Izikile 31 - Ngudradreadrekadhane Ka Sisiu 魯凱語聖經

Arakai ku cedare ka angatu pararamau ki swa Izipiti

¹ Ku taacaicaliane nai satara 11 ka caili ki sakadrusa ki dramare samaka lrimale ka vai, ku Tamatama kawariva nakwane iya kai,

² “Lri tara kawlrau ka umawmase, papia ki talialalai ki swa Izipiti si laumawmaseini makanaelre iya kai: Ala magaarangesu! Lri arakaiyaku ku manemane tusaarakaiyane pararamau muswane?

³ Miasu ki wacebecebe ikai Lebanungu ka cedare ka angatu, madeemele ku ricingi, si mulabece, ku karingavane ki angatu wadaaruru ki ememe.

⁴ Ku berai ka acilai waalreke iniane; ku acilai adringi ki dae amani ku pacebecebe iniane. Ku vaalru ngiathalringulu mwa ki angatungatu, ku la kiauvagai ku valru pwa acilai ki angatungatu patueelre sanaka angatu.

⁵ Ngwalai kikai, ku takadravaneini walribate ki drumane ka angatu; ku ricingini malragi si mulabece.

⁶ Ku ngiapalapalai ka adhadhame yakai belenge ki laricingi tulisisuku; ku lawaudriwdripi yakai lebe ki lrilrianeini tulalake; ku lakuni yakaikai tailebe ki lrilriane ka angatu.

⁷ Asiamia, ala mathariri ka maadrau ka angatu! Ku cebe ki angatu mwa belenge, ku taturicingane malragi; ku tabalacane mwa adringi turamuru, wakeela adringi ki acilai.

⁸ Ku yakai ki babengelradhane ki Twaumase ku cedare ka angatu kai maka padaruru ku abelengananeini; ku ricingi ki alrenge ka angatu, kai walribate iniane ku lragiane; ku ricingi ki rara ka angatu kai walribate iniane. Ikai ki babengelradhane ki Twaumase kadrwa ku navaevanga ku ngiamia iniane ku tharirane.

⁹ Pacebeaku iniane tuthariri, pamulabece ku vasau ki ricingi; ikai ki babengelradhane ki Twaumase, Idingi ka babengelradhane ku laangatu pwasamaalra iniane makanaelre.

¹⁰ “Lakamani, amiaku kaika abebeelengenga ka Tamatama: Asi lwiyane kikai angatu malragilraagi, ku karingavane wadaaruru ki ememe, lu aru kaadrau, arwa ngikalrilrigu,

¹¹ wamalraku iniane si baai ki singi latadre kela ka tararathurathudu; kwi lasu lri ngwalai ki ngilisianane kikai angatu si bilri iniane.

¹² Kudra malilisi ka maelane ka kuni ka laumawmase pwalebe iniane, si cilri iniane, ku tadradrau ku tatitiki ku laricingi lai lri ngisarade ikai ki kunini ki lalregelrege si lavalrwalru. Kudra yakaikai ki lrilrianeini ku lakuni ka laumawmase matwase makanaelre.

¹³ Ku langiapalapalai ku laadhadhame yakaikai ki mwalebenga ka laricingi; ku lawaudriwdripi la dradredre ki laricingini.

¹⁴ Twalainga kikai, adravane kaadrau ku cebe ki acilai si makakelrekelrete, kai lri ikainga ku navaevanga ku angatu kulri cebe si kaadrau ngimia kaelrenge, daaruru ki ememe ku karingavane. Ku la angatu patueelre lri tara kavulru, mia ki lri tara kawlrau ka umawmase pacai, la mwa swadriadringi, si taelre ki wapacainga ka umawmase.”

¹⁵ Ku abebeelengenga ka Tamatama amia kai, “Kwini maadrau ka angatu sa tuverevere mwa swadriadringi, palrenepaku iniane ki acilai adringi ki kadaengane, sapelaelane ki tatubiane. La elengaku ki lakadravane, ku ladrakerale la idrengere kai mwaludru. Lri pakabungaku ki dradrimitane ki lregelrege Lebanungu, ku laangatu ikai angatungatu lai lri karudame patuelre.

¹⁶ Sa vereveraku iniane puswadriadringi, ku tatuvereveraneini ku lingau pangiatuluku ki lakuni. Ku yakainga swadriadringi ku laangatu, amani kikai angatu ki babengelradhane Idingi si swaeete ku acilai, mathaithariringa ka angatu ki Lebanungu, ngwalai ku taukadrulaneini si kiraragai.

¹⁷ Kilakikai angatu twapapalra kwini ki maadrau ka angatu mwa swadriadringi, si taelre kudra ki kiapapacai kiara lrabu ku laumawmase. Kudra yakaikai lebe ki lrilriane ku laumawmase lri kipakatwase mwa ki lakuni makanaelre.

¹⁸ “Kikai maadrau ka angatu amani ki talialalai ki swa Izipiti si laumawmaseini. Ku yakai Idingi ka laangatu kai maka kiaramau ku adravaneini. Ai, kwi lasu lri mia ki angatu ki babengelradhane Idingi tuverevere muswadriadringi, si taelre kudra ki lakiarubwane si kiara lrabu idiri papacai ku laumawmase. Kikai yai papia ki talialalai ki swa Izipiti si laumawmaseini.” Ku abebeelengenga ka Tamatama amia kikai pelaela.