Izikile 32 - Ngudradreadrekadhane Ka Sisiu 魯凱語聖經

Arakai ku ei pakiramau ki talialalai ki swa Izipiti

¹ Ku taacaicaliane nai satara 12 ka caili, satara 12 ka dramare ki aswalaalanga ka vai, ku Tamatama kawariva nakwane iya kai,

² “Lri tara kawlrau ka umawmase, pakipapawlringava ki talialalai ki swa Izipiti, si tusenai ku sasilringavane, si padaruru kai vagali iya kai: Ikaisu ki lakuni ngiatatu amanisu ku yacengecenge ka raiyungu; ku patengatengane, amanisu kudra yakai kadravane ka ei sikakathane. Lu ikaisu ki taka tikianane ki kadravane, la ara drapale cibucibuku ki dae, ku acilai ki kadravane mathalrimu.

³ Lu yelrelre ku laumawmase ki takaalra ka kuni, kwaku ka abebeelengenga ka Tamatama lri paipadhaku ku arai si pwalra muswane, lai pabilibilaku liniane kwini arai pukameamealane.

⁴ Lri malraku muswane verevere pwa cakena, si cilri puubulane, la dawlu patuele ki yabelenge ngipalapalai ka adhadhame si yadaedae lrawlrawlrakwane ka waudriwdripi kainganai kane muswane.

⁵ Lri arakaiyaku kwi maburau ka kinawmasanesu selrepe pasuete ki lalregelrege, pasuete ki lavalrwalru ka drakerale;

⁶ lri gugwaku kwi eraisu, lai lri lrilriiwgu ki lregelrege, si mwaludru mwa ki drakerale.

⁷ Lu amudaku muswane, lri kabungaku subelebelenge, lai lri kadradrimiti ku tariau, ku makudremelre ku ememe lri paidringi ki vai, ku dramare lai lri kai ledra.

⁸ Lri edrepaku palraelre kai subelebelenge sanaka ledra, ku kadaenganesu lai lri kadradrimiti. Amiaku kai pelaela ka abebeelengenga ka Tamatama.

⁹ “Ku takamudanesu lu pelaelaku padaruru kudra ki kaika kilalranasu ku lakuni, ku laumawmase lini lri ngituluku si mukuludru.

¹⁰ Lu piaku kikai muswane lri ngituluku ku takaalra ku kuni. Sana vidrividraku ku dramuli, ku latalialalai lri mukuludru si manugiligili. Ku takamudanesu kwini ki vai, kwi lalasu lri ngwalai ki niake lini si mukuludru manugiligili.”

¹¹ Ku abebeelengenga ka Tamatama amia kai ki talialalai ki swa Izipiti, “Lri tara kipadradresengesu ku lrabu ki talialalai ki swa Babilunia.

¹² Lri dawlaku kudra ki malilisi ka kuni kainganai kikaruburu muswane; ku kwapingi lini lri musudru ku dramu si papacai demedeme ki laumawmasesu. Ku laumawmasesu makanaelre si kudra ngikalrilrilrigusu patueelre lri kipakamudu patuelre.

¹³ Lri ikaiyaku babiabila ki kadravane papacai ki lalapulapusu, lrika kadrwanga ku umawmase si lanilapulapwane kulri kela si cibucibuku ku dae adringi ki kadravane, la pakathalrimu ki acilai kadravane.

¹⁴ Lri paalrivilrivaku ku acilai kadravane Nile, lri alrivilrivi; lai pangiabaaladhaku pamwaludru ki acilai kadravane. Amiaku kikai pelaela ka abebeelengenga ka Tamatama.

¹⁵ Lu paatawlrakavanengaku si aubulane Izipiti, si laamudunga ki laumawmaseini, kwi lalasu lri thingale ala ka Tamatamaku.

¹⁶ Kikai yai sapakipapawlringavane lri avaeva ka senai ka sasilringavane. Ku lalabaibai ki lakuni lri senai makanaelre kikai senai si tubi ki Izipiti si laumawmaseini. Amiaku kai pelaela ka abebeelengenga ka Tamatama.”

Swadriadringi

¹⁷ Ku taacaicaliane nai satara 12 ka caili, ki aswalaalanga ka dramare ki samaka 15 ka vai, ku Tamatama kawariva nakwane iya kai,

¹⁸ “Lri tara kawlrau ka umawmase, tubia pakai ki takaalra ki laumawmase ki swa Izipiti. Lri pakaredelesu liniane ki drumane ka magarange ka kuni lrudrulu puswadriadringi.

¹⁹ Lri kawrivasu liniane iya kai: Mathaithaariringa naku amiasu? Lri mwasu ka swadriadringi, si taelre ki lakiaruburubwane ka laumawmase.

²⁰ “Ku swa Izipiti lri taelre tubakebake kudra ki kiara lrabu papacai ku laumawmase. Ku dramu mwasudrunga, lri papacai liniane demedeme.

²¹ Ku tagagagarange ka latarakikaruburuburu si talragi ki swa Izipiti lri ikai swadriadringi kidredresenge ki swa Izipiti. Kwi lalasu lri tawtau: ‘Kudra kadrwa ku usakenane si ukuludrane si kudra kiara lrabu kipapacai ku laumawmase mwalebenga muswadriadringi; waapece makanaelre ikai kai!’

²² “Yainu ku Asiria, kikai ngiathalringulu takidralrekane makanaelre ki tarakikaruburu ka kwapingini. Kwi lalasu kiara lrabu papacai makanaelre.

²³ Ku takidralrekane lini yakai swadriadringi ki sadriadringinga. Ku tarakikaruburu ka kwapingini ki swa Asiria wapacai itakikaruburane makanaelre, ku latakidralrekane lini ngiathalringulu ki tadralredralrekane Asiria. Kwi lalasu sa panianianiakeana kiakakiwcu manugiligili ki laumawmase.

²⁴ “Yainu ku Ilame, kikai ngiathalringulu takidralreekane patuelre ki tarakikaruburu ka kwapingini. Kwi lalasu kiara lrabu pacai makanaelre. Kwi lalasu kai kiagelregelre tulrisi si muswadriadringi. Kwi lalasu sa panianianiakeana kiakakiwcu manugiligili ki laumawmase, kaiasasane la pacainga, si kitusinalremelreme ki palrapalra.

²⁵ Kwi Ilame waapece ikai kabicelrakane ki lawapacai ka umawmase, kwi ngiathalringulu takidralrekane ki latarakikarubu ka kwapingini. Kwi lalasu kiarubuane makanaelre, kiara lrabu kipapacai. Kwi lalasu sa panianianiakeana kiakakiwcu manugiligili ki laumawmase, kikai la pacainga, si taelre ki kiakaruburu si pacai kitusinalremelreme.

²⁶ “Yainu ku Meseke si Tubale, kai ngiathalringulu takidralreekane ki tarakikaruburu ka kwapingini. Kwi lalasu kai kiagelregelre tulrisi, kiara lrabu pacai. Kwi lalasu sa panianianiakeana kiakakiwcu manugiligili ki laumawmase.

²⁷ Kwi lalasu kai ngiamia kudra ki garagarange kunadruma, masasilrigu kidralreke, sialaimai ku kwapingane, siatawlrwane ku lrabu, si sicawbu ku alathare, la apece ikai swadriadringi. Kilakikai garagarange sa italuvaivaiyana namatisalru, makiwcu manugiligili ku laumawmase.

²⁸ “Ku swa Izipiti thadaalrane kalri kibaburau, si apece ikai ki kai kiagelregelre tulrisi, kiara lrabu kipapacai ku laumawmase.

²⁹ “Yainu ku Idume; ku latalialalai si lawarathudu yadrepele ka garagarange ka tarakikaruburu. Kikainga kwi lalasu taelrenga apece ikai swadriadringi kudra ki kai kiagelregelre tulrisi, kiara lrabu papacai ka laumawmase.

³⁰ “Kudra yakai tali dradha ku latarasangililuku yainu; yainu ku swa Sidune. Ku puku lini namwakuludru manugiligili ku laumawmase. Kikainga kwi lalasu la taelrenga muswadriadringi kudra ki kai kiagelregelre tulrisi, kiara lrabu pacai ka laumawmase si kitusinalremelreme, waapece ikai kwini.”

³¹ Amia kai ku abebeelengenga ka Tamatama, “Ku talialalai ki swa Izipiti si lakwapingini lri ngwalai ku tadrelane ku takipadradresengane kudra ki la kiara lrabu pacai ku umawmase si kasasa.

³² “Naarakainga naku ki talialalai ki swa Izipiti si kukuludru ki panianianiake ka umawmase, ai kwi lasu si lakwapingini lri kiara lrabu pacai makanaelre, si lai lri taelre apece kudra ki kai kiagelregelre tulrisi, kiara lrabu pacai ku laumawmase.” Amia kai pelaela ku abebeelengenga ka Tamatama.