Izikile 3 - Ngudradreadrekadhane Ka Sisiu 魯凱語聖經

¹ Ku Twaumase amia kai, “Lri tara kawlrau ka umawmase, kanea kikai nibalrubalrulane ka hungu, ala katwase papia ki swa Iseraylri kawriva.”

² Ala manungangaku; ku Twaumase la baai nakwane kwini nibalrubalrulane ka hungu,

³ La iya kai, “Lri tara kawlrau ka umawmase, alra kikai baaili muswane kai nibalrubalrulane ka hungu si kane, la pasuete ki barangesu.” La kaneaku; kikai nibalrubalrulane ka hungu mia ki valu ku limemane.

⁴ La pacungulu ku Twaumase iya kai, “Lri tara kawlrau ka umawmase, lu mwa kwini ki swa Iseraylri, si malra kai vagali pelaela liniane.

⁵ Kainaku siakawlu muswane mwa kwini ki makucingalre lu kawriva thingale ka kuni; siakawlaku muswane mwa ki swa Iseraylri.

⁶ Alaiyasi sikawlaku muswane mwa ki lamaadrau ka kuni, si mwa kwini ki lamakucingalre lu kawrivane thingale ka vaga ki maelane ka kuni, kwini lalasu lri dulrwana kilalra ki vagasu.

⁷ Ai ikai ki swa Iseraylri kadrwa kuna tangeeanga kulri mubangalre kilalra ku vagasu; kwi lalasu adravane ka vagali kai kialalra makanaelre. Kwi lalasu tengatengaane ka makelrathe la kakecenge.

⁸ Lri pangimiaku muswane liniane kakeecenge.

⁹ Lri pangimiaku muswane ki alrisapesape ku kecengane, mia ki tauru ka kakerangane ku kawlukulane. Madha kakiwcu kwini ki lawabaebalre ka laumawmase.”

¹⁰ Ku Twaumase la pacungulu iya kai, “Lri tara kawlrau ka umawmase, kicacaligira kilalra kai vagali, si pikai ki kidremedremesu.

¹¹ Lri mwasu kavai tamwane acaicali ki sakacekele, madha thengete liniane ku kialalra ku kai kialalra, malra kai aiyaneli liniane ka abebeelengenga ka Tamatama kai vaga si pelaela liniane.”

¹² Pacungulu, ku Ri ki Twaumase waciliki nakwane, la kilalraku ilrilrikudru nakwane yakai ku waguruguru ku lingau ku amia kai, “Drengedrengera ku lrigu ki Tamatama ka yabelenge!”

¹³ La kilaalranga naku kudra lingau ki tangipalapaladhane si tamapapungupungane ki sapakepake ki supate ka panianianiake ka waudriwdripi ka yakai belenge, la kilaalrana naku ku tangipalridingane ki palridingi, mia ki siange ki lingilingi.

¹⁴ Ku puku ki Tamatama swaeete nakwane; ku Rini sa malra nakwane iluku, lu kidremedremaku kwaalriaku la kalisiaku.

¹⁵ Ala, mwa ku Tele Abibe thili vaalru Kibare, ka amani ku tamwane acaicali ki sakacekele. Yakaiyaku kwini isadra makapitulu ka vai, ngwalai ku tadrelane si takilalrane ku tangimiane si tirereenganenga.

Ku Tamatama siakawlu ki Izikile ataradrangalrungalru

¹⁶ Sa maka pitulunga, ku Tamatama amia kai nakwane.

¹⁷ “Lri tara kawlrau ka umawmase, siakawlaku muswane ataradrangalrungalru ki swa Iseraylri. Kudra ngikakamanili pakipapawlringau muswane ku vaga pelaela liniane.

¹⁸ Alaiyasi pasalraelreaku pelaela ku tangeea ka manganga ka umawmase lri tara pacai, la kaisu katwase pakipapawlringau iniane, si pasapukwane iniane katwase ki ngialisiane la papia ki pacengecenge ku lrika angipapalribulaneini, kikai umawmase kai, unu lri ngwalai ki pasalrivaneini si pacai, ai lri papiaku muswane saladha ku kiame ki eraini.

¹⁹ Alaiyasi pakipapawlringawsu kwini ki manganga ka umawmase, kwini lasu la kai mubangalre ngitatupela, si la piapiyana kanganganga, kwini lasu lri ngwalai ki pasalrivaneini si pacai, ai lri dulrusu kai pacai.

²⁰ “Ku mathariri ku umawmase alaiyasi kidaili ki pacengecenge ka kadalranane, la pathagili kanganga, lri pakipadradresengaku iniane ku matiaukuludru. Alaiyasi kaisu pakipapawlringau iniane, kwini lasu lri tara pacai. Kwi lasu lri ngwalai ku pasalrivaneini si pacai. Lri kainaku lri ngulringau ku natapianeini ku mathariri, lri kamanisu ku siamece ku tangimiane.

²¹ Alaiyasi madha pasalrisalriu iyasu pakipapawlringau iniane, kwi lasu la tarumara ku tapakipapawlringavanesu, si kai pasalriwnga, kwi lasu lri tara panianiyake, lai dulrusu kai pacai.”

Ku Izikile mameeneneana

²² Wathingalaku ka swaete nakwane ku puku ki Tamatama, la kilalraku ku taiyane nakwane iya kai, “Ngidrakala, si mwa ka valrwalru, lri ikaiyaku kwini kawriva muswane.”

²³ Ala katwasaku mwa lregelrege valrwalru, ikai kwini wadrelaku ku lrigu ki Tamatama, mararaamau ku dreleli ikai babiabila vaalru Kibare. Waguruthunganaku ikai cakena;

²⁴ ku Ri ki Twaumase mwadringi nakwane, si alra nakwane drakale. Ku Tamatama la iya kai nakwane, “Lu katwasa mutavanana, la ngiaelebe ikai ki daane.

²⁵ Lri tara kawlrau ka umawmase, ku umawmase lri ara calrisi kerenge muswane, lai kaisu maka dulru mutaluvaivai adrelane.

²⁶ Lri paamenemenenaku muswane, lai kaisu dulru pakipapawlringau kai ki lawabaebaebalre ka laumawmase.

²⁷ Lukabilrilinga, lri peelaku papia muswane kawriva, si muelebe ki ngudwisu, pasiwlriwlriane muswane kawriva. Lukamani kwidra, ku taiyaneli ku vaga ka abebeelengenga ka Tamatama lri pelaela liniane. Yakai ku lri kilalra, yakai ku kai lri mubangalre kilalra, asi lwiyane kwi lalasu yai wabaebaebalre ka laumawmase.”