Izikile 30 - Ngudradreadrekadhane Ka Sisiu 魯凱語聖經

Ku Twaumase lri pathavungu ki swa Izipiti

¹ Ku Tamatama la kawriivanga nakwane iya kai,

² “Lri tara kawlrau ka umawmase, lri yugingisu, si pelaela ku akawrivaneli ka abebeelengenga ka Tamatama. Lri akwadrausu tawtau: Matisalregesege, ku matiukukuludru ka vai wakelanga!

³ Ku lrika apianenga ki Tamatama ku vai wakelanga; kudra yai makeceege ku ememe, ka akipathavunganenga ki lakuni ka vai.

⁴ Kai swa Izipiti lri kipadradresenge ku amakaruruburane; ku swa Kuse lri ikai ku akwalriane. Ku swa Izipiti lri ngisaraade ku wapacai palraelre ki lakadaengane; ku kuni palraelre lri kiravase patuelre, si lri kipaadratane.

⁵ “Twalai Kuse, Pute, Lidia, Arabia, Kube, adravane kudra twalai ki kawkawluli kidawlu mulrawlrau akwapingi lri pacai makanaelre itakikaruburane.”

⁶ Ku Tamatama amia kai, “Twalai tali dradha ka Migedule mwa ka tali lrawdru ka Aswane, makanaelre ku palribulu ki swa Izipiti ku umawmase lri ikai ki tamakakaruburane pacai; ku tagagagarange ku kwapingi ki swa Izipiti lri kaamudu makanaelre. Amiaku kai pelaela ka abebeelengenga ka Tamatama.

⁷ Kai swa Izipiti lrika pakilrialringawnga ki kiacaebe ki belenge ku takacinilrianane si aubulane ka kadaengane; ku lacekele ki swa Izipiti lri lribate ki sanaka tawlrakavane ku matisepelane.

⁸ Lu lamaku Izipiti, si papacai patueelre ki palribulribulu ki cekele ka lakwapingi, kwi lalasu lri thingale nakwane ala ka Tamatamaku.

⁹ “Luka takiamudane ki swa Izipiti kwini ki vai, lri pakatwasaku ku kiasikawlu pangu varukuru mwa lrithavulu ki masulialialivate ka swa Kuse, kwi lalasu lai lri ngituluku si mukuludru kai thingale ku apiane. Kwini vai kwidra wakelanga!”

¹⁰ Ku abebeelengenga ka Tamatama amia kai, “Lri arakaiyaku ku alrima ki Nibukadenezere ka talialalai ki swa Babilunia kabebetethe ku tacekecekelane ki swa Izipiti.

¹¹ Kwi lasu lri ililuku ki malilisi turamuru ka lakwapingi kainganai, si kabebetethe ki swa Izipiti. Kwi lalasu lri arakai ku lrabu idiri kikaruburu, ku wapacai lai lri ngisarade salraelre Izipiti.

¹² Lri pakamealaku kadravane Nile, la malra ki swa Izipiti si baai pikai ki alrima ki ngialisiane ka umawmase. Ku maelane ka kuni lri kainganai kabebetethe ki kuni palraelre. Amiaku kai pelaela ka abebeelengenga ka Tamatama.”

¹³ Ku abebeelengenga ka Tamatama amia kai, “Lri kabebetethaku kudra yakai Mimepise ku lasamiamiange si la kaika patengane ka twaumase. Kadrwa ku warathudu ki swa Izipiti; lri pangitulukaku si mukuludru kai thingale ku apiane ku swa Izipiti.

¹⁴ Ikai Izipiti tali lrawdru lri paubulanaku acinilriane; lai lri lamaku tali dradha ka cekele Zuane, si pathavungu ki tangadrane ki cekele ka Thibise.

¹⁵ Lri papiaku ki makececengenga ka taikaikaiyane ki kwapingi ka cekele, Pilusiume ka cekele gugu ku girimucaneli, si kabebetethe ku tacekecekelane ki swa Thibise.

¹⁶ Lri lamaku ki swa Izipiti; ku swa Pilusiume lri kisuete ki amatikurwane. Ku kepale ki cekele ki swa Thibise lri kiburuku; ku badha lri mia ki lriau kainganai lriau mwa ki Mimepise.

¹⁷ Ku layacengecenge ki lacekele ki swa Heliupulise si swa Bubasetise lri pacai ikai ki tamakakaruburane makanaelre; ku latedrane ku umawmase lri kiravase.

¹⁸ Lu kabebetethenga naku ku puku ki swa Izipiti, si amudu ku ngikalrilrilrigu lini ku tagagagarange ka kwapingi, ku dradrimitane lri kabungu Tapanese. Ku makuceege ku ememe lri kabungu Izipiti, ku laumawmase ki lacekele ki swa Izipiti lri kiravase makanaelre.

¹⁹ Lu piaku kikai pathavungu ki swa Izipiti, kwi lalasu lri thingale ala ka Tamatamaku.”

Masuburu ka puku ki talialalai ki swa Izipiti

²⁰ Ku taacaicaliane nai satara 11 ka caili tara lrimanga ka dramare ki samakapitulu ka vai, ku Tamatama kawariva nakwane iya kai,

²¹ “Lri tara kawlrau ka umawmase, wangetelaku ku alrima ki talialalai ki swa Izipiti, kadrwa ku umawmase ku wacabu iniane, si sulrau pawdringai iniane, ku lrika adulrwaneini pelana malra ku dramu.

²² Lakamani, amiaku kaika abebeelengenga ka Tamatama: Lri kiecebaku ki talialalai ki swa Izipiti; lri ngetelaku paecebe ki alrimaini, ku kiatulrepengeana ku kiangetelenga lri tara ngetele, lai lri mucilri mucakena ku yakai ki alrimaini ku dramu.

²³ Lri pathirakupaku mwa kidruanga kai kawmasane ki swa Izipiti.

²⁴ Ala lri pasapukwanaku ku alrima ki talialalai ki swa Babilunia, si baai pikai ki alrimaini ku dramuli. Ai, lri ngetelaku ku alrima ki talialalai ki swa Izipiti, kwi lasu lri ikai cucubungu ki badha dadange, si pacai.

²⁵ Lri tara paturamuraku iniane, lai lri ngiradhekane ku talialalai ki swa Babilunia. Lu baainga naku ku dramuli ki talialalai ki swa Babilunia; kwi lasu lri drukange papia Izipiti kwini dramu, sanaka umawmase lai lri thingale nakwane ala ka Tamatamaku.

²⁶ Lri pasaravaku ki swa Izipiti pasalraelre kai kawmasane; lukamaninga kwidra, kwi lalasu lri thingale ala ka Tamatamaku.”