagwane ki lakiu.

⁴ Ku marilai kai numi pakathariri pakane; ku macaeme, kai numi wasulrau pawdringai; ku madula, kai numi wacabu; ku amuli ki kadalranane, kai numi wamalra si ililuku; ku maulrau, kai numi matwase silape. Walrumailringa numi liniane.

⁵ Asi lwiyane kadrwa ku taraagwagu ku umawmase, ku lakiu la thirakupu; ku lawaudriwdripi la baburau liniane, si kane liniane;

⁶ Ku lakiuli la katwasenga mwa valrwalru ki lregelrege ki latukadrane, sarau ikai kidruanga, kadrwa ku umawmase ku siaraparapale, laka kadrwa ku umawmase ku wasilasilape.

⁷ “Lakamani, taraagwagu, kunumi kilalra ku taiyaneli numiane ku vaga ka abebeelengenga ka Tamatama.

⁸ Papiaku ku takapalralrawthane ki niakeli kiketekete, kunumi pudriadringadha kilalra. Ku lakiuli ngwalai ku takakadrwane ku taraagwagu la kikurisi kikane ki waudriwdripi. Ku taraagwagu kai matwase silape; ngiakakalikaalithi sikakathane, kai kakalikalithi ki lakiu.

⁹ Lakamani, lataraagwagu, kilalra kai taiyaneli!

¹⁰ Lri kiecebaku numiane ka abebeelengenga ka Tamatama. Lri sawlriaku ki lakiuli, kai numi lri maka ataraagwagunga liniane, lai kai numi maka ngikakalikaalithinga sikakathane. Lri patwaladhaku ki ngudwi numi malra ribici palribulu ki kiuli, kai numi lri maka kane ku beate lini.”

Mathariri ka taraagwagu

^11-12 “Kwaku ka abebeelengenga ka Tamatama lri pelaelaku numiane, lri ngikakamaniaku silape ki lakiuli. Ku tapangimiane lu silape ki kiu ku taraagwagu, lri mialriaku tungimiyaiya silape ki kiuli. Kwi lakiu sa ikai ki kadradridrimitane ka kadrwa ku vai, makalra ku sapapacai ku amatikurwane kiapasarau pwa kidruanga, lri patwaladhaku ki lakikwini malra palribulu liniane.

¹³ Lri ililukaku liniane katwase ki maelane ka kuni, si malra sarubu liniane, la ililuku siwlri mubalriu. Lri ililukaku liniane siwlri mwa ka Iseraylri ki lalregelrege si babiabila ki vaalru, la ikai ki takasaleseane ka ubulu agwagu liniane.

¹⁴ Lri ikaiyaku ki lregelrege ki swa Iseraylri ki ububulane pagwagwagu liniane, kwi lakiu lani ikai valrwalru ki lregelrege si takawbubulane suteelrai ku kidremedreme kanekane ku ubulu.

¹⁵ Lri ngikakamaniaku ataraagwagu ki lakiuli, si pasikai liniane silape ku asutelraadhane lini isadra. Amiaku kai pelaela ka abebeelengenga ka Tamatama.

¹⁶ “Ku maulrau, lri silapaku pamubalriu; ku amuli ki kadalranane, lri malraku iluku pasiwlri; ku madula, lri cabwaku; ku macaeme, lri sulravaku pawdringai. Ai kudra la taricucuru, lri amudaku, asi lwiyane arakaiyaku ku aparamaramavane agu si lapu ki lakiu.

¹⁷ “Ai kunumi ka lakiuli, kwaku ka abebeelengenga ka Tamatama peaelaelaku liniane, lri malraku ki nikiubawbalane ka kiu si kakiuane, apatatukudha ku mathariri si malisi, si patangeangeea numiane saibange.

¹⁸ Ikai numiane yakai ku wakane ku mathariri ku ubulu la kaiyana ngulwadhane, la dredreana ku tedrane ku kane lini ku ubulu! Lu ungulungasu ku acilai, la ara drapalesu thalrimu ku tedranesu ungulu ku acilai.

¹⁹ Ku drumane ku kiuli la kaanenga ku dredrenga numi ku ubulu, ungulu ku thalrimunga numi ku acilai.

²⁰ “Lakamani, kwaku ka abebeelengenga ka Tamatama peaelaelaku numiane: Lri ikaiyaku numiane ka lataricucuru si latariarilai ka kiu arakai ku aparamaramavane.

²¹ Arakai numi ku tabalangane drikisi, la lawngu ki taturawramuru, si pasarau liniane mwa kidruanga.

²² Ai, lri palribulaku ki kiuli, kainaku lri pakilrumai liniane, lri malraku ku mathariri si malisi apatatukudha, si patangeea saibange ki kiuli.

²³ Lri patarumaraku baai ku tangeea ku mia ki sasiakaululi ka Davidi ka talialalai kainganai ataraagwagu liniane, si lapu liniane.

²⁴ Kwaku ka abebeelengenga ka Tamatama lri a Twaumasaku liniane, lai mia ki sasiakawluli ka talialalai ka Davidi lri rathudu liniane. Amiaku kikai pelaela.

²⁵ Lri kiketeketaku liniane, lai suteelrai kwi lalasu. Lri amudaku ki yakai ki kadaengane ka garagarange ka waudriwdripi, ku lakiuli lai dulru kasuliivate ikai ki tapagwagwane kanekane ku ubulu, la ikai angatungatu isadra.

²⁶ “Lri patarumaraku baai liniane ku akaesadhane, kwi lalasu lani ikaikai ngithalringulu ki saniange ka lregelregeli. Lri ikaiyaku kwini si patarumara baai liniane ku akaesadhane, si singikaai ki kalamanemanane pawdale.

²⁷ Ku ivai lri pumadru, ikai ki umawmali lai cebe ku lataleke; sanaka umawmase lri ikaai ki kadaengane lini suteelrai. Lu ngetelenga naku ku sakerengane ka kicikici ki kawkawluli, si patwalai ki twaduri liniane pulatadre, kwi lalasu lri thingale nakwane ala ka Tamatamaku.

²⁸ Ku lakuni kai lri ravasenga liniane; ku lawaudriwdripi lai kai lri kanenga liniane. Kwi lalasu lri kathaithaithaariringa cekecekele, kai lri kikukuludrunga ki naaneeanenga ki umawmase.

²⁹ Lri patarumaraku baai liniane ku malrange ku kadaengane; ikai ki kadaengane lini kai lri ikainga ku silravane. Ku lakuni kai lri tusinalremenga liniane.

³⁰ Sanaka umawmasenga lri thiingale nakwane ka Tamatama ka Twaumase ki swa Iseraylri ka yakai tapalra liniane; kwi lalasu yai kawkawluli. Amiaku kikai pelaela ka abebeelengenga ka Tamatama.

³¹ “Kunumi yai kiuli, ka yakai ki tapagwagwaneli ka lakiu. Kunumi yai kawkawluli, Twaumasaku numiane.” Ku abebeelengenga ka Tamatama amia kikai pelaela.