Izikile 33 - Ngudradreadrekadhane Ka Sisiu 魯凱語聖經

Ku Twaumase siakawlu ki Izikile ataradrangalrungalru

¹ Ku Tamatama kawariva nakwane iya kai,

² “Lri tara kawlrau ka umawmase, pelaela ki sakacekelesu, sana pakipadradresengaku ku amakaruruburane ki vaeva ka kuni, ku laumawmase kwini ki kuni lri tara pilri ku tangeea ku lrika taradrangalrungalru.

³ Kwini taradrangalrungalru lu drele lu deethenga ku badha la ngirapa pakipapawlringau ki laumawmase.

⁴ Alaiyasi ikai ku umawmase ku kialalra kwini sapakipapawlringavane la kai tumanemane, la ngwalai kikai si kipapacai ki badha, kwi lasu lri tara paacai.

⁵ Kwi lasu ngiakakamaninga, asi lwiyane kwi lasu kai twamanemane ki sapakipapawlringavane. Kwi lasu lwiyasi tarumara kwini ki sapakipapawlringavane, kwi lasu lri tara mubeere si udripi.

⁶ Ai, ku taradrangalrungalru lu drele ki badha lu deethenga la kai pelaela pakipapawlringau, la kela ku badha, si papacai ki laumawmase, kwini kiapapacai adravane ka mapasaisalriu ka umawmase, lri tukiamaku ki taradrangalrungalru ku kiame ki erai lini.

⁷ “Lri tara kawlrau ka umawmase, kaiasasane lri sikawlaku muswane ataradrangalrungalru ki swa Iseraylri. Lri tara kamaanisu ka peaelaela liniane pakipapawlringau kudra papiali muswane pelaela ku vaga.

⁸ Alaiyasi pelaelaku ku tangeea ku manganga ku umawmase kalri pacai, la kaisu katwase pakipapawlringau iniane, si pasapukwane ku lrika angitatupelaneini, kwi lasu lri ngwalai ki pasalrivaneini si pacai, lai lri mialriaku papia muswane malra ku kiame ki eraini.

⁹ Alaiyasi pakipapawlringausu kwini ki manganga ka umawmase, kwi lasu la kai mubangalre ngitatupela, si piapiyana ku ngialisiane, kwi lasu lri ngwalai ki pasalrivaneini si pacai, ai kaisu lri sikiningi.”

Sikiningi ki tangeangea ka umawmase

¹⁰ Ku Tamatama kawariva nakwane iya kai, “Lri tara kawlrau ka umawmase, arakaiya kudra arakaikai ki swa Iseraylri ku vaga iya kai, ‘Kai pasalrivane nai mia ki amece drepete ikai ki kinawmasane nai, la arukarilariilai nai, lri tumane nai panianiake?’

¹¹ Pelaela liniane, lri papiaku ki takapalralrawthaneli panianiake ka abebeelengenga ka Tamatama kiketekete, kainaku walreme drele lu pacai ku pasalrisalriu ka umawmase, madadalamaku drele lu ngitatupela si panianiake. Swa Iseraylri, kunumi ngitatupela, si cilri katwase ki ngialisiane ki kakwakudhane! Anu ngithanga pacai?

¹² “Lakamani, lri tara kawlrau ka umawmase, pelaela ki swa Iseraylri, ku mathariri ku umawmase lu pasalriu, kudra natapianeini ku mathariri kai lri maka dulru palribulu iniane. Ku manganga ka umawmase lu akabalrithi, kai lri kipathavungu; ku mathariri ku umawmase lu pasalriu, kai lri kipacepe.

¹³ Adravane ka napwakawnunga naku ki mathariri ka umawmase kalri tara panianiake, ai alaiyasi kwi lasu makakelretenga ku takathariraneli la iya si pathagili pasalriu, kainaku lri ngulringawnga ku natakatharirane ku kakwakudhaneini ku siaswalane. Kwi lasu lri tara ngwalai ki pasalrivaneini si pacai.

¹⁴ Adravane kana pakiapapawlringawnga naku ki manganga ka umawmase kwi lasu kalri tara paacai, ai kwi lasu alaiyasi akabalrithi, si pia ku aparamaramavane pacengecenge.

¹⁵ Maru amaninga kai wasawlri baai ki pimanemanane ku niarakaiyane drepete ki kiame, ku wasawlri ku nikupane baai ki pimanemanane ku lamanemane, kwi lasu akabalrithinga, si paluludu ku hulrice ki patarwamara baai ku niake, kwi lasu kai lri pacai, lri panianiakelringa.

¹⁶ Lri paacepaku ku pasalriwini; kwi lasu lri ngwalai ku tapianeini ku aparamaramavane mulecege si panianiake.

¹⁷ “Ai, kwi sakacekelesu kai aparamaramau lu pia kikai amia nakwane. Ku patengatengane, ku tapiane ki lalasu ala amani ku kai pacengecenge.

¹⁸ Ku madringelrese ka umawmase lu kai piapianga ku mathariri, la pialringa ku malisi, kwi lasu lri tara ngwalai kikai si pacai.

¹⁹ Ku manganga ka umawmase lu akabalrithi, si pia kudra aparamaramavane ulecege, kwi lasu palribulunga ki niakeini.

²⁰ Ai swa Iseraylri, kai aparamaramau amia numi lu piaku kikai. Lri singikaiyaku ku kakwakudhane numi ka tangeea si saibange numiane.”

Tapelaelane ku taamakiane si kimalra Yerusalrime

²¹ Ku taacaicaliane nai satara 12 ka caili, sakamangeale ki dramare ki samaka lrimale ka vai, yakai ku twalai Yerusalrime mubere la kainganai pelaela nakwane iya kai, ka Yerusalrime kiapamakinga si kimalranga.

²² Kikai umawmase kai, sa lri ukaiyanenga si kela sakamaungu, ku Ri ki Tamatama mwalebe mwa nakwane. Sakakaiyane ki mialrealre, sakaiyana kela kwini umawmase, ku Tamatama pasiaulriwlrianenga nakwane dulru kawriva.

Pasalrivane ki laumawmase

²³ Ku Tamatama kawariva nakwane iya kai,

²⁴ “Lri tara kawlrau ka umawmase, ikai ki swa Iseraylri kudra la yakaikai ki taulrakavane ki cekele ku laumawmase amia kai, ‘Ku Aberahame tangeangeea si malra kai ki kadaengane, kai takalrata turamuru, nai kamanita ku wamalra kikai kadaengane.’

²⁵ “Lri pelaelasu liniane, amiaku kaika abebeelengenga ka Tamatama: Wakane numi ku eraeradhane ku beate, si sukubu ki lasamiamiange, la papacai ki umawmase, lri sakai numi ki manemane thuru naiane kikai kadaengane iya?

²⁶ Satalu numi ki sakikaruburane ka lawbubulu, la pia ku matialraase, sanaka aneeanenga la pasudringai ki taelrelre ki lapasiagiagisi, lri sakai numi ki manemane thuru naiane kikai kadaengane iya?

²⁷ “Lri pelaelasu liniane, kwaku ka abebeelengenga ka Tamatama, ngiapapapiaku ku takapalralrawthaneli panianiake kiketekete: Kudra yakaikai ki tawlrakavane ka cekele ku laumawmase lri kiara lrabu pacai; ku yakaikai ubulane ku umawmase lri kikane ki waudriwdripi; ku kialepenge ikai lregelrege si barungulu ku umawmase lri kacaeme si pacai.

²⁸ Lri pakisaalrwaku paacinilriane kikai kadaengane; ku ngilralrigulrigu lini ku puku lri kawlrau. Ku lalregelrege ki swa Iseraylri lri kisaalrunga acinilriane, kadrwa ku umawmase kulri ngukakai lribate kwini.

²⁹ Lu pathavungaku ku pasalrivane ki laumawmase, si kisaalrunga acinilriane ku kadaengane lini, kwi lalasu lri thingale ala ka Tamatamaku.”

Pelaela ki yuginsia ka vaga

³⁰ Ku Tamatama amia kai, “Lri tara kawlrau ka umawmase, ku lasakacekelesu lu ikai thili ki balingibingi ki cekele lu ikai ki lrawlrawdru ki daane yelrelrelre matiakaikaai muswane. Kwi lalasu maiyaiyaiya kai, ‘Ilata kilalalra luka tumanamia ku vaga ki Tamatama!’

³¹ Sangimia kwini ku lakawkawluli la kalrungulrungu kainganai, lri kilalra ku taiyanesu. Kwi lalasu lri kilalra, ai kai lri pangimia. Lri pakacilri kai pucalringane kwi vagasu, lai ka thadaalrane kararau ku tacekecekelane.

³² Ikai ki maca lini, tarasenasenaisu sikakathane, kathane ku samawpapapalangane ku senai ku thingale sikakathane, la patungutungutungu. Ku vagasu, kwi lalasu kialaalra patuelre, ai kadrwa ku niaku vaalane ku nipangimiane.

³³ Ai, lu ngimianga ku taiyanesu, wathingalaku kalri tara ngimiya, lukamaninga kwidra kwi lalasu lri thingale ala ka nayakai ku tangeea ku yuginsia ku yakai liniane.”